Tendo en conta que as funcións de planificación, regulación e administración do ensino regrado son competencia da Consellería de Educación e Ordenación Universitaria, co obxecto de fixa-lo calendario escolar e as actividades de fin de curso para o curso 2002/2003 nos centros docentes de niveis non universitarios sostidos con fondos públicos da Comunidade Autónoma de Galicia, por proposta da Dirección Xeral de Centros e Inspección Educativa,

DISPOÑO:

Capítulo I

Calendario escolar

Artigo 1º.-Aprobación.

Apróbase o calendario escolar para o curso 2002/2003 coas especificacións que se sinalan.

Artigo 2º.-Ámbito de aplicación.

Esta orde é de aplicación en tódolos centros da Comunidade Autónoma de Galicia de niveis non universitarios sostidos con fondos públicos.

Artigo 3º.-Duración do curso académico.

1. O curso académico abranguerá desde o día 1 de setembro de 2002 ata o 31 de agosto de 2003.

2. Nos primeiros días do mes de setembro e ata o día 6, realizaranse as probas e sesións de avaliación correspondentes á convocatoria extraordinaria do curso 2001/2002 para os alumnos de bacharelato, de formación profesional e de ensinanzas de réxime especial.

3. Os alumnos de bacharelato e de ensinanzas de réxime especial que non puidesen matricularse no prazo ordinario poderán facelo no prazo extraordinario, que abranguerá desde o día 2 ata o 11 de setembro de 2002.

Artigo 4º.-Comedores escolares.

1. Os comedores escolares funcionarán desde o día 1 de outubro de 2002 ata o 30 de maio de 2003, ámbolos dous inclusive.

2. Os delegados provinciais poderán autoriza-la modificación das datas de inicio e final do servicio de comedor escolar naqueles centros nos que concorran circunstancias excepcionais debidamente xustificadas que así o aconsellen.

Artigo 5º.-Actividades lectivas.

1. No 2º ciclo de educación infantil, educación especial e educación primaria, as actividades propiamente lectivas comezarán o día 10 de setembro de 2002 e rematarán o 20 de xuño de 2003.

2. En educación secundaria obrigatoria e no bacharelato, as actividades lectivas comezarán o 17 de setembro de 2002 e rematarán o 20 de xuño de 2003. Non obstante o anterior, para o segundo curso de bacharelato as actividades lectivas rematarán de acordo coas datas previstas para as probas de acceso á universidade.

3. En formación profesional, as actividades lectivas comezarán o 1 de outubro de 2002 e rematarán de acordo cos requirimentos horarios establecidos para cada ciclo formativo.

4. Nas ensinanzas de réxime especial as actividades lectivas comezarán o 1 de outubro de 2002 e non rematarán antes do 5 de xuño de 2003.

5. Os delegados provinciais, por circunstancias concretas de organización, poderán autoriza-la modificación das datas de comezo e remate das actividades lectivas.

Artigo 6º.-Períodos de vacacións.

1. As vacacións de Nadal abranguerán desde o día 21 de decembro de 2002 ata o día 7 de xaneiro de 2003, ámbolos dous inclusive.

2. As vacacións de Semana Santa abranguerán desde o día 12 ata o día 21 de abril de 2003, ámbolos dous inclusive.

3. Considéranse períodos non lectivos os días correspondentes ó Entroido, luns e martes (días 3 e 4 de marzo de 2003).

Artigo 7º.-Días festivos.

1. Son días festivos os así declarados pola Consellería de Xustiza, Interior e Relacións Laborais da Xunta de Galicia, en exercicio das competencias que lle atribúe o artigo 1.31º do Real decreto 1346/1989, do 3 de novembro (BOE do 7 de novembro).

2. Considéranse días non lectivos para efectos académicos, ademais das festas laborais de carácter local publicadas por resolución da Consellería de Xustiza, Interior e Relacións Laborais, as festividades correspondentes ós patróns de cada nivel de ensino:

-24 de outubro de 2002: Santo Antonio Mª Claret (escolas de arte).

-22 de novembro de 2002: Santa Cecilia (conservatorios de música).

-27 de novembro de 2002: San Xosé de Calasanz (centros de educación primaria).

