A Fundación Pública Hospital do Salnés vén utilizando desde a posta en funcionamento do Hospital

do Salnés en Vilagarcía de Arousa, diverso equipamento propiedade do Servicio Galego de Saúde, e do que se considera necesario cederlle o uso co fin de destinalo ós fins de interese xeral recollidos no artigo 6º dos seus estatutos, aprobados polo Decreto 276/2001, do 27 de setembro, de adaptación das fundacións sanitarias á disposición adicional sétima da Lei 5/2000, do 28 de decembro, de medidas fiscais e de réxime orzamentario e administrativo.

O Servicio Galego de Saúde tramitou o expediente de cesión de uso de conformidade co disposto no artigo 35 bis da Lei 3/1985, do 12 de abril, do patrimonio da Comunidade Autónoma galega, e no artigo 96 bis do seu regulamento, aprobado polo Decreto 50/1989, do 9 de marzo, engadido polo Decreto 238/1998, do 24 de xullo (Diario Oficial de Galicia nº 156, do 13 de agosto).

Por todo o exposto, e en uso das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro,

DISPOÑO:

Artigo 1º

Esta orde ten por obxecto acorda-la cesión de uso a favor da Fundación Pública Hospital do Salnés dos bens mobles sitos nas dependencias do hospital e que se relacionan no expediente tramitado para o efecto pola División de Recursos Económicos do Servicio Galego de Saúde.

Artigo 2º

A cesión queda sometida ás seguintes cláusulas:

a) Os bens cedidos destinaranse á xestión e administración do Hospital do Salnés de acordo cos fins de interese xeral establecidos no artigo 6º dos estatutos da fundación pública, aprobados polo Decreto 276/2001, do 27 de setembro, de adaptación das fundacións sanitarias á disposición adicional sétima da Lei 5/2000, do 28 de decembro, de medidas fiscais e de réxime orzamentario e administrativo.

b) A cesión outórgaselle por un período máximo de cinco anos prorrogable por períodos sucesivos de igual duración se así o acordase o Servicio Galego de Saúde, logo de petición da fundación.

c) Transcorrido o prazo da cesión ou no caso de que os bens non se aplicasen ó fin sinalado ou deixasen de utilizarse con esa finalidade, considerarase resolta a cesión e os bens reverterán ó Servicio Galego de Saúde, que terá dereito a percibir, logo de taxación pericial, o valor dos detrimentos ou deterioracións que experimentasen.

Artigo 3º

A cesión formalizarase mediante acta subscrita polo director xeral da División de Recursos Económicos do Sergas e o director da fundación pública, debendo constar nela o acordo de cesión, no que

se incluirá a relación de bens obxecto de cesión e a aceptación do cesionario.

Disposicións derradeiras

Primeira.-O Servicio Galego de Saúde, a través da División de Recursos Económicos, no marco das súas respectivas competencias, realizará os trámites necesarios para a efectividade de canto se dispón nesta orde.

Segunda.-Esta orde entrará en virgor o día seguinte ó da súa publicación no Diario Oficial de Galicia.

Santiago de Compostela, 28 de xaneiro de 2002.

José María Hernández Cochón

Conselleiro de Sanidade