O Pleno do Concello de Vigo, en sesión do día 26 de novembro de 2001, adoptou o seguinte acordo:
Primeiro.-Desestimar, polas razóns expostas nos antecedentes do presente acordo, as alegacións formuladas por José Grille Cundis e Ángel Alonso Freiría e outros, con números de documento 171319 e 173059, respectivamente, presentadas durante o período de exposición pública do expediente.
Segundo.-Aprobar definitivamente o expediente do Plan Especial de Reforma Interior da unidade de actuación 3 Casás, situado no núcleo 07.03 Casás D. (expediente 5195/411), presentado pola entidade Construcciones Mopelo, S.L., conforme a documentación refundida, con data de visado do 31 de xullo de 2000, que inclúe agora o estudio económico-financeiro que consta na documentación anteriormente presentada con data de visado do COAG do 4
de maio de 1999, que se incorpora á devandita documentación refundida; documentación toda ela redactada polo arquitecto Antonio González Suárez-Llanos.
Terceiro.-A eficacia deste acto de aprobación definitiva queda condicionada á presentación ante esta Administración municipal de aval bancario por importe do 6% do custo consignado no estudio económico-financeiro para a implantación dos servicios e execución das obras de urbanización, dentro do prazo dun mes desde que se requira para isto o promotor, sen que proceda a publicación do acordo de aprobación definitiva en tanto tal garantía non se teña prestado.
Cuarto.-De conformidade cos artigos 25.3º e 68 do Regulamento de xestión urbanística e a alínea 3.2.3.5.b) in fine das normas urbanísticas do vixente PXOU de Vigo, a conservación das zonas verdes de nova creación polo plan especial corresponderá ós propietarios do polígono, que deberán constituírse en entidade de conservación.
Quinto.-Cumprida a condición sinalada no número 3, publíquese o presente acordo de aprobación definitiva no Diario Oficial de Galicia e no BOP. Así mesmo, publíquense neste último diario oficial provincial as ordenanzas deste plan especial.
Sexto.-Notifíquese o presente acordo ós interesados e, igualmente, comuníquese ó conselleiro de Política Territorial, Obras Públicas e Vivenda da Xunta de Galicia, con traslado dunha copia autenticada do expediente administrativo completo e dous exemplares do documento debidamente dilixenciado.
O que se publica para o xeral coñecemento e de conformidade co artigo 48.2º da Lei 1/1997, do 24 de marzo, do solo de Galicia, significando que a normativa e ordenanzas de aplicación serán publicadas íntegramente no BOP.
Contra o devandito acordo, que pon fin á vía administrativa, poderá interpoñerse recurso contencioso-administrativo ante o Tribunal Superior de Xustiza de Galicia no prazo de dous meses contados desde o día seguinte ó da publicación deste anuncio.
De conformidade co artigo 59.4º da Lei 30/1992, do 26 de novembro, de réxime xurídico das administracións públicas e do procedemento administrativo común, a medio do presente anuncio e publicación no taboleiro de edictos do concello, notifícase o acordo que nel se contén a tódolos propietarios que sexan descoñecidos, dos que se ignore o lugar da notificación ou ben cando, intentada esta, non se puidese practicar.
Vigo, 15 de xaneiro de 2002.
Lois Pérez Castrillo
Alcalde-presidente da Xerencia Municipal
de Urbanismo