-28 de xaneiro de 2003: San Tomé de Aquino (centros de educación secundaria e bacharelato).

-31 de xaneiro de 2003: San Xoán Bosco (centros de formación profesional).

3. Os centros que imparten máis dun nivel de ensino deberán unificar nunha única xornada as festividades correspondentes ós distintos patróns; circunstancia que deberán comunicar por escrito á Inspección Educativa con antelación suficiente para o seu coñecemento.

Artigo 8º.-Conmemoracións.

1. Durante o curso escolar celebraranse, como mínimo, as seguintes conmemoracións:

-Do 9 ó 15 de decembro: conmemoración da Constitución e do Estatuto de Autonomía de Galicia.

-10 de decembro: Día da Declaración Universal dos Dereitos Humanos.

-30 de xaneiro: Día da Paz.

-7 de marzo: Día Internacional da Muller.

-14 de marzo: Día Mundial dos Dereitos do Consumidor.

-Do 17 ó 21 de marzo: Semana da Prensa. Un día desta semana declárase con xornais.

-Entre o 3 e o 23 de abril: Día do Libro.

-7 de abril: Día Mundial da Saúde.

-9 de maio: Día de Europa.

-Do 12 ó 16 de maio: Semana das Letras Galegas.

-5 de xuño: Día Mundial do Medio Ambiente.

Estas datas son lectivas para tódolos efectos.

2. Sen prexuízo do anterior, os centros deberán organizar actividades diversas, tendentes a salienta-la importancia das referidas conmemoracións.

Artigo 9º.-Días non lectivos de libre disposición.

Os consellos escolares dos centros así como os responsables dos centros de menos de tres unidades poderán solicitar, argumentando razóns de tradición, costume ou conveniencia pedagóxica, ata dous días non lectivos que deberán preverse na programación xeral do centro. A dita petición deberá facerse antes do día 31 de outubro de 2002, ante o delegado provincial da Consellería de Educación e Ordenación

Universitaria, quen, logo de informe da Inspección Educativa e dos que estime procedentes, resolverá o que proceda.

É desexable que os centros da mesma localidade elixan os mesmos días non lectivos, para o que se buscará o consenso entre tódolos centros para a selección destes dous días.

Artigo 10º.-Modificación do calendario escolar.

Calquera modificación que se precise facer ó calendario escolar deberá ser solicitada, alomenos con quince días de antelación, polo centro interesado ó delegado provincial, quen, logo do informe da Inspección Educativa e dos que coide oportunos, resolverá o procedente.

Capítulo II

Inicio do curso

Artigo 11º.-Actividades de programación.

Desde o comezo do curso ata o inicio das clases, o profesorado dos centros públicos, ben individualmente, ben formando parte dos órganos de coordinación didáctica correspondentes, baixo a dirección dos seus responsables, colaborará na elaboración da programación xeral anual e na revisión dos proxectos educativos e curriculares, participará nas reunións de ciclos, departamentos, claustros e cantas outras actividades estean relacionadas coa organización do curso. Nese período os departamentos didácticos, baixo a coordinación e dirección do respectivo xefe de departamento, dedicaranse a elabora-la programación didáctica das ensinanzas correspondentes ás áreas, materias ou módulos integrados no departamento e a organiza-lo curso escolar.

Artigo 12º.-Xornada escolar.

A xornada escolar será a establecida pola lexislación vixente para cada unha das etapas e niveis. Non obstante o anterior, aqueles centros que combinen o servicio de transporte escolar con outros centros deberán establecer, coa autorización do delegado provincial da Consellería de Educación e Ordenación Universitaria, un horario que, coas adaptacións necesarias, permita garanti-lo axuste e perfecta coordinación dos centros co dito servicio. Estes centros comunicaranlle ó delegado provincial a proposta de horario escolar para o curso 2002/2003, debendo resolver este antes do inicio das clases.

Nos períodos comprendidos entre os días 10 e 30 de setembro de 2002 e entre os días 2 e 20 de xuño de 2003 establecerase a xornada lectiva continuada en horario matinal nos centros que impartan educación infantil ou educación primaria, ou infantil e primaria, ou primaria e secundaria obrigatoria, ou infantil, primaria e secundaria obrigatoria, ou educación especial.

