O Decreto 198/1994, do 16 de xuño, establecía a estructura orgánica da consellería, para adaptala ás esixencias dos decretos 287 e 291/1993, do 10 e 11 de decembro respectivamente, relativos á estructura orgánica dos departamentos da Xunta de Galicia. Este decreto de estructura foi obxecto de dúas importantes modificacións; a primeira, operada por Decreto 48/1998, do 5 de febreiro (DOG nº 33, do 18 de febreiro), como consecuencia do Decreto 351/1997, do 10 de decembro, polo que se fixou a estructura orgánica dos departamentos da Xunta de Galicia; e a segunda polo Decreto 69/2001, do 22 de marzo (DOG nº 68, do 5 de abril), que modificou o Decreto 48/1998 co obxecto de crear unha nova subdirección xeral na Dirección Xeral de Servicios Sociais, e reestructura-las funcións da Subdirección Xeral de Acción Social.

A nova estructura orgánica da Xunta de Galicia, establecida polo Decreto 306/2001, do 15 de decembro (DOG nº 242, do 17 de decembro), contempla separadamente a Consellería de Sanidade e á Consellería de Servicios Sociais, sendo ésta última de nova creación.

Posteriormente, o Decreto 310/2001, do 17 de decembro (DOG nº 243, do 18 de decembro), estableceu a estructura orgánica dos departamentos da Xunta de Galicia, contemplando no seu artigo 8 a Consellería de Sanidade, cos seguintes órganos superiores: 1. Secretaría Xeral, e 2. Dirección Xeral de Saúde Pública.

No punto B) do mesmo decreto, adscríbese o Servicio Galego de Saúde (Sergas) como organismo autónomo de carácter administrativo á Consellería de Sanidade.

Como consecuencia do anterior, cómpre face-las necesarias modificacións na estructura da consellería, co fin de adaptala ás esixencias dos decretos anteriormente citados, incorporando tamén as últimas normas de desenvolvemento aparecidas recentemente en materias concretas, como foi o caso do Decreto 146/2001, do 7 de xuño, ou o Decreto 176/2001, do 12 de xullo, reguladores da planificación, apertura, traslado, cerramento e transmisión de oficinas de farmacia; e sobre creación, apertura e funcionamento dos servicios de farmacia e depósitos de medicamentos nas estructuras de atención primaria, respectivamente; ou tamén o caso da Orde do 20 de novembro de 2001, sobre boticas anexas; por canto facían unha asignación funcional a estructuras e órganos concretos da consellería ou dos seus organismos dependentes. Igualmente, dentro destas normas de recente aparición, cómpre cita-lo Decreto 77/2001, do 29 de marzo, sobre centros, servicios e establecementos sanitarios da Comu

nidade Autónoma de Galicia; e a Orde do 29 de marzo de 2001, pola que se regula a autorización de centros, servicios e establecementos sanitarios.

Con este decreto preténdese, o mesmo que cos seus precedentes, reforza-lo papel da Consellería de Sanidade como órgano responsable da dirección e coordinación das políticas sanitarias e sociosanitarias.

Na estructura intégranse os aspectos preventivos coa promoción e protección da saúde da poboación, sepáranse a planificación e programación respecto da súa execución; tentando acadar con isto a optimización da eficiencia na actuación administrativa neste eido.

Por outra banda, no relativo á atención sociosanitaria mantense unha estructura administrativa encamiñada á protección sanitaria dos sectores sociais máis desfavorecidos ou máis vulnerables, complementando deste xeito a actuación levada a cabo por outros departamentos.

Tamén se procedeu á regulación conxunta dos servicios centrais e periféricos da consellería, que anteriormente aparecían en dúas normas diferentes: o Decreto 198/1994, do 16 de xuño (relativo ás delegacións provinciais), e o Decreto 48/1998, do 5 de febreiro, modificado polo Decreto 69/2001, do 22 de marzo (relativos ós servicios centrais da consellería).

Polo tanto, en virtude do disposto na Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro, por proposta do conselleiro de Sanidade, cos informes previos da Consellería da Presidencia, Relacións Institucionais e Administracións Pública, e da Consellería de Economía e Facenda e logo de deliberación do Consello da Xunta de Galicia, na súa reunión do día oito de febreiro de dous mil dous,

DISPOÑO:

Artigo 1º.-A Consellería de Sanidade.

1. A Consellería de Sanidade é o órgano da Administración autonómica responsable da superior dirección e control do desenvolvemento das funcións e competencias que, en materia de sanidade, lle corresponden á Xunta de Galicia de acordo co establecido nos artigos 27.23º, 28.8º e 33 do Estatuto de autonomía de Galicia e que lle foron asignadas polo Decreto 29/1980, do 15 de outubro, e pola Lei 1/1989, do 2 de xaneiro, de creación do Servicio Galego de Saúde, reformada pola Lei 8/1991, do 23 de xullo, e polos decretos 118/1982, do 5 de outubro, e 54/1985, do 21 de marzo.

