En cumprimento do disposto no artigo 28 do regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto no artigo 60.1º da Lei 30/1992, do 26 de novembro, de réxime xurídico
das administracións públicas e do procedemento administrativo común, faise constar que:
O Xurado Provincial de Clasificación de Montes Veciñais en Man Común de Pontevedra dictou a seguinte resolución:
Asistentes:
Presidente: José Luis Díez Yáñez (delegado provincial da Consellería de Medio Ambiente).
Vocais:
Mª Luisa Pardavila Pazos (avogada polo colexio da provincia).
Teodoro Arribas Serrano (xefe do Servicio de Montes e Industrias Forestais).
Vocais representantes da parroquia da Xesta do concello de Lalín:
Luis González Blanco.
Daniel Fernández Fernández.
Secretaria: Mª José León Gómez (xefa do Servicio Técnico-Xurídico da delegación de Medio Ambiente).
Na cidade de Pontevedra, sendo as dezasete horas do día 12 de decembro de 2001, coa asistencia das persoas á marxe indicadas, e escusando a súa asistencia o vocal Luis Mª Muíños Vidueira (letrado da Asesoría Xurídica da Xunta de Galicia), reúnese na 3ª planta do edificio sito no nº 47 da rúa Benito Corbal o Xurado Provincial de Clasificación de Montes Veciñais en Man Común co obxecto de decidir sobre a clasificación dos montes Pecoazo e outros, da parroquia da Xesta do concello de Lalín.
Antecedentes de feito.
Primeiro.-Por Luis González Blanco solicitou en data 24-6-1996 a iniciación dos trámites para a clasificación como veciñais en man común dos montes Pecoazo e outros, da parroquia da Xesta do concello de Lalín.
Segundo.-O Xurado Provincial de Clasificación de Montes Veciñais na súa reunión de data 13-10-1999 acordou inicia-los trámites para a clasificación, así como a remisión do expediente ó Servicio de Montes e Industrias Forestais, co obxecto de elabora-lo informe preceptivo.
Terceiro.-Por acordo do xurado na reunión celebrada en data 19-10-2000 noméase relator a Teodoro Arribas Serrano.
Cuarto.-Cumprida e observada a tramitación legal e regulamentariamente esixida, procede a apertura do trámite de audiencia, non formulándose oposición e facéndose a correspondente anotación preventiva no Rexistro da Propiedade de Lalín.
Así mesmo, en data 16-11-2001, José López López formula as alegacións que estimou oportunas.
Quinto.-O instructor do expediente, Teodoro Arribas Serrano, expón a súa proposta, manifestando que os montes Costa da Fervenza, Penouzas, Lavagueira, Lúa ou Val de Laborea, monte dos Croios, Picouzo, A Silva, A Carpaceira e Abaixo dos Campos, dos
que se solicita a clasificación, obedecen á seguinte descrición:
Nome do monte: Costa da Fervenza.
Cabida: 10,51 ha aproximadamente.
Estremas:
Norte: partindo da divisoria de augas dirísexe cara ó sureste en aliñación recta a uns 50 metros ó norte da valgada que descende cara ó río Asneiro seguindo estremas con predios particulares de veciños de Torguedo, da parroquia de Catasós, e rematando nas proximidades da canle do río Asneiro.
Leste: desde o punto anterior e en dirección suroeste, augas arriba do río Asneiro, segue as estremas de leiras particulares ata o cruzamento coa pista que une Pontenofe e Fervenza coa estrada N-525.
Sur: seguindo a liña de máxima pendente en sentido ascendente ata alcanza-la divisoria de augas.
Oeste: desde o punto anterior segue a divisoria de augas ata pecha-lo perímetro co punto de partida na estrema norte.
Servidumes: a parcela está atravesada en toda a súa lonxitude pola pista que une Pontenofe e Fervenza coa estrada N-525.
Estremeiros:
Norte: Mercedes Ferreiro Jacome, Elisa Alvarellos Villar, Avelina e José Reboredo García e outros.
Sur: Antonio Rodríguez Fernández, María Juana García Ferradás, Ramona García Ferradás e outros.
Leste: Camilo Canda Novoa, María Amparo Quiroga, hros. de José Reboredo García e outros.
Oeste: Antonio García Amorín, José Luis Puga Iglesias, José Villar Reboredo e outros.
Descrición: por riba da pista anteriormente citada a parcela aparece cuberta por un rexenerado de piñeiro sobre queirogas, con rasos abondosos. Por debaixo da pista a masa arbórea está formada por unha mestura de carballo, bidueiro e rexenerado de piñeiro.