En tódolos centros referidos será de aplicación este tipo de xornada, agás nos casos que teñan autorización expresa do delegado provincial para outro tipo de xornada.

Capítulo III

Final de curso

Artigo 13º.-Escolas de educación infantil, colexios de educación primaria, colexios de educación infantil e primaria e centros públicos integrados.

1. Actividades non lectivas.

O período comprendido entre o 23 e o 30 de xuño de 2003 será dedicado polo profesorado, entre outras actividades, a elabora-las actas de avaliación, os informes individualizados, os informes para as familias e a cubri-los libros de escolaridade; todo o profesorado dos centros públicos permanecerá no centro, polo menos, ata o día 30 de xuño de 2003 inclusive.

2. Atención ás reclamacións contra as cualificacións ou decisións de promoción.

Co fin de que os pais ou titores dos alumnos dispoñan dun prazo para exerce-lo dereito a presentar reclamacións, de se-lo caso, contra as cualificacións finais, ou decisións de promoción, segundo establece o punto 11 do capítulo IV do anexo á Orde do 22 de xullo de 1997 (DOG do 2 de setembro) para os alumnos de educación infantil e primaria, e a Orde do 28 de agosto de 1995 (BOE do 20 de setembro) para os alumnos de educación secundaria obrigatoria, a sesión de avaliación final dos alumnos e a comunicación ás familias do resultado da dita avaliación terán lugar os días 23 e 24 de xuño de 2003.

Artigo 14º.-Institutos de educación secundaria e centros de ensinanzas de réxime especial.

1. Calendario final do curso.

Os claustros dos centros sinalados elaborarán un calendario das actividades docentes para o final de curso 2002/2003, de acordo coas instruccións que seguen.

Os directores dos centros citados enviaranlles ós servicios provinciais de Inspección Educativa, antes do día 20 de maio de 2003, un resumo do calendario aprobado polo claustro conforme os modelos recollidos nos anexos a esta orde e, no caso da formación profesional específica, segundo o que se determine na normativa específica. As inspeccións comunicaranlles as modificacións, se fose o caso, ós centros que procedan antes do 3 de xuño de 2003, para que os directores as dean a coñecer ó profesorado para o seu cumprimento.

Ademais das actividades docentes lectivas, o calendario aprobado polo claustro deberá incluír, ata esa data, as actividades docentes referidas ás probas de avaliación, sesións de avaliación conxunta, recuperacións e cantas outras actividades estean relacionadas co final de curso.

2. Horario do profesorado para o mes de xuño.

O profesorado dos institutos de educación secundaria seguirá cumprindo o seu horario lectivo ata o día 20 de xuño de 2003 incluído.

A partir do día 23 de xuño de 2003 e ata o día 30 inclusive, polo menos, as direccións dos institutos de educación secundaria poderán modifica-los horarios dos profesores para adecualos ás actividades establecidas no calendario aprobado polo claustro e aceptado pola Inspección Educativa (avaliacións finais, entrega de cualificacións, atención a reclamacións e cantas outras actividades estean relacionadas co final de curso). En todo caso, as direccións dos centros deben garanti-la atención ás reclamacións contra as cualificacións finais, realizadas den

tro dos prazos previstos na Orde do 28 de agosto de 1995 (BOE do 20 de setembro) para educación secundaria obrigatoria e bacharelato e no punto 10.2º da Orde do 24 de xullo de 1991 (DOG do 28 de agosto) para os alumnos de FP, norma que tamén será de aplicación para os alumnos de ensinanzas de réxime especial.

Durante o mes de xuño, as direccións dos centros públicos de ensinanzas de réxime especial poderán adapta-los horarios dos profesores ás necesidades específicas de cada centro. Tal adaptación non poderá supor variación do número global de horas semanais de permanencia no centro previsto no horario lectivo de cada profesor.

3. Sesións de avaliación da ESO e do bacharelato.

As sesións de avaliación final dos alumnos da ESO e do primeiro curso de bacharelato terán lugar a partir do día 18 de xuño.

As datas de avaliación do segundo curso de bacharelato adecuaranse ás datas previstas para as probas de acceso á universidade.