2. Así mesmo, correspóndelle o exercicio das competencias que para situacións sanitarias urxentes ou de necesidade se recollen na Lei orgánica 3/1986, do 14 de abril, de medidas especiais en materia de saúde pública.

Capítulo I

Servicios centrais

Artigo 2º.-Estructura.

1. A Consellería de Sanidade, para o cumprimento das súas funcións, contará coa seguinte estructura nos seus servicios centrais:

I. O conselleiro.

II. A Secretaría Xeral.

III. A Dirección Xeral de Saúde Pública.

IV. Órganos asesores e consultivos e de coordinación.

2. O Servicio Galego de Saúde, organismo autónomo de carácter administrativo creado pola Lei 1/1989, do 2 de xaneiro, de creación do Servicio Galego de Saúde, reformada pola Lei 8/1991, do 23 de xullo, estará adscrito á Consellería de Sanidade.

Artigo 3º.-O conselleiro.

O conselleiro de Sanidade é a superior autoridade da consellería e con tal carácter desempeña e exerce as atribucións que lle confiren a Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro, a Lei 1/1989, do 2 de xaneiro, de creación do Servicio Galego de Saúde, reformada pola Lei 8/1991, do 23 de xullo, e a Lei 2/1996, do 8 de maio, de Galicia sobre drogas en relación ó Decreto 254/1997, do 10 de setembro.

Artigo 4º.-A Secretaría Xeral.

1. A Secretaría Xeral exercerá as funcións e competencias establecidas no Decreto 119/1982, do 5 de outubro, en relación con tódalas unidades e servicios dependentes da Consellería de Sanidade, a inspección dos servicios, dos centros e organismos dependentes ou adscritos á consellería -sen prexuízo das competencias que se lle atribúan á Inspección Xeral de Servicios da Consellería da Presidencia, Relacións Institucionais e Administración Pública a autorización e acreditación de centros, servicios e establecementos sanitarios, o desenvolvemento das directrices do plan sociosanitario, o exercicio das potestades disciplinarias en relación ó persoal estatutario, agás a separación do servicio, e sen prexuízo das competencias atribuídas ó conselleiro da Presidencia, Relacións Institucionais e Administración Pública, así como a sancionadora en relación ás oficinas de farmacia, e as demais competencias que lle atribúa a normativa en vigor ou as que lle sexan singular ou especialmente

encomendadas por delegación do titular da consellería.

2. Correspóndelle igualmente a coordinación de toda a información dirixida ós medios de comunicación a través da oficina de prensa da consellería.

3. Tamén exercerá as funcións que lle atribúen as seguintes normas: Decreto 146/2001, do 7 de xuño, sobre planificación, apertura, traslado, cerramento e transmisión de oficinas de farmacia; Decre

to 176/2001, do 12 de xullo, sobre creación, apertura e funcionamento dos servicios de farmacia e depósitos de medicamentos nas estructuras de atención primaria; e na Orde do 20 de novembro de 2001, pola que se establecen os requisitos e procedemento de autorización das boticas anexas.

4. En relación co organismo autónomo Servicio Galego de Saúde, correspóndelle o exercicio das seguintes funcións e competencias:

a) As relacións institucionais de carácter sanitario cos órganos da Administración central do Estado e demais administracións públicas.

b) A inspección dos centros e servicios sanitarios do organismo.

5. A Secretaría Xeral, para o exercicio das súas competencias, contará coa seguinte estructura:

-A Vicesecretaría Xeral.

-A Subdirección Xeral de Réxime Administrativo.

-A Subdirección Xeral de Inspección Sanitaria.

-A Subdirección Xeral do Programa de Atención Sociosanitaria.

-A Subdirección Xeral de Ordenación, Estudios e Informes.

-A Asesoría Xurídica, organicamente integrada na Secretaría Xeral e funcionalmente dependente da Asesoría Xurídica Xeral da Xunta de Galicia.

-A Intervención Delegada, organicamente integrada na Secretaría Xeral e funcionalmente dependente da Intervención Xeral da Comunidade Autónoma.

6. Intégrase organicamente na Secretaría Xeral, con dependencia funcional directa do conselleiro, o Comisionado do Plan de Galicia sobre Drogas, creado e adscrito á Consellería de Sanidade polo Decreto 254/1997, do 10 de setembro.

Artigo 5º.-A Vicesecretaría Xeral.

