O Decreto 8/1998, do 8 de xaneiro, polo que se desenvolve a estructura orgánica da Consellería de Cultura, Comunicación Social e Turismo, atribúelle no seu artigo 7 á Dirección Xeral de Comunicación Social e Audiovisual, a dirección e coordinación das actuacións da Consellería de Cultura, Comunicación Social e Turismo en materia de telecomunicacións, audiovisual e multimedia, e tódolos aspectos que poidan derivar da aplicación das novas tecnoloxías da comunicación e a información a tódalas facetas da cultura e do patrimonio galego.
O desenvolvemento da sociedade da información e do coñecemento vén desencadeando un proceso de transformación social que modifica os valores e actitudes de comportamento co conseguinte cambio na sociedade do noso tempo, considerándose un dos elementos claves no desenvolvemento futuro non só da sociedade, senón tamén da cultura e a economía galega. Iso esixe aproveitar ó máximo as potencialidades das tecnoloxías da información para poñelas á disposición daquelas entidades que polas funcións que realizan e finalidade que perseguen necesitan facer uso delas para unha mellor eficacia no desenvolvemento das súas actividades.
Por iso preténdese poñer en marcha unha liña de subvencións que persiga como obxectivo a promoción do uso da Internet por parte daquelas entidades sen ánimo de lucro, que se traduza en axudas á renovación e adquisición do equipamento necesario para acceder ós servicios que ofrece Internet.
Por todo isto,
DISPOÑO:
1. Bases xerais para a concesión das subvencions.
Artígo 1º.-Obxecto e partida orzamentaria.
Convócanse subvencións, mediante réxime de concorrencia competitiva, a entidades sen ánimo de lucro para a renovación e adquisición de equipamentos necesarios para o fomento da sociedade da información.
Polo tanto, para as mencionadas axudas resérvase a cantidade de 187.564 euros que se imputarán ó crédito dispoñible na aplicación orzamentaria 10.04.361A780 dos orzamentos xerais da Comunidad Autónoma de Galicia para o ano 2002.
Artigo 2º.-Equipamento subvencionable.
1. Só para os efectos desta orde, poderán ser obxecto de axudas as adquisicións de PC, considerados como terminais interactivos e equipamentos de comunicación que permitan a conexión ós servicios da Internet.
2. O equipamento subvencionable terá como finalidade a formación, difusión e promoción da sociedade da información.
3. Quedan excluídos destas axudas a instalación e os gastos derivados do acceso e servicio da Internet.
Artigo 3º.-Beneficiarios.
Poderán optar a estas subvencións:
As entidades sen ánimo de lucro legalmente constituídas, que persigan como finalidade a realización
de actividades de carácter social, cultural e outras de interese xeral que dispoñan dun establecemento aberto para a realización das devanditas actividades e teñan o seu domicilio social na Comunidade Autónoma de Galicia.
Artigo 4º.-Motivos de exclusión.
Quedan excluídos os solicitantes que anteriormente recibisen algunha outra subvención da Consellería de Cultura, Comunicación Social e Turismo e non xustificasen o seu investimento.
Artigo 5º.-Contía.
1. A contía máxima da axuda será de ata un 65%, en termos xerais, do importe total da factura presentada, estendida pola entidade subministradora, incluíndo unicamente o valor do material subvencionable adquirido e excluíndo outro tipo de gastos (IVE, transporte, etc.).
2. A axuda máxima por PC será de 600 euros.
3. En todo caso o tope máximo da axuda concedida será de 6.000 euros por entidade solicitante.
Artigo 6º.-Solicitudes.
1. As solicitudes faranse mediante instancia dirixida ó conselleiro de Cultura, Comunicación Social e Turismo, segundo os modelos que figuran como anexos desta orde, e presentaranse no rexistro xeral da Consellería de Cultura, Comunicación Social e Turismo ou nos rexistros das delegacións provinciais, sen prexuízo dos procedimientos establecidos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada poa Lei 4/1999, do 13 de xaneiro.