Unha vez realizadas as avaliacións, poderán continua-las clases do segundo curso de bacharelato nas disciplinas que fose necesario ata a realización das probas de acceso á universidade e, con este fin, quedan autorizadas as direccións dos centros para introduciren modificacións nos horarios dos profesores e grupos de alumnos afectados.

4. Proba extraordinaria de materias pendentes do mes de maio.

Os alumnos de 2º de bacharelato con disciplinas pendentes de cursos anteriores serán convocados a unha proba extraordinaria durante o mes de maio.

Artigo 15º.-Probas finais nas ensinanzas de réxime especial.

1. Nas escolas de arte, as avaliacións finais, probas extraordinarias, probas de reválida, defensa de proxectos e cantas outras actividades estean relacionadas co final de curso realizaranse despois do día 5 de xuño de 2003.

2. Na Escola Superior de Conservación e Restauración de Bens Culturais de Galicia, os exames finais do curso realizaranse a partir do día 16 de xuño de 2003 e os exames correspondentes á convocatoria de setembro terán lugar entre os días 1 e 5 de setembro de 2003.

3. As escolas oficiais de idiomas realizarán as probas finais ós alumnos oficiais entre os días 6 e 12 de xuño de 2003. As probas para alumnos libres dos ciclos elemental e superior terán lugar a partir do día 12 de xuño de 2003. As probas de nivel de coñecemento do idioma terán lugar do 16 ó 27 de xuño de 2003.

4. Os conservatorios de música e os conservatorios de danza realizarán as avaliacións conxuntas dos alumnos do plan de estudios LOXSE entre os días 6 e 11 de xuño de 2003. As probas de acceso ó grao medio LOXSE, iniciaranse o día 12 de xuño de 2003. Os conservatorios superiores de música realizarán os exames oficiais correspondentes ó Plan de estudios de 1966 entre os días 18 e 23 de xuño de 2003. Os exames libres realizaranse entre o 24 e o 27 de xuño de 2003.

Artigo 16º.-Actas de avaliación final.

1. Os secretarios dos centros deberán remitirlle á delegación provincial correspondente fotocopias autenticadas das actas de avaliación final de tódolos cursos do seu centro e dos centros privados adscritos, de se-lo caso, antes do día 15 de xullo de 2003.

2. As actas correspondentes ós cursos que teñan convocatoria extraordinaria (setembro) enviaranse antes do día 15 de setembro de 2003.

Capítulo IV

Outras disposicións

Artigo 17º.-Memorias de fin de curso.

1. Os directores dos centros de educación infantil e de educación infantil e primaria enviaranlle ó Servicio Provincial de Inspección respectivo, antes do día 10 de xullo de 2003, a memoria anual do centro á que se refire o punto 5 do capítulo I do anexo á Orde do 22 de xullo de 1997, pola que se regulan determinados aspectos organizativos e de funcionamento das escolas de educación infantil, dos colexios de educación primaria e dos colexios de educación infantil e primaria dependentes da Consellería de Educación e Ordenación Universitaria (DOG do 2 de setembro).

2. Os directores dos centros públicos integrados enviaranlle, antes do 10 de xullo de 2003, ó Servicio Provincial de Inspección Educativa respectivo a memoria anual do centro a que se refire o punto 43 das instruccións que regulan a organización e o funcionamento dos centros públicos integrados, aprobadas pola Orde do 3 de outubro de 2000, pola que se dictan instruccións para o desenvolvemento do Decreto 7/1999, polo que se implantan e regulan os centros públicos integrados de ensinanzas non universitarias (DOG do 2 de novembro).

3. Os directores dos institutos de educación secundaria enviaranlle ó Servicio Provincial de Inspección respectivo, antes do día 10 de xullo de 2003, a memoria anual do centro á que se refire o punto 43 das instruccións que regulan a organización e o funcionamento dos institutos de educación secundaria, aprobadas pola Orde do 2 de agosto de 1997 (DOG do 1 de setembro).

4. Os directores dos centros de ensinanzas de réxime especial, en aplicación da disposición transitoria primeira da Orde do 1 de agosto de 1997, elaborarán ó longo do mes de xuño de 2003, logo do informe dos respectivos claustros, unha memoria que recolla o grao de consecución dos obxectivos fixados na programación xeral anual, as dificultades atopadas e as medidas correctoras introducidas, de se-lo caso. A devandita memoria, con informe do consello escolar do centro, enviarase ó Servicio Provincial de Inspección na primeira semana de xullo de 2003 e terase en conta á hora de elabora-la programación do curso seguinte sobre todo para programar novamente obxectivos non acadados ou acadados parcialmente no curso anterior e artellar novos medios para logralos.