Á Vicesecretaría Xeral, con nivel orgánico de subdirección xeral, correspóndelle como órgano de apoio do secretario xeral, o exercicio das seguintes funcións:

a) Prestarlle asistencia técnica e administrativa ó secretario xeral en tódolos asuntos que este lle encomende.

b) A elaboración de estudios e propostas nas materias de estructura, organización, deseño de procedementos administrativos, tanto nos servicios centrais como periféricos da consellería e demais entidades adscritas.

c) O vicesecretario xeral substituirá o secretario xeral da consellería nos casos de ausencia, enfermidade ou vacante deste.

Artigo 6º.-A Subdirección Xeral de Réxime Administrativo.

É a unidade encargada da coordinación dos servicios de carácter xeral, do réxime interior dos rexis

tros e arquivos e do asesoramento técnico-xurídico da consellería. Contará, a nivel orgánico de servicio, coas seguintes unidades:

6.1. Servicio Técnico Xurídico.

Correspóndenlle as seguintes funcións:

a) A elaboración e tramitación dos proxectos de disposición de carácter xeral da consellería e do Sergas e a elaboración das compilacións e refundicións de normas de interese para a consellería.

b) O estudio, preparación e tramitación dos expedientes da consellería, do Sergas e demais centros ou entidades dependentes dela, que teñan que levarse ó Consello de Xunta de Galicia e á Comisión de Secretarios Xerais, así como o traslado do seus acordos.

c) O estudio, tramitación e formulación, se é o caso, de propostas de resolución de recursos ou reclamacións interpostos contra os actos e resolucións emanados dos distintos órganos da consellería ou do Sergas e, en xeral, a elaboración de estudios xurídicos, resolucións, informes e demais asuntos, que por razón da súa competencia, lle sexa encomendados pola Secretaría Xeral.

d) O estudio e tramitación de resolucións relativas a apertura, traslado, transmisión, modificación ou peche de oficinas de farmacia.

e) A tramitación e coordinación das resolucións dos expedientes de reclamación de responsabilidade patrimonial, sen prexuízo das funcións encomendadas a outras unidades.

f) O estudio e tramitación de convenios de colaboración nos que interveña a Consellería de Sanidade ou o Servicio Galego de Saúde.

g) Coordinación en materia de políticas de prevención de riscos laborais, no ámbito da Consellería de Sanidade.

6.2. Servicio de Réxime Interior.

Correspóndenlle as seguintes funcións:

a) O réxime interior da consellería, o rexistro e os arquivos xerais e a levanza dos libros de rexistro e restantes funcións no relativo ás fundacións de interese galego sobre as que a consellería exerza o protectorado.

b) A coordinación da publicación no Diario Oficial de Galicia e demais diarios ou boletíns oficiais das disposicións ou actos dictados polos órganos da consellería e do Sergas.

c) A harmonización da organización e funcionamento dos servicios administrativos da consellería e do Sergas e a proposta de incoación e de resolución, se é o caso, dos expedientes disciplinarios do persoal con destino na consellería e no Sergas, coa excepción do persoal facultativo, de acordo coa normativa vixente.

d) Xestión do parque móbil da Consellería de Sanidade e do Servicio Galego de Saúde.

e) Xestión da subministración de material de oficina e imprenta, e consumibles informáticos, para as distintas unidades da consellería e do Servicio Galego de Saúde.

Artigo 7º.-A Subdirección Xeral de Inspección Sanitaria.

É a unidade á que lle corresponde:

a) O deseño e a coordinación dos programas e actuacións da inspección sanitaria no relativo ós centros, servicios e establecementos sanitarios públicos e privados que desempeñen a súa actividade no ámbito da Comunidade Autónoma, así como neste contexto, a avaliación das súas actividades con especial atención ás prestacións do sistema sanitario público, asumindo as competencias asignadas ó xefe de inspección sanitaria no Decreto 126/1992, do 14 de maio, sobre ordenación de funcións da inspección de servicios sanitarios da Comunidade Autónoma de Galicia ou na normativa que a substitúa.

b) A elaboración das propostas de autorización de centros, servicios e establecementos sanitarios.

c) A proposta de acreditación de centros, servicios e establecementos sanitarios na Comunidade Autónoma de Galicia.

d) A coordinación da instrucción dos procedementos de responsabilidade patrimonial, sen prexuízo das funcións atribuídas a outras unidades.

Contará con nivel orgánico de servicios, coas seguintes unidades:

7.1. Servicio de Xestión Administrativa.

Correspóndenlle as seguintes funcións:

a) A xestión, coordinación e seguimento da adecuación normativa das actuacións administrativas da inspección.

b) Avaliar e emitir informe sobre as propostas de incoación e resolución dos procedementos disciplinarios ó persoal facultativo e procedementos sancionadores a establecementos farmacéuticos incoados directamente pola Secretaría Xeral ou por proposta da División de Farmacia e Productos Sanitarios.

c) As propostas de resolución que sexan competencia do conselleiro, derivadas das infraccións en materia de autorización de centros, servicios e establecementos sanitarios.

d) Apoio e asesoramento á Subdirección Xeral de Inspección Sanitaria en materia de estudios, proxectos e informes da Inspección Sanitaria.

