A aprendizaxe das linguas estranxeiras é unha das necesidades que máis se manifesta desde tódolos ámbitos sociais. Esta necesidade vai profundamente ligada ó progreso científico e tecnolóxico. Así, o aumento das relacións internacionais, a mobilidade laboral e a circulación das ideas e da información están provocando unha forte demanda social en favor da aprendizaxe das linguas estranxeiras, de tal xeito que o número de linguas que os cidadáns dun determinado país dominan constitúe un indicador importante do seu grao de desenvolvemento. Por outra parte, a mellor protección contra tódalas formas de racismo e de xenofobia lógrase mediante o coñecemento e a experiencia directa da realidade doutros países e mediante a mellora das capacidades de comunicación.
Por todo isto, o Comité de Ministros do Consello de Europa advirte dos perigos que poden derivarse da marxinación das persoas que non posúan as competencias necesarias para comunicarse nunha Europa interactiva.
En consecuencia, a necesidade de mobilidade laboral e de acceso á información, así como a importancia da tolerancia e da compresión mutuas fan das capacidades reais de comunicarse sen fronteiras lingüísticas un elemento indispensable da formación de todo cidadán. Por iso, a Consellería de Educación e Ordenación Universitaria iniciou no curso 1999/2000 un plan de potenciación da aprendizaxe das linguas estranxeiras nos colexios de educación infantil e primaria e nos institutos de educación secundaria.
A experiencia demostra que a estadía nos países dos que se estudia a lingua constitúe un medio moi eficaz de progreso na adquisición desa lingua e da súa cultura.
Dado que a colaboración con centros educativos doutros países resulta fundamental como medio eficaz de facilita-lo desenvolvemento de capacidades do alumnado a nivel lingüístico e profesional e que as axudas económicas procedentes de programas da Unión Europea resultan insuficientes para atende-la forte demanda dos centros da nosa Comunidade Autónoma, a Consellería de Educación convoca axudas para a realización de intercambios e estadías co fin de posibilitar que, tanto os centros de educación primaria como os de educación secundaria e os que imparten ensinanzas de réxime especial, poidan organizar programas de inmersión, máis breves no caso da educación primaria, para que ó longo da súa escolaridade o alumnado chegue a alcanzar un nivel de competencia comunicativa adecuado en varias linguas.
En consecuencia co anteriormente exposto, esta consellería
DISPÓN:
Primeiro.-Obxecto da convocatoria.
Convócanse axudas dirixidas a alumnos e profesores de centros docentes da Comunidade Autónoma de Galicia, sostidos con fondos públicos, que participen en estadías e intercambios de alumnos con centros educativos doutros países, para a aprendizaxe activa de linguas durante o ano 2002.
As axudas concederanse con cargo á partida orzamentaria 07.04.322T.480.0 por importe total máximo de 450.759 euros.
O gasto que se proxecta está condicionado á existencia do crédito adecuado e suficiente nos orzamentos do exercicio do ano 2002, en trámite parlamentario.
Segundo.-Destinatarios.
1. Poderán solicitar estas axudas os alumnos e profesores a través dos centros que se indican: colexios de educación infantil e primaria; colexios de educación primaria; centros públicos integrados; institutos de educación secundaria; escolas oficiais de idiomas; instituto galego de bacharelato a distancia e centros colaboradores; conservatorios de música; escolas de artes, centros privados concertados e centros de educación permanente de adultos.
2. Os solicitantes das axudas de intercambios de profesores reguladas no artigo terceiro desta orde, deberán estar en situación de servicio activo en centros dependentes da Consellería de Educación e Ordenación Universitaria na actualidade e durante o curso para o que se solicita a actividade así como ter tres anos de antigüidade como funcionario de carreira nos corpos de primaria, de secundaria, de escolas oficiais de idiomas, de profesores de música e artes escénicas, de catedráticos de música e artes escénicas, de profesores de artes plásticas e deseño ou de catedráticos de artes plásticas e deseño.
Terceiro.-Modalidades das axudas.
1. Visitas preparatorias do profesorado responsable da estadía de alumnos no centro receptor doutro país, co obxecto de facilita-los acordos de colaboración entre os centros e a preparación axeitada do proxecto.
2. Visitas de estudio do profesorado responsable de proxectos co fin de garanti-la súa continuidade do mesmo
3. Intercambios de profesores co obxecto de mellora-lo coñecemento dunha lingua estranxeira impartindo a materia da súa especialidade. Os solicitantes galegos compartirán o seu posto cun docente estranxeiro de xeito consecutivo.
4. Proxectos de aprendizaxe activa de linguas a través de estadías de alumnos en centros educativos estranxeiros, intercambios bilaterais centro a centro ou encontros multilaterais de distintos grupos de alumnos nun país estranxeiro, que teñan como obxectivo o aumento da motivación dos estudiantes no que respecta á aprendizaxe dunha lingua estranxeira e á súa utilización como medio de comunicación.