2. Ás solicitudes xuntarase a seguinte documentación:
a) Fotocopia da tarxeta de idenficación fiscal da entidade.
b) Acta e estatutos de constitución, con acreditación da súa inscrición no rexistro correspondente.
c) Poder suficiente do representante da entidade solicitante.
d) Declaración de tódalas subvencións solicitadas ou concedidas para o mesmo fin das distintas administracións públicas.
e) Memoria detallada así como o orzamento desagregado do equipamento para o que se solicita a subvención.
f) Plan de actividades para o que vai dirixido o material.
g) Orzamento do exercicio corrente e balance de situación da entidade, sen incluí-las partidas das actuacións subvencionables tramitadas.
Artigo 7º.-Prazo de presentación de solicitudes.
As solicitudes deberán presentarse, segundo o modelo que figura nos anexos, no prazo de 30 días naturais contados a partir do día seguinte ó da publicación desta orde no Diario Oficial de Galicia. Se o último día do prazo resultase ser sábado ou festivo, poderase presentar o seguinte día hábil.
Artigo 8º.-Tramitación.
Os servicios competentes da Dirección Xeral de Comunicación Social e Audiovisual tramitarán as solicitudes e instrumentarán os procedementos necesarios para a concesión da subvención.
Artigo 9º.-Criterios de valoración.
Recibidas as solicitudes de subvención e demais documentación, serán analizadas e valoradas polos servicios competentes da Dirección Xeral de Comucación Social e Audiovisual, de acordo cos seguintes criterios de valoración:
-Dimensión e ámbito de actuación da entidade solicitante.
-Que a entidade sen ánimo de lucro teña como finalidade o fomento dos valores e da identidade cultural e social de Galicia.
-Deseño dun plan de desenvolvemento da entidade na denominada sociedade da información.
-Situación nas zonas xeográficas de desenvolvemento tecnolóxico desfavorecido.
Artigo 10º.-Proposta.
Unha vez analizadas e valoradas as solicitudes, o director xeral de Cumunicación Social e Audiovisual elevará proposta ó conselleiro de Cultura, Comunicación Social e Turismo, que resolverá dentro das dispoñibilidades orzamentarias, poñendo fin á vía administrativa.
Artigo 11º.-Proposta de resolución.
Para os efectos establecidos no artigo 42.2º da Lei 30/1992, do 26 de novembro, de régimen xurídico das administracións públicas e do procedemento administrativo común modificada pola Lei 4/1999, do 13 de xaneiro, o prazo máximo para resolve-las solicitudes correspondentes ás accións especificadas nesta orde será de catro meses, contados a partir do día seguinte á publicación desta convocatoria. De non notificarse resolución favorable neste prazo, entenderase desestimada a petición correspondente, podendo interpoñer, con carácter potestativo, recurso de reposición ante o conselleiro de Cultura, Comunicación Social e Turismo no prazo dun mes, previo ó recurso contencioso-administrativo ante o Tribunal Superior de Xusticia de Galicia.
Toda alteración das condiciones tidas en conta para a concesión da subvención e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución da concesión.
Artigo 12º.-Prazo de aceptación.
Notificada a resolución de subvención, os beneficiarios deberán manifestar por escrito a súa aceptación comprometéndose a executa-lo proxecto subvencionado no prazo e condicións establecidas. De non recibirse a aceptación no prazo de dez días naturais entenderase que o beneficiario renuncia á subvención concedida e procederase, sen máis trámite, ó arquivo do expediente.
Artigo 13º.-Pagamentos e xustificación.
Os beneficiarios da subvención quedarán obrigados a xustificar en todo caso antes do 1 de novembro do ano 2002, mediante a presentación dos xustificantes acreditativos, orixinal e dúas fotocopias, o pagamento da totalidade do investimento realizado.
Logo do anterior librarase a cantidade adxudicada de acordo co establecido na normativa orzamentaria que sexa aplicable, logo de presentación de certificación expedida pola entidade bancaria na que sinale
o número de conta da entidade beneficiaria onde se deba realiza-lo pagamento.