7.2. Servicio de Rexistro de Autorización de Actividades e Centros.

Correspóndenlle as seguintes funcións:

a) As propostas de autorización administrativa relativas a centros, servicios e establecementos sanitarios.

b) O rexistro de centros, servicios e establecementos sanitarios da Comunidade Autónoma.

c) O seguimento e avaliación da publicidade sanitaria.

d) O seguimento das actividades relacionadas coa concesión de interese sanitario para actos de carácter científico.

Artigo 8º.-Subdirección Xeral do Programa de Atención Sociosanitaria.

É a unidade encargada do deseño, desenvolvemento e xestión do modelo de coordinación da atención sociosanitaria de Galicia e da súa concreción operativa. Así mesmo, actuará como unidade de coordinación das actuacións que neste eido establezan os distintos órganos de dirección, tanto da consellería como das diferentes estructuras do Sergas, no relacionado coas áreas de actuación do programa de atención sociosanitaria, tendentes a unha integración da continuidade asistencial.

Contará a nivel orgánico de servicio coa seguinte unidade:

8.1. Servicio de Estudios, Xestión e Coordinación de Programas.

Correspóndenlle as seguintes funcións:

a) A identificación e establecemento dos recursos susceptibles de realizar funcións sociosanitarias, e actuacións que permitan reorienta-los recursos existentes.

b) A elaboración de plans e propostas de normas reguladoras de prestación de servicios sociosanitarios.

c) O desenvolvemento, xestión e seguimento de recursos propiamente sociosanitarios nas áreas de actuación.

d) O desenvolvemento, xestión e seguimento de programas para unha profesionalización do sector con desenvolvemento de metodoloxía propia de atención sociosanitaria como: valoración multidimensional orientada á capacidade funcional, fomento da interdisciplinariedade, plan de coidados individualizados e coordinación da continuidade asistencial.

e) O desenvolvemento de programas e protocolos de derivación entre atención primaria de saúde e comunitaria e a coordinación de prestacións sanitarias dependentes doutras institucións e administracións co obxectivo de mellora-los resultados asistenciais.

Artigo 9º.-A Subdirección Xeral de Ordenación, Estudios e Informes.

É a unidade á que lle corresponde o seguimento e avaliación global dos obxectivos e accións das distintas unidades da consellería, así como o apoio administrativo, mediante a emisión de informes e estudios, nas relacións de carácter sanitario cos órganos da Administración central do Estado, e de calquera outra Administración pública.

Correspóndelle, así mesmo, a coordinación da actividade que desenvolva no Parlamento a consellería.

Artigo 10º.-A Dirección Xeral de Saúde Pública.

10.1. A Dirección Xeral de Saúde Pública é o órgano encargado da protección e promoción colectiva da saúde da poboación galega.

A súa misión é mellora-la saúde da poboación galega desde unha perspectiva comunitaria, diminuíndo a carga da enfermidade, mortalidade, morbilidade e discapacidade mediante a identificación dos factores protectores e de risco, a actuación directa e o traballo cos axentes sociais. Todo isto para que, dunha forma coordinada, se logre un efecto positivo sobre os anteditos factores e o desenvolvemento de políticas saudables.

10.2. Correspóndenlle á Dirección Xeral de Saúde Pública, no marco da actuación sanitaria da Comunidade Autónoma galega, as competencias relativas a:

a) Actividades dirixidas a avalia-lo estado de saúde da poboación galega e identifica-los factores determinantes da saúde dos cidadáns galegos.

b) Actividades dirixidas á vixilancia e análise dos indicadores de morbilidade e mortalidade, e coordinación dos diferentes rexistros da competencia da dirección xeral.

c) Actividades dirixidas a identifica-los factores determinantes da saúde dos cidadáns galegos.

d) Actividades dirixidas a diminuí-lo impacto dos factores de risco.

e) Actividades dirixidas a aumenta-lo impacto dos factores protectores da saúde.

f) Desenvolvemento dos programas de promoción colectiva e protección da saúde na Comunidade Autónoma galega.

g) Actividades dirixidas á mellora da calidade da xestión dos servicios de saúde pública.

h) Desenvolvemento e xestión de programas de prevención individualizada de problemas de saúde con especial repercusión na Comunidade Autónoma galega.

i) Desenvolvemento de actividades como autoridade competente en materia de saúde pública.

j) Actividades dirixidas á oferta de servicios de saúde pública na procura da mellora do estado de saúde da poboación.

k) Actividades de control e coordinación da rede de laboratorios de saúde pública.

l) O exercicio da potestade sancionadora, nos termos previstos na lexislación vixente.

