Dentro do Plan de actividades da Escola Galega de Administración Pública para o 2002 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas xornadas sobre eficacia administrativa e análise económica do dereito, convocatoria que se desenvolverá conforme as seguintes bases:
1. Obxectivos.
Os imperativos de eficacia e eficiencia na actuación administrativa provocaron a introducción de métodos económicos na análise e na aplicación do dereito público. A influencia crecente deste método afecta tanto a producción das normas administrativas coma os plans de modernización da Administración e incluso as propias resolucións xudiciais. O estudio polo miúdo desta temática constitúe o obxectivo das xornadas, dirixidas principalmente a tódalas autoridades, funcionarios e operadores xurídicos implicados na producción, interpretación e aplicación das normas e dos actos administrativos, para unha axeitada conciliación da eficacia e economía co principio de legalidade.
2. Contido.
Trataranse estes temas:
-Principio constitucional de eficacia e legalidade administrativa.
-A construcción teórica da análise económica do dereito.
-A producción das normas administrativas.
-A linguaxe das normas: claridade, economía e seguridade xurídica.
-Principios, estratexias e técnicas para unha actuación administrativa eficaz.
-Análise económica do dereito e resolucións xudiciais.
-Discrecionalidade administrativa e dereito á tutela xudicial efectiva.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos do edificio administrativo da Xunta de Galicia en Vigo (praza da Estrela-Concepción Arenal, nº 8, da citada cidade) os días 20 e 21 de marzo de 2002.
5. Inscrición.
-Prazo: remata o venres, día 15 de marzo de 2002.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 18 de marzo, de 8.30 a 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 28 de febreiro de 2002.
Domingo Bello Janeiro
Director da Escola Galega de Administración Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA