O Pleno do Concello de Vigo, en sesión do día 28 de xaneiro de 2002, adoptou o seguinte acordo:
Primeiro.-Aprobar definitivamente o estudio de detalle da U.A. 8-Grades (San Miguel de Oia), promovido polas entidades mercantís Lanzamar, S.A. e Promociones Vital Vigo, S.L., na súa versión definitiva, redactado polos arquitectos José Luis Pereiro Alonso, Alberto Cameselle Lago, Borja Ramilo Méndez e Pedro de la Puente Crespo, visado polo COAG no 6-9-2001 e 25-9-2001 (expediente 4348/411).
Segundo.-Estimar parcialmente a alegación presentada durante o trámite de información pública por José Luis Milego Fernández, como presidente da Asociación de Veciños de San Miguel de Oia, no sentido e polos motivos que se recollen na parte expositiva deste acordo.
Terceiro.-O sistema de execución deste ámbito será o de compensación, regulado nos artigos 133 e ss. da Lei 1/1997, do 24 de marzo, do solo de Galicia.
Cuarto.-A propiedade do ámbito deberá asumi-lo mantemento dos novos espacios libres e verdes cedidos ó concello. A tal fin, os predios resultantes do proxecto de compensación quedarán afectos, na cota de participación correspondente, á carga real de conservación dos ditos espacios libres e zonas verdes de nova creación. Haberá tamén de constituírse unha entidade urbanística de conservación.
Quinto.-Notifíquese o contido íntegro deste acordo ás entidades promotoras, ó alegante e demais interesados polo mesmo, na forma legalmente prevista, coa advertencia de que contra el cabe interpoñer recurso contencioso-administrativo ante o Tribunal Superior de Xustiza de Galicia no prazo de dous meses. Publíquese este acordo no DOG e no BOP. Comuníqueselle á Consellería de Política Territorial, Obras Públicas e Vivenda da Xunta de Galicia nos termos regulados no artigo 48 da Lei 1/1997, do 24 de marzo, do solo de Galicia.
Contra o devandito acordo, que pon fin á vía administrativa, poderá interpoñerse recurso contencioso-administrativo no prazo de dous meses contados desde o día seguinte da publicación deste anuncio.
Así mesmo, o presente anuncio servirá de notificación nos termos previstos no artigo 59 da Lei de réxime xurídico das administracións públicas e
do procedemento administrativo común para todos aqueles propietarios que sexan descoñecidos, se ignore o lugar de notificación ou intentada esta non se puidese practicar.
Vigo, 8 de febreiro de 2002.
Lois Pérez Castrillo
Alcalde-presidente da Xerencia Municipal
de Urbanismo