10.3. A Dirección Xeral de Saúde Pública contará, para o cumprimento das ditas competencias, coa seguinte estructura:

1. A Subdirección Xeral de Programas de Saúde Pública.

2. A Subdirección Xeral de Xestión e Calidade de Saúde Pública.

Artigo 11º.-A Subdirección Xeral de Programas de Saúde Pública.

Correspóndenlle á Subdirección Xeral de Programas de Saúde Pública a aplicación e execución das directrices da dirección xeral en materia de planificación e coordinación operativa e auditoría dos programas que actúen sobre os factores determinantes da saúde dos galegos.

Cando os plans e programas incidan na rede asistencial do Servicio Galego de Saúde, a auditoría levarase a cabo en coordinación coa Inspección Sanitaria, de acordo coas funcións previstas no artigo 7º deste decreto e cos principios do Decreto 126/1992, do 19 de maio, sobre ordenación de funcións da Inspección de Servicios Sanitarios da Comunidade Autónoma de Galicia.

Para o cumprimento das súas funcións contará, a nivel orgánico de servicio, coas seguintes unidades:

11.1. Servicio de Prevención e Control das Enfermidades Transmisibles.

Correspóndenlle as seguintes funcións:

a) A elaboración e coordinación da execución do Plan de Prevención e Control das Enfermidades Transmisibles.

b) A planificación e xestión dos sistemas de información específicos das enfermidades transmisibles con plans de actuación propios.

c) A actualización e coordinación da execución da Estratexia de Prevención e Control da Infección polo VIH/SIDA en Galicia.

d) A planificación, xestión e coordinación do Programa Galego de Vacinacións.

e) A planificación, xestión e coordinación do Plan de Prevención e Control da Tuberculose en Galicia.

f) En xeral, a planificación, programación, avaliación, auditoría dos sistemas de aseguramento da calidade e difusión de información relacionada coa protección fronte ás enfermidades transmisibles.

11.2. Servicio de Protección da Saúde fronte a Riscos Xerais.

Correspóndenlle as seguintes funcións:

a) A xestión dos rexistros dos factores de risco xerais, entendendo por tales aqueles que interactúan coas persoas, independentemente das variables individuais.

b) A planificación, programación, avaliación e xestión así como auditoría dos sistemas de aseguramento da calidade e difusión da información das actividades de protección da saúde da poboación da Comunidade Autónoma fronte ós factores de risco xerais.

11.3. Servicio de Protección da Saúde fronte a Riscos Específicos.

Correspóndenlle as seguintes funcións:

a) A xestión dos rexistros dos riscos específicos, entendendo por tales aqueles que interactúan coas persoas dependendo de variables individuais, como a idade, o lugar de residencia e as actividades laborais e de tempo libre.

b) A planificación, programación, avaliación, xestión, así como auditoría dos sistemas de aseguramento da calidade e difusión da información das actividades de protección da saúde da poboación da Comunidade Autónoma fronte ós riscos específicos.

11.4. Servicio de Prevención e Control de Enfermidades non Transmisibles:

Correspóndenlle as seguintes funcións:

a) A xestión dos rexistros dos factores psicosociais e hábitos de vida.

b) A planificación, programación, xestión, avaliación, así como auditoría dos sistemas de aseguramento da calidade e difusión da información das actividades de promoción de hábitos de vida saudables.

c) Protección da saúde da poboación da Comunidade Autónoma fronte a factores psicosociais.

d) A planificación, programación, xestión, avaliación, así como a auditoría dos sistemas de aseguramento da calidade e difusión da información das actividades de prevención e control das enfermidades non transmisibles.

Artigo 12º.-A Subdirección Xeral de Xestión e Calidade en Saúde Pública.

Correspóndelle a esta subdirección a aplicación e execución das directrices en materia de identificación de problemas de saúde, información sobre saúde pública, actividade inspectora de saúde pública, mellora da calidade da xestión dos servicios de saúde pública, auditorías de aseguramento da calidade sanitaria dos programas de protección, prevención e promoción da saúde, coordinación interna da organización de saúde pública, a relación con outras administracións ou entidades con competencia en saúde pública e a xestión de programas de cribado poboacional de determinados problemas de saúde individual.

Cando os plans e programas incidan na rede asistencial do Servicio Galego de Saúde, a auditoría levarase a cabo en coordinación coa Inspección Sanitaria de acordo coas funcións previstas no artigo 7º deste decreto e cos principios do Decreto 126/1992, do 19 de maio, sobre ordenación de funcións da Inspección de Servicios Sanitarios da Comunidade Autónoma de Galicia.