Próponse a súa clasificación por reuni-los requisitos establecidos no artigo 1 da Lei 13/1989, do 10 de outubro, de montes veciñais en man común.
Nome do monte: Penouzas.
Cabida: 23,94 ha aproximadamente.
Estremas:
Norte: valado por medio que estrema con propiedade particular do Pazo da Xesta ata unirse co camiño ó monte dos Croios seguindo este ata a súa intersección co camiño que se dirixe cara Puxallos.
Leste: desde a intersección anterior, segue o camiño que une este co monte dos Croios coa pista que une Puxallos coa estrada de Ourense, ata unhas rochas sobre a zarra de Pazo, desde alí bordeando leiras privadas segue ata alcanza-lo cruzamento de camiños do que parte o que desde Puxallos se dirixe á estrada PO-202.
Sur: desde o punto anterior segue estremas de predios privados ata alcanzar valado que estrema coa granxa de Lagorzos, seguindo este valado ata o camiño que une esta granxa con Puxallos.
Oeste: desde o punto anterior dirísexe cara ó norte, seguindo o valado que separa prados, pista e estremas con predios particulares sinalados cun suco, ata o valado que separa a leira Lagorzos, desde alí ata o peche coa estrema norte.
Servidumes: a parcela está atravesada por varios camiños que, partindo do cruzamento situado na unión dos límites leste e sur, se dirixen a Seixas, á granxa de Lagorzos, á estrada PO-202 Lalín-Carballo e á ponte de Pontenofe. Así mesmo, aparece atravesada por un tendido eléctrico. No sur da parcela, coincidindo coas cotas máis altas dela atópase un xacigo arqueolóxico, dintinguíndose varias mámoas sobre o terreo.
Estremeiros:
Norte: herdeiros de José Reboredo López, José Lalín Pichel e esposa, Avelino Villamarín Valdonado e outros.
Oeste: Jesús Munín Ferrada, Ramón Gónzalez Jácome, José Iglesias Fernández e outros.
Sur: José Alvarellos Iglesias, Consuelo Alvarellos, María Josefa Alvarellos Villar e outros.
Leste: Pedro González Jácome, Andrés García Rodríguez, Camilo González Bodario e outros.
Descrición: matorreira de toxo e queiroga, observándose rexenerado ocasional de piñeiro e bidueiros nas zonas máis baixas, signos de pastoreo e afloramentos rochosos.
Próponse a súa clasificación por reuni-los requisitos establecidos no artigo 1 da Lei 13/1989, do 10 de outubro, de montes veciñais en man común.
Nome do monte: Lavagueira.
Cabida: 9, 97 ha aproximadamente.
Estremas:
Norte: pista que une Puxallos coa estrada PO-202 Lalín-Carballo.
Leste: propiedades particulares, valado por medio, ata cruzamento con camiño de Lavagueira de Abaixo.
Sur: sepárase do camiño de Lavagueira de Abaixo seguindo valado que separa de leiras particulares, descendendo ata as proximidades do río Seixas afastándose de novo del seguindo estrema con prados.
Oeste: segue valado de separación con leiras particulares, cruzando o tendido de ferrocarril Santiago de Compostela-Ourense a uns 60 m da boca sur do túnel, ata o cruzamento co camiño de Lavagueira de Abaixo. Desde alí segue valado de separación con leiras particulares ata cruzamento coa pista que une Puxallos coa estrada PO-202 Lalín-Carballo.
Servidumes: a leira está atravesada por camiño de Lavagueira de Abaixo con ramais que, partindo del, se dirixen ó Muíño do Ferrador e ó campo de fútbol. Vía e boca de túnel do ferrocarril Santiago de Compostela-Ourense.
Estremeiros:
Norte: pista que une Puxallos coa estrada PO-202 Lalín-Carballo.
Leste: Consuelo Ojea Gómez, Germán Ojea Gómez, Dosinda Ojea Gómez e outros.
Sur: José Senra García, Manuel Lalín Cibeira, José Varela García e outros.
Oeste: José Froiz Novoa, vía ferrocarril Santiago-Ourense, Amelia Gil González e outros.
Descrición: realizouse unha nivelación na parte máis alta da parcela destinada a instalación do campo de fútbol da Xesta. O resto da parcela está cuberta por abondoso rexenerado de piñeiro, con algunhas zonas con pés malformados, resto dunha corta realizada o último ano.
Proponse a súa clasificación por reuni-los requisitos establecidos no artigo 1 da Lei 13/1989, do 10 de outubro, de montes veciñais en man común.
Nome do monte: Lúa ou Val de Laborea.
Cabida: 3,262 ha aproximadamente.