Artigo 18º.-Libros de texto.

Os centros deberán observa-las normas fixadas no Decreto 89/1993, do 16 de abril (DOG do 27 de abril) polo que se regula a autorización de libros

de texto e outros materiais curriculares para as ensinanzas de réxime xeral, e máis no artigo 8.2º do Decreto 247/1995, do 14 de setembro (DOG do 15 de setembro), polo que se desenvolve a Lei 3/1983, de normalización lingüística, para a súa aplicación ó ensino en lingua galega nas ensinanzas de réxime xeral impartidas nos diferentes niveis non universitarios, que establece que os materiais que se empreguen nas áreas ou materias que se deben impartir na lingua propia de Galicia terán que estar normalmente en galego. Para tal efecto, exporán no taboleiro de anuncios, na primeira quincena de xuño, a relación de libros e material didáctico impreso que se utilizará no curso 2002/2003. Unha copia da dita relación será enviada ó Servicio Provincial de Inspección Educativa antes do día 24 de xuño de 2003. Así mesmo, observarase a prohibición de venda e/ou distribución de libros e material didáctico nos centros públicos, tanto por persoal propio, como por persoas alleas a eles.

Santiago de Compostela, 22 de abril de 2002.

Celso Currás Fernández

Conselleiro de Educación e Ordenación Universitaria

ANEXO I

Resumo do calendario de actividades

do mes de xuño. Curso 2002-2003

O director do IES/CPI..., pon no seu coñecemento que o calendario de actividades docentes programadas para o final do curso, aprobado polo claustro, recolle o seguinte:

-Para a ESO:

O último día de clase será o...

As datas de avaliación final serán do... ó...

-Para o 1º curso de bacharelato:

O último día de clase será o...

As datas de avaliación final serán do... ó...

-Para 2º de bacharelato:

O último día de clase será o...

As datas de avaliación final serán do... ó...

..., de... de 2003.

O director

Rubricado

Inspector de Educación.

ANEXO II

Resumo do calendario de actividades

do mes de xuño. Curso 2002-2003

O director da escola de arte.../escola superior de conservación e restauración pon no seu coñecemento que o calendario de actividades docentes programadas para o final de curso, aprobado polo claustro, recolle o seguinte:

-O último día de clase será o...

-As datas de avaliación final serán do... ó...

-As datas das probas de suficiencia serán do... ó...

-As datas das probas para os alumnos libres serán do... ó...

-As probas de reválida correspondentes ó plan de estudios de 1963 (cando se impartan especialidades deste plan) realizaranse do... ó...

..., de... de 2003.

O director

Rubricado

Inspector de Educación.

ANEXO III

Resumo do calendario de actividades

do mes de xuño. Curso 2002-2003

O director da escola oficial de idiomas... pon no seu coñecemento que o calendario de actividades docentes programadas para o final de curso, aprobado polo claustro, recolle o seguinte:

-O último día de clase será o...

-As datas finais para os alumnos oficiais serán o día...

-As datas das probas para os alumnos libres do ciclo elemental serán do... ó...

-As datas das probas para os alumnos libres do ciclo superior serán do... ó...

-As datas das probas de nivel de coñecementos do idioma serán do... ó...

..., de... de 2003.

O director

Rubricado

Inspector de Educación.

ANEXO IV

Resumo do calendario de actividades

do mes de xuño. Curso 2002-2003

O director do conservatorio de música/conservatorio de danza... pon no seu coñecemento que o calendario de actividades docentes programadas para o final de curso, aprobado polo claustro, recolle o seguinte:

-O último día de clase será o...

-As datas da avaliación conxunta dos alumnos LOXSE serán do... ó...

-As datas dos exames de plans de estudios anteriores á LOXSE serán do... ó...

-As datas dos exames libres serán do... ó...

-A proba de acceso ó grao medio LOXSE realizarase do... ó...

..., de... de 2003.

O director

Rubricado

Inspector de Educación.