Para o cumprimento das súas funcións contará, a nivel orgánico de servicio, coas seguintes unidades:

12.1. Servicio de Información sobre Saúde Pública.

Correspóndenlle as seguintes funcións:

a) A xestión dos sistemas de información de saúde pública.

b) A xestión e coordinación dos sistemas informáticos de saúde pública, con suxeición á coordinación xeral informática da consellería.

c) A análise integral da información de saúde pública e a avaliación do estado de saúde da Comunidade Autónoma.

d) A difusión da información xerada nos sistemas de información de saúde pública.

e) O asesoramento e formación en materia de método epidemiolóxico.

f) O control de abrochos epidémicos, a coordinación e o seguimento do Sistema de Alerta Epidemiolóxica de Galicia.

g) A coordinación da organización de saúde pública con outras administracións ou entidades con competencia na materia.

12.2. Servicio de Inspección e Laboratorios de Saúde Pública.

Correspóndenlle as seguintes funcións:

a) A xestión, coordinación e auditoría dos sistemas de aseguramento da calidade da actividade inspectora de saúde pública.

b) A xestión, coordinación e auditoría dos sistemas de aseguramento da calidade dos laboratorios de saúde pública.

c) A coordinación e o seguimento da rede de alerta alimentaria.

d) A tramitación dos procedementos administrativos derivados da actividade inspectora de saúde pública.

e) As actuacións relacionadas coa coordinación e xestión das taxas xeradas polas actividades de saúde pública.

12.3. Servicio de Programas Poboacionais de Cribado.

Correspóndenlle as seguintes funcións:

a) A xestión dos rexistros dos programas poboacionais de cribado.

b) A planificación, programación, xestión, avaliación, así como auditoría dos sistemas de aseguramento da calidade e difusión da información dos programas poboacionais de cribado desenvolvidos na Comunidade Autónoma galega.

12.4. Servicio de Coordinación e Calidade da Saúde Pública.

Correspóndelle as seguintes funcións:

a) A coordinación dos sistemas de xestión dos programas de saúde pública relativos a comunicación, publicacións e xestión económica.

b) Coordina-lo deseño, execución, control e avaliación dos programas continuados de educación para a saúde no ensino.

c) Presta-lo seu apoio, asesoramento e orientación en educación para a saúde a outras organizacións.

d) O deseño e a execución dos programas de formación interna para o persoal da dirección xeral.

e) A coordinación interna das relacións dos servicios da dirección xeral cos medios de comunicación, sen prexuízo da superior competencia da secretaría xeral e a súa vehiculación a través da oficina de prensa da consellería.

f) A xestión do sistema de avaliación e de aseguramento da calidade de xestión da dirección xeral.

Artigo 13º.-Consello asesor técnico.

A Consellería de Sanidade, para o exercicio das funcións de asesoramento, consulta e apoio técnico nas materias da súa competencia, contará cun consello asesor técnico, como órgano asesor, consultivo e de coordinación. A súa composición e funcións determinaranse por decreto do Consello da Xunta de Galicia.

Artigo 14º.-Outros órganos asesores, consultivos e de coordinación.

Así mesmo, están adscritos á Consellería de Sanidade, coa composición e funcións que sinalan nas súas normas de creación, os seguintes órganos:

-A Comisión de Coordinación Interconsellerías en Materia de Drogodependencias.

-A Comisión de Coordinación Interadministracións Públicas en Materia de Drogodependencias.

-A Comisión de Coordinación Interadministración con Organizacións non Gobernamentais, en materia de drogodependencias.

-A Comisión Galega de Autorización de Laboratorios de ensaios de productos alimenticios relacionados co consumo humano.

Capítulo II

Órganos periféricos

Artigo 15º.-As delegacións provinciais.

15.1. Para o exercicio das súas competencias, a Consellería de Sanidade organízase en catro delegacións provinciais, que desenvolven as súas funcións no ámbito territorial correspondente a cada unha das provincias da Comunidade Autónoma de Galicia.

15.2. Á fronte de cada delegación provincial existirá un delegado do que dependerán tódolos servicios, unidades, organismos ou centros da consellería que radiquen no ámbito territorial da súa competencia. Os delegados dependerán orgánica e funcionalmente do conselleiro, sen prexuízo das directrices que, na orde funcional, poidan emanar do secretario xeral e dos directores xerais da consellería.