Estremas: o camiño de Picouzo de Arriba divide en dúas esta parcela deixando ó leste unha parte de forma triangular coñecida como Lúa, con estremas oeste e norte co citado camiño, leste con camiño veciñal de Puxallos e sur valado por medio, con leira privada.
A parte oeste ten as seguintes estremas:
Norte: valado de terra (torrón) por medio, con leiras particulares.
Leste: camiño de Picouzo de Arriba.
Sur: leiras particulares de veciños da Xesta en aliñación recta ata valado de pedra.
Oeste: valado de pedra por medio, leiras particulares.
Servidumes: a leira aparece dividida polo camiño de Picouzo de Arriba, que a atravesa de norte a sur.
Estremeiros:
Parte leste Lúa.
Norte: Basilisa Canda Novo, David Fariñas González, José Luis Puga Iglesias e outros.
Leste: camiño veciñal de Puxallos.
Sur: Benita Amorín Pascual, José González López, José Rodríguez González.
Oeste: camiño de Picouzo de Arriba.
Parte oeste, Val de Laborea.
Norte: María González.
Leste: camiño de Picouzo de Arriba.
Sur: José González Crespo e José Crespo Enríquez.
Oeste: Nicolás Roza Silva.
Descrición: ámbalas parcelas están en monte alto cubertas de matorreira de queiroga e xesta con abondoso rexenerado de piñeiro e carballo.
Proponse a súa clasificación por reuni-los requisitos establecidos no artigo 1 da Lei 13/1989, do 10 de outubro, de montes veciñais en man común.
Nome do monte: monte dos Croios.
Cabida: 5,9 ha aproximadamente.
Estremas:
Norte: partindo desde o camiño de Picouzo ata pista forestal, estrema valado por medio, con leiras particulares.
Leste: leiras particulares desde o punto último anterior ata pista forestal e masa de carballo.
Sur: valado por medio, con leiras particulares.
Oeste: leiras particulares.
Servidumes: a parcela está atravesada polo camiño de Picouzo e por varios ramais del.
Estremeiros:
Norte: Antonio Blanco, José Ferreiro e outros.
Leste: Remigio Reboredo Varela, hros. de Manuel Rodríguez Reboredo e outros.
Sur: Manuel H. Baleiro, Amadeo Fernández Hernández e outros.
Oeste: José Fernández Ferreiro, Manuel Reboredo González e outros.
Descrición: rexenerado de piñeiro e matorreira de queiroga e afloramentos rochosos.
Proponse a súa clasificación por reuni-los requisitos establecidos no artigo 1 da Lei 13/1989, do 10 de outubro, de montes veciñais en man común.
Nome do monte: Picouzo
Cabida: 5,70 ha aproximadamente.
Estremas:
Norte: regueiro de Valiño, camiño veciñal e particulares.
Leste: camiño veciñal e particulares.
Sur: Concello de Dozón.
Oeste: regueiro de Valiño e leiras particulares.
Servidumes: está atravesada por pistas de acceso a muíño e leiras particulares e por camiño veciñal.
Descrición: rexenerado de piñeiro e bidueiro, e formación de ribeira nas proximidades do río Seixas.
Proponse a súa clasificación por reuni-los requisitos establecidos no artigo 1 da Lei 13/1989, do 10 de outubro, de montes veciñais en man común,
e segrégase da petición aproximadamente 23,75 ha por pertenceren á parroquia de Sanguiñedo, concello de Dozón e non quedar demostrado o aproveitamento exclusivo polos veciños da parroquia da Xesta, concello de Lalín.
Nome do monte: Silva
Cabida: 5,98 ha aproximadamente.
Estremas:
Norte: separada por suco e torrón, predio particular ata río Seixas.
Leste: río Seixas.
Sur: monte das Seixas, leiras particulares valado por medio.
Oeste: regueiro ascendendo ata a estrema norte.
Servidumes: parcialmente percorrido por camiños de acceso a leiras estremeiras.
Estremeiros:
Norte: José González López, Ramona García.
Leste: río Seixas.
Sur: Fernando Varela, Eladio Presas Valín e outros.
Oeste: José González López e concello de Dozón.
Descrición: matorreira de queiroga e toxo, con escasa presencia de rexenerado de bidueiro e piñeiro. Vexetación de ribeira nas proximidades do río Seixas.
Proponse a non clasificación por pertencer á parroquia de Sanguiñedo, concello de Dozón e non quedar demostrado o aproveitamento exclusivo polos veciños da parroquia da Xesta do concello de Lalín.
Nome do monte: Carpaceira
Cabida: 4,62 ha aproximadamente.