Cuarto.-Requisitos.
1. Estas actividades deberán estar integradas na programación do curso e ser aprobadas polo consello escolar. O seu obxectivo básico será o intercambio cultural, o achegamento lingüístico e o perfeccionamento profesional e poderán solicitarse sempre que o centro non teña ningunha axuda concedida para o mesmo proxecto de aprendizaxe de linguas, na convocatoria de intercambios do Ministerio de Educación, Cultura e Deportes, na acción Comenius 1.2 (proxectos lingüísticos), ou noutras convocatorias similares. No caso de obter dúas axudas para o mesmo proxecto deberán renunciar a unha delas.
2. As visitas preparatorias e de estudio contarán cunha axuda variable en función do país, e serán realizadas por un só profesor de cada centro educativo. A Dirección Xeral de Ordenación Educativa e Formación Profesional poderá autoriza-la participación doutro profesor en casos excepcionais e que estean debidamente xustificados.
3. Os proxectos de aprendizaxe activa de linguas comprenderán as actividades realizadas ó longo do curso, que culminarán na viaxe dos alumnos. As viaxes deberán ter unha duración non inferior a dez días.
4. As axudas máximas por alumno/profesor en concepto de reintegro de gastos de transporte, mantenza e aloxamento en función de se é un intercambio, unha visita preparatoria ou un intercambio de profesores concederanse de acordo cos baremos que figuran no anexo II.
5. Na valoración das solicitudes daráselles prioridade ós proxectos que contemplen a realización de actividades lectivas conxuntas durante o desenvolvemento do proxecto, como actividades específicas de aprendizaxe da lingua do país que se visita, a participación no plan experimental de potenciación de linguas estranxeiras nos institutos de educación secundaria, no plan da anticipación da primeira lingua estranxeira en educación infantil e primaria, nas seccións europeas, no programa That's English así como nas accións Comenius 1 e Grundtvig 2 do programa Sócrates.
6. Os proxectos de aprendizaxe activa de linguas deberán contar cun número mínimo de dez alumnos, que estarán acompañados durante a viaxe e a estadía por dous profesores do centro, podendo chegar a tres se o número de alumnos supera os trinta. Non obstante, a dirección xeral poderá autorizar, en casos excepcionais e debidamente xustificados, un número inferior de alumnos. Non poderán participar alumnos de educación infantil, e no caso de alumnos de educación primaria un dos profesores poderá ser substituído por un representante da asociación de pais de alumnos.
Quinto.
1. Convócanse tres períodos de presentación de solicitudes: o primeiro no prazo de vinte días hábiles contados a partir do día seguinte á publicación desta orde no Diario Oficial de Galicia, o segundo ata o 15 de maio e o terceiro ata o 1 de xullo. Reservarase un 50% do importe total das axudas para o primeiro prazo, un 30% para o segundo e un 20% para o terceiro, sendo acumulable o orzamento excedente de cada período para o seguinte.
2. As solicitudes seguirán o modelo establecido no anexo I desta orde e irán acompañadas da documentación que se indica a continuación:
2.1 Axudas para visitas preparatorias e de estudios.
-Orzamento da viaxe.
-Proposta de proxecto do centro galego, co visto e prace do director.
-Documento de aceptación do centro receptor.
-Certificación de ter ou non ter subvención ou axuda para a mesma finalidade procedente de calquera outra Administración ou ente público.
2.2. Axudas para intercambios de profesores.
-Orzamento da viaxe.
-Proposta de proxecto do centro galego, cun certificado do director de que a actividade está recollida na programación do centro e está autorizada polo consello escolar, que incluirá as actividades que se desenvolverán no propio centro, así como as que se realizarán no centro receptor.
-Autorización da Inspección Educativa.
-Calendario dos intercambios. Os intercambios deberán realizarse no centro receptor, por parte dos solicitantes, durante períodos non lectivos en Galicia.
-Documento de aceptación do centro receptor.
-Compromiso de subscribir unha póliza de seguros.
-Certificación de ter ou non ter subvención ou axuda para a mesma finalidade procedente de calquera outra Administración ou ente público.
2.3. Axudas para viaxes de alumnos para a aprendizaxe de lingua estranxeira:
-Proxecto pedagóxico da viaxe, que incluirá os obxectivos e as actividades de aprendizaxe realizadas durante o curso no propio centro, así como as actividades que se realizarán no centro receptor. Estas deberán estar relacionadas co traballo desenvolvido polos alumnos durante o curso escolar, das que se achegarán mostras xunto coa documentación. As ditas mostras poderanse presentar en soporte fotográfico ou vídeo.
