No uso das atribucións outorgadas pola Lei 4/1987, do 27 de maio, de creación da Escola Galega de Administración Pública, e pola Lei 10/1989, do 10 de xullo, de modificación da anterior, convócanse, en colaboración co Instituto Galego de Consumo, os cursos e xornadas indicados no anexo I da presente resolución, que se desenvolverán de conformidade coas seguintes bases:
Primeira.-Solicitudes.
1. O persoal que desexe participar nestes cursos e xornadas deberá presentar, cuberta en tódolos epígrafes que correspondan, a instancia que, como modelo, se recolle no anexo II desta resolución.
2. A falsidade ou a ocultación de datos esenciais para a selección dos aspirantes dará lugar á exclusión automática do curso que se solicita, así como á imposibilidade de participar en ningún curso no ano seguinte.
3. O prazo de presentación de instancias será de dez días contados desde o seguinte ó da publicación da presente resolución.
4. As solicitudes de admisión ó curso axustaranse ó modelo recollido no anexo II desta resolución e dirixiranse á Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela. As instancias presentaranse no rexistro da EGAP, pero poderanse utilizar, así mesmo, os sistemas previstos no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
Segunda.-Acceso ás actividades.
Poderá participa-lo persoal que cumpra os requisitos específicos esixidos para cada actividade do referido anexo I.
Terceira.-Selección.
1. Os criterios selectivos que se utilizarán serán os recollidos no anexo I para cada unha das actividades programadas.
2. As relacións de seleccionados para participar nos cursos publicaranse nos taboleiros de anuncios da EGAP e do Centro de Información Administrativa
e Atención ó Cidadán e, se é o caso, nas delegacións provinciais da Consellería da Presidencia, Relacións Institucionais e Administración Pública.
Cuarta.-Certificado de asistencia.
Outorgaráselle certificado de asistencia ós alumnos que participen con regularidade nas actividades programadas. É obrigatoria a asistencia e a puntualidade a tódalas sesións previstas dos cursos. Toda inasistencia a clase deberá ser xustificada debidamente polo interesado, se ben a falta de asistencia, aínda que sexa xustificada, a máis do 15% das horas lectivas programadas impedirá a expedición das correspondentes certificacións de participación e dará lugar á baixa no curso coa perda de tódolos dereitos.
Quinta.-Modificacións.
1. A EGAP poderá modifica-lo desenvolvemento das actividades anunciadas co fin de adaptalas ás necesidades da Administración, así como ás distintas continxencias que poidan xurdir.
2. No suposto de que o número de instancias recibidas sexa inferior ó 50% das prazas convocadas, a EGAP reserva para si o dereito a suspende-la realización do curso de que se trate, utilizando para estes efectos os medios de notificación ós interesados previstos na normativa vixente.
Santiago de Compostela, 4 de abril de 2002.
Domingo Bello Janeiro
Director da Escola Galega de Administración
Pública
ANEXO I
Curso de Información e etiquetado de productos.
1. Obxectivos.
Actualiza-los coñecementos sobre a etiquetaxe de productos alimenticios e a información que deben conter, segundo as normativas actuais. Analiza-la normativa de etiquetaxe de productos industriais e de preparados perigosos.
2. Destinatarios.
Persoal do Instituto Galego de Consumo e das oficinas municipais de Información ó Consumidor.
3. Desenvolvemento.
3.1. Duración: 16 horas.
3.2. Lugar: Santiago de Compostela (EGAP).
3.3. Datas: 29 e 30 de abril de 2002.
3.4. Horario: de mañá e tarde.
3.5. Nº de prazas: 30.
4. Contido.
Etiquetaxe de productos industriais: normativa xeral de etiquetaxe. Normas específicas nos sectores: téxtil, calzado e electrodomésticos. Etiquetaxe dos productos alimenticios: normativa xeral e normativas específicas de vacún, peixe e conservas.
Curso: de mediación en consumo.
1. Obxectivos.
Desenvolver habilidades negociadoras entre o persoal receptor das reclamacións de consumo, co fin de promove-lo ánimo de acordo e contribuír á resolución das situacións conflictivas.
2. Destinatarios.
Persoal do Instituto Galego de Consumo e das oficinas municipais de Información ó Consumidor.
3. Desenvolvemento.
3.1. Duración: 20 horas.
3.2. Lugar: Santiago de Compostela (EGAP).
3.3. Datas de realización: 11, 12 e 13 de xuño de 2002.
3.4. Horario: mañá e tarde.
3.5. Nº de prazas: 25.
4. Contido.
A comunicación. Introducción á mediación. Definición de problemas. O perfil do mediador. Estructura da mediación. A negociación. O acordo do proceso de mediación.
Curso: formación de árbitros.
1. Obxectivos.
Proporcionarlles ós destinatarios coñecementos técnicos e xurídicos e habilidades que favorezan o desenvolvemento do labor arbitral de consumo.
2. Destinatarios.
Árbitros dos distintos colexios arbitrais de Galicia ou persoas que poidan actuar como árbitros.
3. Desenvolvemento.
3.1. Duración: 8 horas.
3.2. Lugar: Santiago de Compostela (EGAP).
3.3. Datas de realización: 1ª quincena de novembro de 2002.
3.4. Horario: mañá e tarde.
3.5. Nº de prazas: 25.
4. Contido.
A mediación e a conciliación como alternativas á arbitraxe de consumo ou como partes do mesmo proceso. A actuación arbitral: abstención e recusación. O procedemento arbitral: o laudo, a proba. Dificultades na práctica da proba no procedemento arbitral. A execución forzosa e a anulación. Problemas que se van resolver.
Xornadas de formación en consumo para xornalistas.
1. Obxectivos.
Analiza-las informacións que sobre o consumo aparecen nos distintos medios de comunicación e, en especial, os elementos da deontoloxía profesional no eido do xornalismo de consumo e os problemas ligados á seguridade e saúde dos consumidores.
2. Destinatarios.
Xornalistas dos distintos medios de comunicación galegos.
3. Desenvolvemento.
3.1. Duración: 16 horas.
3.2. Lugar: Santiago de Compostela (EGAP).
3.3. Datas: novembro de 2002.
3.4. Horario: mañá e tarde.
3.5. Nº de prazas: 50.
4. Contido.
Medios de comunicación de masas en España: evolución. Relación entre sociedade e medios de comunicación. Marco xurídico: o suxeito pasivo. A ética no ámbito do consumo. Elementos de deontoloxía profesional no campo do xornalismo de consumo e os problemas ligados á seguridade e saúde dos consumidores. Hábitos e formas de consumo dos usuarios dos medios de comunicación. Conclusións e estratexias de futuro.