En cumprimento do establecido nos artigos 18 e 19 da Lei 1/2000, do 10 de xullo, pola que se refunde a normativa en materia de cámaras agrarias, cómpre designa-los membros integrantes das xuntas intervenientes nas eleccións a cámaras agrarias.
En consecuencia, en virtude das facultades que teño conferidas pola Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro, e en aplicación do disposto nos artigos 18 e 19 da Lei 1/2000, do 10 de xullo, pola que se refunde a normativa en materia de cámaras agrarias, e logo de verificarse a proposta das organizacións profesionais agrarias nos termos establecidos no punto 2 da disposición transitoria primeira da dita lei,
DISPOÑO:
Artigo 1º
Esta orde ten por obxecto facer pública a designación dos membros integrantes da xunta electoral galega e das xuntas electorais provinciais para as eleccións a cámaras agrarias.
Artigo 2º
A composición das xuntas intervenientes no proceso electoral para as eleccións a cámaras agrarias será a seguinte:
Xunta electoral galega:
-Presidente, vicepresidente e secretario: serán, respectivamente, o secretario xeral, o director xeral de Infraestructuras Agrarias e a asesora xurídica desta consellería, de conformidade co disposto no artigo 18.1º a), b) e c) da Lei 1/2000.
-Vocais:
* Funcionarios da Comunidade Autónoma pertencentes ó corpo superior da Administración da Xunta de Galicia, licenciados en dereito: Asunción Martín Azpiazu e José Antonio Martínez Carro.
* Xuristas de recoñecido prestixio designados por proposta unánime das organizacións profesionais agrarias: Antonio Martínez Puñal, Pedro González Boquete, Miguel Ángel Lamela Méndez e Isabel Manzano Maceira.
Xuntas electorais provinciais:
-Presidentes, vicepresidentes e secretarios: serán, respectivamente, o delegado provincial, o secretario e o xefe do Servicio Técnico-Xurídico da correspondente delegación desta consellería, de conformidade co disposto no artigo 19.1º a), b) e c) da Lei 1/2000.
-Vocais: xuristas designados por proposta unánime das organizacións profesionais agrarias.
* Da xunta electoral provincial da Coruña: Pedro Pedreira Candal e Mª Jesús González Paradela.
* Da xunta electoral provincial de Lugo: Carlos Somoza López e Xosé Manuel Fernández Varela.
* Da xunta electoral provincial de Ourense: Miguel Anxo González Trigas e Luis Guillermo Álvarez Porto.
* Da xunta electoral provincial de Pontevedra: Ramón González Vinagre e Patricia Rivas Villa.
Disposición derrogatoria
Queda derrogada a Orde do 2 de novembro de 2000 pola que se fai pública a designación dos membros integrantes das xuntas intervenientes nas eleccións a cámaras agrarias.
Disposicións derradeiras
Primeira.-A xunta electoral galega e as xuntas electorais provinciais deberán constituírse formalmente no prazo de dez días desde a entrada en vigor desta orde.
Segunda.-Facúltase o secretario xeral da consellería para dictar cantas disposicións fosen precisas para o desenvolvemento desta orde.
Terceira.-Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 27 de febreiro de 2002.
Juan Miguel Diz Guedes
Conselleiro de Política Agroalimentaria
e Desenvolvemento Rural