-Certificado do director de que a actividade está recollida na programación do centro e está autorizada polo consello escolar.
-Declaración xurada do director na que se fará consta-la contratación dunha póliza de seguros que cubra o desprazamento e a estadía dos alumnos no estranxeiro.
-Autorización do pai, nai ou titor legal para a participación do alumno nesta actividade. A autorización será solicitada polo director e quedará en poder do centro.
-Modalidade de aloxamento e tipo de transporte que se utilizará.
-Calendario da viaxe indicando as datas de saída e chegada do grupo.
-Nome dos profesores acompañantes na viaxe, materias que imparten e situación administrativa que teñan no centro con indicación de ser ou non coordinador do proxecto
-Listaxes dos alumnos participantes no intercambio, con indicación do seu curso.
-Orzamento detallado dos gastos por conceptos con indicación dos derivados do aloxamento, segundo as modalidades de acollida, do transporte ó país que se visita, así como doutros gastos previstos. Deberase indica-lo custo global por alumno e o custo global por grupo.
-Documento de aceptación do centro receptor.
-Certificación de ter ou non ter subvención ou axuda para a mesma finalidade procedente de calquera outra Administración ou ente público.
Sexto.-Presentación de solicitudes.
As solicitudes asinadas polo director do centro dirixiranse á Dirección Xeral de Ordenación Educativa e Formación Profesional, Consellería de Educación e Ordenación Universitaria (San Lázaro 107, 15771 Santiago de Compostela), presentándose a través do rexistro xeral. Tamén poderán utilizarse para a presentación de solicitudes calquera das dependencias previstas no artigo 38.4º da Lei 30/1992 do 26 de novembro, de réxime xurídico das administracións públicas e do procedemento administrativo común, modificada pola Lei 4/1999 do 13 de xaneiro. No caso de que optasen por presenta-la súa solicitude nunha oficina de correos, farano en sobre aberto para que a instancia sexa datada
e selada polo funcionario de correos antes de ser certificada.
De acordo co establecido no artigo 71 da citada Lei de réxime xurídico das administracións públicas e do procedemento administrativo común, aquelas solicitudes que non presenten os requisitos sinalados, requirirase o interesado para que nun prazo de dez días emende as faltas ou presente os documentos preceptivos; de non o facer considerarase que desistiu da súa petición e arquivarase o expediente.
Sétimo.-Comisión de selección e criterios de valoración dos proxectos.
As solicitudes serán avaliadas por unha comisión de selección integrada polos seguintes membros:
Presidenta: a subdirectora xeral de Formación Profesional e Educación de Adultos ou persoa na que delegue.
Vocais: o xefe do Servicio de Educación de Adultos e Xestión Económica, o xefe do Servicio de Formación do Profesorado, o xefe do Servicio de Ordenación e Innovación Educativa e un inspector educativo ou persoas nas que deleguen.
Secretario/a: un/unha funcionario/a da subdirección xeral de Formación Profesional e de Educación de Adultos.
A comisión reunirase en tres ocasións durante o ano e seleccionará os proxectos tendo en conta os seguintes criterios:
a) Non ter recibido esta axuda, para a mesma modalidade, en anteriores convocatorias.
b) A calidade do proxecto pedagóxico e a súa realización co máximo de aproveitamento, así como a metodoloxía empregada
c) Centros situados en zonas rurais ou desfavorecidas.
d) Ter solicitada e non concedida axuda Comenius 1.2 (proxectos lingüísticos), ou Leonardo para a mesma actividade, sempre que cumpra os requisitos de calidade do proxecto.
e) A acollida familiar como modalidade de aloxamento, no caso dos intercambios de alumnos.
A comisión de selección elaborará a proposta de adxudicación de subvencións e elevaraa ó Conselleiro de Educación e Ordenación Universitaria, que resolverá o que proceda.
Oitavo.-Comunicación.
A concesión ou denegación do reintegro seralle notificada directamente ó centro escolar pola Dirección Xeral de Ordenación Educativa e Formación Profesional. Contra esta resolución os interesados poderán interpoñer recurso potestativo de reposición perante o conselleiro de Educación e Ordenación Universitaria no prazo dun mes contado a partir do día seguinte ó da recepción da notificación, de acordo co disposto nos artigos 116 e 117 da Lei 30/1992, de réxime xurídico das administracións públicas e do procedemento administrativo común, ou ben directamente o recurso contencioso-administrativo no prazo de dous meses perante o Tribunal Superior de Xustiza de Galicia.
De acordo co establecido no artigo 78.5º do Decreto lexislativo 1/1999, do 7 de outubro, polo que se aproba o texto refundido da Lei 11/1992, do 7 de outubro, de réxime financeiro e orzamentario de Galicia, os centros docentes sostidos con fondos públicos considéranse entidades colaboradoras para a entrega e distribución das axudas concedidas ós beneficiarios, debendo someterse ás obrigas recollidas no citado artigo.