Para proceder a calquera pagamento superior ós 1.500 euros, os beneficiarios deberán presentar certificacións acreditativas do cumprimento das obrigas tributarias e coa Seguridade Social e de non ter pendente de pagamento ningunha débeda, por ningún concepto, coa Administración pública da Comunidade Autónoma, segundo o disposto no artigo 41.1º g) do proxecto de orzamentos xerais da Comunidade Autónoma de Galicia para o 2002 e no artigo 79 do texto refundido da Lei de réxime financeiro e orzamentario aprobado polo Decreto lexislativo 1/1999, do 7 de outubro, modificado pola Lei 8/1999, do 30 de decembro, de medidas fiscais e orzamentarias, de función pública e de actuación administrativa. As ditas certificacións serán expedidas para efectos de subvención.
Artigo 14º.-Obrigas do beneficiario.
Os beneficiarios das subvencións, una vez aceptadas estas, quedarán obrigados a destina-los fondos percibidos para o obxecto concreto para o que foron concedidos. A Consellería de Cultura, Comunicación Social e Turismo poderá realiza-las oportunas comprobacións para o mellor coñecemento da efectiva realización do proxecto obxecto de axuda.
De igual maneira o beneficiario estará obligado a facilitar toda a información que lle sexa requirida pola Intervención Xeral da Comunidade Autónoma, o Tribunal de Contas e o Consello de Contas, no exercicio das súas funcións de fiscalización e control do destino das axudas.
Así mesmo, no momento de xustificación da execución total do proxecto, o peticionario deberá presentar unha declaración complementaria do conxunto das axudas solicitadas, tanto as aprobadas ou concedidas como as pendentes de resolución, para o mesmo proxecto, das distintas administracións públicas competentes, ou calquera dos seus organismos, entes ou sociedades. En ningún caso o importe das subvencións concedidas poderá ser de tal contía que, illadamente ou en concorrencia coas concedidas a través doutras administracións públicas, supere o 100% do custo total da actividade subvencionada que deberá desenvolve-lo beneficiario.
Artigo 15º.-Perda da subvención.
O incumprimiento por parte do beneficiario de calquera requisito desta orde facultará a Consellería de Cultura, Comunicación Social e Turismo para instruír expediente sancionador, conforme o previsto no artigo 79 do texto refundido da Lei de réxime financeiro e orzamentario, aprobado polo Decreto lexislativo 1/1999, do 7 de outubro, modificado poa Lei 8/1999, do 30 de decembro, de medidas fiscais e orzamentarias, de función pública e de actuación administrativa e na Lei de réxime xurídico das administracións públicas e do procedemento administrativo común; se procede, anulará os beneficios concedidos e solicitará a devolución das cantidades percibidas, se as houber, segundo o procedemento que establece o Regulamento xeral de recadación.
Artigo 16º.-Resolución.
Contra os ditos actos resolutivos, que esgotan a vía administrativa, poderá o intersesado interpoñer recurso contencioso-administrativo perante o Tribunal Superior de Xustiza da Comunidade Autónoma de
Galicia, no prazo de dous meses, contados desde a recepción da notificación da resolución ou, potestativamente, interpoñer no prazo dun mes desde a recepción da resolución, recurso de reposición ante o conselleiro de Cultura, Comunicación Social e Turismo.
Disposición transitoria
Esta orde tramítase anticipadamente ó amparo do previsto na orde da Consellería de Economía e Facenda do 11 de febreiro de 1998 (DOG nº 33, do 19 de febreiro), modificada polas ordes do 24 de novembro de 2000 e do 25 de outubro de 2001, de conformidade co disposto no artigo 4.1º, da referida orde. A autorización do gasto e a contratación de obrigas demorarase ata a aprobación definitiva do crédito que deba ampara-lo gasto. Tódolos actos de trámite dictados nos expedientes de gasto regulados por esta orde
entenderanse condicionados a que, ó dictarse o acordo de compromiso de gasto, subsistan as mesmas circunstancias de feito e de dereito existentes no momento en que se produciron aqueles actos.
Disposicións derradeiras
Primeira.-Facultase o director xeral de Comunicación Social e Audiovisual para dictar, no ámbito das súas competencias, as resolucións precisas para o desenvolvemento desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 19 de abril de 2002.
Jesús Pérez Varela
Conselleiro de Cultura, Comunicación Social
e Turismo
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA
