A Orde da Consellería de Familia e Promoción do Emprego, Muller e Xuventude do 8 de febreiro de 1999 (DOG nº 30, do 15 de febreiro) modificada pola Orde do 25 de xaneiro de 2000 (DOG nº 20, do 31 de xaneiro), establece o procedemento para o aboamento de cotas á Seguridade Social a traballadores que percibisen a prestación de desemprego na súa modalidade de pagamento único, previndo na súa disposición adicional cuarta que anualmente se determine o seu financiamento.

As bases reguladoras do dito procedemento axústanse ó disposto no artigo 78 do texto refundido da Lei de réxime financeiro e orzamentario de Galicia, e no Decreto 287/2000, do 21 de novembro, no relativo ós principios de obxectividade, concorrencia e publicidade na concesión de axudas públicas.

O financiamento do aboamento de cotas á Seguridade Social a traballadores que percibisen a prestación de desemprego na súa modalidade de pagamento único realizarase con cargo á aplicación orzamentaria 14.04.241A.483.0, cun crédito de 150.253 euros, cantidade prorrogada polo Decreto 401/2001, de 28 de decembro, polo que se regula a prórroga dos orzamentos xerais da Comunidade Autónoma de Galicia do ano 2001, para o exercicio 2002; e sen prexuízo da posible ampliación futura do crédito unha vez aprobados os orzamentos xerais da Comunidade Autónoma de Galicia para o ano 2002.

O dito crédito poderá ser obxecto de modificacións como consecuencia da asignación ou da redistribución de fondos para o financiamento dos programas de fomento do emprego, coas limitacións que estableza a Conferencia Sectorial de Asuntos Laborais ou as disposicións aplicables ás axudas cofinanciadas polo Fondo Social Europeo.

Publícanse os modelos normalizados de solicitude, ós que se lles engade como anexo III o modelo de declaración expresa doutras axudas.

Así mesmo, apróbase para o exercicio 2002 a delegación de atribucións previstas no artigo 5 da Orde do 8 de febreiro de 1999, modificada pola Orde do 25 de xaneiro de 2000.

Polo exposto, consultado o Consello Galego de Relacións Laborais, e no exercicio das facultades que me confire o artigo 34 da Lei 1/1983, do 22 de febreiro, reguladora da Xunta e do seu presidente,

DISPOÑO:

Artigo 1º

O procedemento de aboamento de cotas á Seguridade Social a traballadores que percibiran a prestación por desemprego na súa modalidade de pagamento único, rexerase polo previsto na orde da Consellería de Fami

lia e Promoción do Emprego, Muller e Xuventude do 8 de febreiro de 1999 (DOG nº 30, do 15 de febreiro), modificada pola Orde do 25 de xaneiro de 2000 (DOG nº 20, do 31 de xaneiro).

As solicitudes deberán presentarse no modelo normalizado que figura como anexo desta orde.

Artigo 2º

No exercicio 2002, o financiamento do aboamento de cotas á Seguridade Social ós perceptores da prestación por desemprego na súa modalidade de pagamento único realizarase con cargo ós créditos da aplicación orzamentaria 14.04.241A.483.0.

Disposicións adicionais

Primeira.-Apróbase a delegación de atribucións da conselleira de Familia e Promoción do Emprego, Muller e Xuventude nos delegados/as provinciais, no ámbito das súas respectivas provincias, para resolve-la concesión ou denegación do aboamento de cotas á Seguridade Social previsto no artigo 5 da Orde do 8 de febreiro de 1999, modificada pola Orde do 25 de xaneiro de 2000, así como para autoriza-los gastos e ordena-los correspondentes pagamentos.

Segunda.-A percepción do aboamento de cotas previsto na presente orde non poderá ser, en ningún caso, de tal contía que, illadamente ou en concorrencia coas concedidas por outras administracións ou entes públicos ou privados nacionais ou internacionais, supere o custo total da cotización á Seguridade Social satisfeita polo interesado.

Terceira.-As solicitudes de aboamento de cotas presentadas no exercicio anterior que non puideran ser atendidas por falta de dispoñibilidades orzamentarias, e sempre que reunisen os requisitos e observasen os prazos establecidos na súa normativa reguladora, poderán ser atendidas con cargo ós créditos orzamentarios destinados para o dito fin para o ano 2002.

Cuarta.-A concesión das axudas previstas nesta orde estará suxeita á existencia de crédito orzamentario e terá como límite global o crédito asignado na aplicación 14.04.241A.483.0 que figura na prórroga dos orzamentos xerais da Comunidade Autónoma de Galicia do ano 2001 para o exercicio 2002, fixado na exposición de motivos desta disposición; e sen prexuízo da posible ampliación futura do crédito unha vez aprobados os orzamentos xerais da Comunidade Autónoma de Galicia para o ano 2002.

Disposicións derradeiras

Primeira.-Facúltase o director xeral de Fomento do Emprego para que dicte, no ámbito das súas competencias, as resolucións e aclaracións necesarias para o desenvolvemento e cumprimento desta orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 6 de marzo de 2002.

Manuela López Besteiro

Conselleira de Familia e Promoción do Emprego,

Muller e Xuventude