As solicitudes entenderanse denegadas de non dictarse resolución expresa no prazo de seis meses contado desde o día seguinte ó da publicación da convocatoria no Diario Oficial de Galicia.
Noveno.-Prazos dos pagamentos.
Para as axudas que non superen o importe de 6.000 euros, no momento da concesión poderá acordarse un anticipo de pagamento de ata un 80%, logo de aceptación da subvención. O 20% restante librarase unha vez finalizada e xustificada a actividade. Nas axudas que superen esta cantidade o pagamento realizarase integramente unha vez rematada e xustificada a actividade.
Décimo.-Xustificación da actividade.
Logo de efectuada a viaxe, o centro docente, como entidade colaboradora da xestión de axudas públicas, deberá, de acordo co establecido no artigo 15 do Decreto 287/2000, do 21 de novembro, tramita-la seguinte documentación, no prazo máximo dun mes:
a) Certificación do consello escolar aprobatoria das contas, xuntando unha relación dos gastos efectuados asinada polo director do centro. As facturas orixinais dos referidos gastos arquivaranse no centro docente para a súa custodia e para a posta en disposición, se é o caso, dos órganos de control que teñan atribuídas as funcións de comprobación e control da aplicación deses fondos.
b) Xustificación da totalidade do custo da viaxe de acordo cos datos indicados no orzamento inicial. O importe da subvención nunca poderá superar illadamente ou en concorrencia con subvencións ou axudas doutras administracións públicas ou doutros entes públicos ou privados, nacionais ou internacionais, o custo da actividade que vai desenvolve-lo beneficiario ou, se é o caso, a porcentaxe máxima do investimento subvencionable que legalmente se estableza.
c) Memoria do traballo realizado durante a estadía no país de acollida, que deberá ser presentada un mes despois do remate da actividade.
A memoria incluirá os seguintes puntos:
-Descrición de tódalas actividades desenvolvidas.
-Descrición e achega do traballo elaborado.
-Incidencia do proxecto na mellora das capacidades lingüísticas dos alumnos, ou profesores, se é o caso, na lingua estranxeira utilizada.
-Lista dos alumnos participantes.
Será preciso presentar, xunto coa memoria pedagóxica, unha certificación expedida polo director do centro esco
lar, especificando o nome do proxecto, lista dos profesores, así como os seus DNI e o papel desenvolvido nel. O modelo de certificacións atópase na seguinte páxina web: http://www.xunta.es/conselle/ceoug/dxoefp/europa.
d) Os proxectos e traballos realizados polos centros seleccionados quedarán en poder da Dirección Xeral de Ordenación Educativa e Formación Profesional, que reserva para si o dereito de difundi-los traballos realizados en función da súa orixinalidade e pasando a formar parte dos fondos documentais da Consellería de Educación e Ordenación Universitaria.
e) Certificación de ter ou non ter subvención ou axuda para a mesma finalidade procedente de calquera outra Administración ou ente público.
Décimo primeiro.-Modificación da resolución de concesión das axudas.
A non xustificación da axuda percibida conforme o disposto nesta orde, levará consigo o reintegro das cantidades non xustificadas de acordo co establecido nos artigos 19º e 20º do Decreto 287/2000, do 21 de novembro, polo que se desenvolve o réxime de axudas públicas da Comunidade Autónoma de Galicia.
Calquera alteración das condicións tidas en conta para a concesión das axudas e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución da concesión.
Décimo segundo.-Recoñecemento das actividades realizadas.
1.As actividades de intercambio terán a consideración de actividade de formación permanente ó amparo do punto 28.1º da Orde do 3 de outubro de 2001 (DOG do 10 de setembro) pola que se regula a convocatoria, recoñecemento, certificación e rexistro das actividades de formación permanente do profesorado e se establecen as equivalencias das actividades de investigacións e das titulacións. A Dirección Xeral de Ordenación Educativa e Formación Profesional expedirá a certificación correspondente ó profesorado participante unha vez presentada a memoria correspondente e recibido o informe favorable.
2. A valoración en horas de formación será a seguinte:
Funcións de coordinación do intercambio: ata 50 horas.
Funcións de colaboración no intercambio: ata 35 horas.
Disposicións derradeiras
Primeira.-Autorízase a Dirección Xeral de Ordenación Educativa e Formación Profesional para dicta-las disposicións necesarias no desenvolvemento desta orde.
Segunda.-A presente orde entrará en vigor o día seguinte ó da súa publicación no DOG.
Santiago de Compostela, 7 de marzo de 2002.
Celso Currás Fernández
Conselleiro de Educación e Ordenación Universitaria