15.3. Nos seus respectivos ámbitos territoriais, correspóndelles ós delegados provinciais o exercicio das seguintes competencias:

a) Exerce-la representación oficial da consellería ante as autoridades, organismos e entidades.

b) Asumi-las funcións do director provincial do Servicio Galego de Saúde no caso de vacante.

c) Dirixi-la xestión dos servicios da delegación e exerce-la supervisión e seguimento das súas actividades, asumindo a plena representatividade deles.

d) Desempeña-la xefatura superior de persoal respecto dos órganos e servicios provinciais da consellería.

e) Elabora-la proposta de dotacións orzamentarias da delegación que hai que incluír no anteproxecto de orzamentos da consellería.

f) A coordinación, execución e control dos plans e programas de actuación da consellería, tanto no ámbito da planificación e ordenación sanitaria, como en materia de saúde pública.

g) Incoar e tramita-los expedientes sancionadores derivados da comisión de infraccións administrativas no ámbito das súas competencias e a resolución daqueles que lle atribúen a normativa vixente, así como propoñerlle ó conselleiro, no caso de risco grave e inminente en materia de saúde pública, a clausura e suspensión temporal ou definitiva de establecementos ou actividades, sen prexuízo de acorda-la suspensión provisional con carácter de urxencia, dándolle conta inmediata.

h) A recepción, tramitación e resolución, se é o caso, de cantas denuncias, queixas e reclamacións se produzan no seu ámbito competencial.

i) As funcións encomendadas en materia de tramitación e proposta, polo Decreto 146/2001, do 7 de xuño, sobre planificación, apertura, traslado, cerramento e transmisión de oficinas de farmacia, e as tamén encomendadas polo Decreto 176/2001, do 12 de xullo, sobre creación, apertura e funcionamento dos servicios de farmacia e depósitos de medicamentos nas estructuras de atención primaria, así como as previstas pola Orde do 20 de novembro de 2001, pola que se establecen os requisitos e procedemento de autorización das boticas anexas.

j) As funcións que lle outorgan o Decreto 77/2001, do 29 de marzo, e a Orde do 29 de marzo de 2001, en materia de centros, servicios e establecementos sanitarios.

k) As competencias establecidas nos Decretos 5/1987, do 14 de xaneiro, 87/1990, do 15 de febreiro, e 88/1990, do 15 de febreiro, así como calquera outra competencia ou atribución que a lexislación vixente lles confira ou lles sexan delegadas polo conselleiro.

15.4. As delegacións provinciais da Consellería de Sanidade estarán integradas polas seguintes unidades administrativas:

-A Secretaría.

-O Servicio de Planificación e Ordenación Sanitaria.

-O Servicio de Promoción da Saúde.

-O Servicio de Protección da Saúde.

-O Servicio de Laboratorio de Saúde Pública.

Artigo 16º.-A Secretaría da Delegación.

16.1. A Secretaría, con nivel orgánico de servicio, é o órgano de xestión e coordinación dos servicios administrativos e de persoal da delegación, ó que lle corresponde o exercicio das seguintes funcións:

a) A asistencia técnica e administrativa ó delegado.

b) A coordinación administrativa do funcionamento dos servicios dependentes da delegación provincial.

c) A xestión do persoal que preste servicios na delegación.

d) As cuestións de réxime interior, información e atención ó cidadán, rexistro xeral, publicacións, documentación administrativa, arquivo e inventario.

e) A vixilancia e supervisión da organización e funcionamento dos servicios administrativos da consellería.

f) A iniciación e seguimento dos expedientes sancionadores en materia de sanidade ambiental e seguridade alimentaria, sen prexuízo das competencias atribuídas a outros órganos da Xunta de Galicia.

g) A xestión económica da delegación.

h) A administración, control e xustificación dos créditos orzamentarios asignados á delegación.

i) A habilitación dos medios materiais e de persoal da delegación.

j) Calquera outro asunto que non sexa de competencia específica dos demais servicios da delegación.

16.2. O secretario da delegación substituirá o delegado provincial nos caso de enfermidade, ausencia ou vacante deste.

Artigo 17º.-Servicio de Planificación e Ordenación Sanitaria.

Correspóndelle o exercicio das seguintes funcións:

a) A elaboración de indicadores, realización de estudios e demáis accións necesarias para o proceso de planificación sanitaria.

b) A tramitación e informe dos expedientes de autorización sanitaria previa de centros, servicios e establecementos sanitarios.

c) A tramitación de expedientes para a inscrición no Rexistro de Centros, Servicios e Establecementos Sanitarios.

d) A tramitación de expedientes e proposta de recoñecemento de interese sanitario para actos de carácter científico.

e) Levar a cabo as accións oportunas para verifica-las medidas adoptadas pola División de Farmacia e Productos Sanitarios como consecuencia das alertas sobre riscos relacionados cos medicamentos ou productos sanitarios nos centros, establecementos e servicios sanitarios do seu ámbito de actuación.

Artigo 18º.-Servicio de Promoción da Saúde.

Correspóndelle o exercicio das seguintes funcións:

a) A organización da execución dos programas de saúde pública e de vixilancia epidemiolóxica elaborados pola Dirección Xeral de Saúde Pública.

b) A coordinación e emisión de informes e avaliación dos programas e actividades encomendados.

c) Calquera outra función que lle sexa encomendada en materia de programas e vixilancia de saúde pública.