Estremas:
Norte: seguindo liña de nivel, leiras particulares.
Leste: leiras particulares, valado por medio ata estrada de Seixas a PO-202.
Sur: estrada de Seixas a PO-202.
Oeste: leiras particulares, valado e suco-torrón por medio.
Servidumes: está atravesada por camiño que, partindo da estrada que une Seixas coa estrada PO-202, chega a Seixas. Depósito de augas de subministración a Seixas.
Estremeiros:
Norte: Ramona Cibeira González, Eladio Presas Valín e outros.
Leste: Concello de Dozón, Fernando Varela e outros.
Sur: Concello de Dozón.
Oeste: Ramona Cibeira González, hros. de José Lalín e outros.
Descrición: matorreira toxeira-queirogal, gando.
Proponse a non clasificación por pertencer á parroquia de Sanguiñedo, concello de Dozón e non quedar demostrado o aproveitamento exclusivo polos veciños da parroquia da Xesta do concello de Lalín.
Nome do monte: Abaixo dos Campos.
Cabida: 1,86 ha aproximadamente.
Estremas:
Norte: predios particulares, valado por medio.
Leste: predios particulares.
Sur: predios particulares, valado por medio.
Oeste: camiño veciñal de Navallo.
Servidumes: atravesada por camiños de servidume de Navallo. Parcialmente cultivada con cereal, autorizado polo común.
Estremeiros:
Norte: José Gónzalez López.
Leste: Manuel Lalín Paz.
Sur: José Iglesias Fernández, José González López.
Oeste: David Jácome Villar, Adelaida Gutiérrez Lalín e outros.
Descrición: matorreira de toxo, escasos carballos e cultivo de centeo.
Fundamentos de dereito.
1. O Xurado Provincial de Clasificación de Montes Veciñais en Man Común ten a competencia para coñece-los expedientes de clasificación dos montes que teñan tal carácter segundo o teor do establecido no artigo 9 da Lei 13/1989, do 10 de outubro, de montes veciñais en man común.
2. De conformidade co establecido no artigo 1 da Lei 13/1989, do 10 de outubro, de montes veciñais en man común, así como o artigo 1 do Decreto 260/1992, do 4 de setembro, cómpre entender por montes veciñais en man común «... os terreos radicados na Comunidade Autónoma de Galicia que, con independencia da súa orixe, as súas posibilidades productivas, o seu aproveitamento actual e a súa vocación agraria, pertenzan a agrupacións veciñais na súa cualidade de grupos sociais e non como entidades administrativas, e os veñan aproveitando consuetudinariamente en réxime de comunidade, sen asignación de cotas, os membros daquelas na súa condición de veciños».
Así, segundo abondosa xurisprudencia, o feito que xustifica a clasificación ou non como veciñal dun determinado monte, en vía administrativa, é a circunstancia de terse ou non demostrado o aproveitamento veciñal de feito do dito monte por parte dos veciños.
En consecuencia, vista a Lei galega 13/1989, do 10 de outubro, de montes veciñais en man común, e o seu regulamento aprobado polo Decreto 260/1992, do 4 de setembro, e demais preceptos legais e regulamentarios de xenérica e específica aplicación ó caso examinado, o instructor propón e, de maneira unánime, o xurado acorda:
1. Clasificar como veciñais en man común a favor dos veciños da parroquia da Xesta do concello de Lalín os montes Costa da Fervenza, Penouzas, Lavagueira, Lúa ou Val de Laborea, monte dos Croios, Picouzo e Abaixo dos Campos, por reuniren os requisitos establecidos no artigo 1 da Lei 13/1989, do 10 de outubro, de montes veciñais en man común, correspondéndose coa planimetría elaborada para o efecto polo Servicio de Montes e Industrias Forestais que forma parte inseparable desta resolución, e de acordo coa descrición, cabida e estremas sinaladas no antecedente de feito quinto.
2. Non clasificar como veciñais en man común os montes A Silva e Carpaceira por pertenceren á parroquia de Sanguiñedo do concello de Dozón e non quedar demostrado o aproveitamento exclusivo polos veciños da parroquia da Xesta do concello de Lalín.
Contra esta resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ó desta notificación, de acordo co disposto nos artigos 109 e 116 da Lei 30/1992, do 26 de novembro, de réxime xurídico das administracións públicas e do procedemento administrativo común, e nos artigos 8 e 46 da Lei 29/1998, do 13 de xullo, reguladora da xurisdicción contencioso-administrativa.
Pontevedra, 20 de decembro de 2001.
José Luis Díez Yáñez
Presidente do Xurado Provincial de Clasificación
de Montes Veciñais en Man Común de Pontevedra