Artigo 19º.-Servicio de Protección da Saúde.

Correspóndelle o exercico das seguintes funcións:

a) A execución das disposicións dictadas en materia de protección da saúde.

b) A organización da execución dos programas de protección da saúde elaborados pola Dirección Xeral de Saúde Pública.

c) O seguimento dos cursos e programas de formación e información en materia de protección da saúde.

d) A coordinación e supervisión das inspeccións en materia de sanidade ambiental e seguridade alimentaria.

e) A proposta de resolución dos expedientes sancionadores en materia de sanidade ambiental e seguridade alimentaria.

f) A coordinación e emisión de informes de avaliación dos programas e actividades encomendados.

g) O control e supervisión das actividades que realice o persoal adscrito ó desenvolvemento de cada unha das actividades relacionadas coa sanidade ambiental e coa seguridade alimentaria.

h) Calquera outra función que lle sexa encomendada en materia de sanidade ambiental e seguridade alimentaria.

Artigo 20º.-Servicio de Laboratorio de Saúde Pública:

Correspóndelle o exercicio das seguintes funcións:

a) A xestión e coordinación das actividades realizadas polo laboratorio de saúde pública da delegación.

b) A execución das análises de apoio ós servicios de saúde pública.

c) O deseño e implantación dos programas de calidade no laboratorio.

d) O control e supervisión das actividades que realice o persoal adscrito ó laboratorio.

Disposición adicional

Manteranse na Secretaría Xeral as funcións desenvolvidas pola Subdirección Xeral de Inspección Sanitaria a través da inspección farmacéutica da Inspección Central, en materia de expedientes sancionadores a oficinas de farmacia e de autorización

de funcionamento de servicios e establecementos farmacéuticos.

Disposicións transitorias

Primeira.-Entrementres non se creen na Secretaría Xeral as unidades precisas para o desenvolvemento das funcións que lle corresponden en materia económica e de persoal, as ditas funcións serán exercidas respectivamente polas correspondentes unidades das divisións de Recursos Económicos e de Recursos Humanos do Sergas.

Segunda.-Cando, como consecuencia da estructura orgánica que se establece neste decreto, se modifique a denominación das distintas unidades administrativas existentes con anterioridade, se cree ou suprima algunha das devanditas unidades, autorízase o conselleiro de Sanidade, por proposta do secretario xeral, para readscribi-lo persoal afectado polo cambio de estructura a postos do mesmo ou inferior nivel, sempre que sexan de libre designación, ou a adscribilo con carácter temporal a postos de inferior nivel, se se trata de postos de provisión por concurso ata que, neste caso, os devanditos postos sexan cubertos da forma regulamentariamente establecida, sen que en ningún caso a readscrición ou adscrición supoñan cambio de residencia, todo isto sen prexuízo do disposto no artigo 62.4º da Lei da función pública e na Lei 9/1997, do 12 de maio, de órganos de representación, determinación das condicións de traballo e participación do persoal ó servicio das administracións públicas, así

como das competencias que poida ter atribuídas nesta materia a Consellería da Presidencia, Relacións Institucionais e Administración Pública.

Terceira.-A Consellería de Sanidade, de conformidade co disposto no artigo 15.5º da Lei 4/1988, do 26 de maio, da función pública de Galicia, elaborará a proposta de relación de postos de traballo resultantes da aplicación deste decreto, efectuando a súa tramitación de acordo coa normativa vixente.

Cuarta.-Entrementres non se proceda á regulación do procedemento de visado de receitas por parte da Consellería de Sanidade, manterase o réxime de distribución de funcións actualmente vixente entre a División de Farmacia e Productos Sanitarios do Sergas, e a Subdirección Xeral de Inspección Sanitaria.

Disposición derrogatoria

Quedan derrogados os decretos 198/1994, do 16 de xuño; o Decreto 48/1998, do 5 de febreiro; e o Decreto 69/2001, do 22 de marzo, de modificación do anterior; así como cantas disposicións de igual ou inferior rango que se opoñan ó disposto neste decreto.

Disposicións derradeiras

Primeira.-A estructura orgánica que se establece neste decreto non suporá aumento do gasto.

Segunda.-Facúltase o conselleiro de Sanidade para dictar cantas disposicións sexan necesarias para o desenvolvemento deste decreto.

Terceira.-Este decreto entrará en vigor o día seguinte ó da súa publicación no Diario Oficial de Galicia.

Santiago de Compostela, oito de febreiro de dous mil dous.

Manuel Fraga Iribarne

Presidente

José María Hernández Cochón

Conselleiro de Sanidade