O Servicio Galego de Saúde de cara a mellora-la prestación da asistencia sanitaria na Comunidade Autónoma, concedeu permisos de utilización temporal a favor de distintos concellos, de varias ambulancias propiedade do mesmo. Algúns deses vehículos en virtude do tempo transcurrido non son útiles na actualidade para a realización de labores de ambulancia e de acordo co Decreto 42/1998, do 15 de xaneiro, polo que se regula o transporte sanitario rebasan o tempo máximo establecido para o seu destiño a fins sanitarios. Por todo isto, os concellos de Santa Comba, Pontecesures, Boqueixón, Vedra, Quintela de Leirado, Xinzo de Limia, O Páramo, Quiroga, Covelo, Baleira, A Gudiña, A Teixeira, Maceda, Dozón, Cariño, O Porriño, Mondoñedo, A Estrada, Muíños, Arteixo, A Veiga, Meis e Monterroso solicitan a cesión dos vehículos que utilizan para ser destinados a outros fins que redunden no interese xeral do municipio.

Con este fin o Servicio Galego de Saúde tramitou o expediente de cesión dos ditos vehículos de conformidade co disposto no artigo 35 bis da Lei 3/1985, do 12 de abril, do patrimonio da Comunidade Autónoma galega, e no artigo 96 bis do seu regulamento, aprobado polo Decreto 50/1989, do 9 de marzo, engadido polo Decreto 238/1998, do 24 de xullo (DOG nº 156, do 13 de agosto).

Por todo o exposto e en uso das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente reformada pola Lei 11/1988, do 20 de outubro

DISPOÑO:

Artigo 1º

Esta orde ten por obxecto acorda-la cesión de varios vehículos (determinados no anexo) a favor dos concellos Santa Comba, Pontecesures, Boqueixón, Vedra, Quintela de Leirado, Xinzo de Limia, O Páramo, Quiroga, Covelo, Baleira, A Gudiña, A Teixeira, Maceda, Dozón, Cariño, O Porriño, Mondoñedo, A Estrada, Muíños, Arteixo, A Veiga, Meis e Monterroso.

Artigo 2º

A cesión queda sometida ás seguintes cláusulas:

a) Os bens cedidos destinaranse a fins de utilidade pública ou interese social do concello tal e como esixe o artigo 35 bis da Lei 3/1985, do patrimonio

da Comunidade Autónoma, e o artigo 96 bis do Decreto 50/1989, do 9 de marzo, polo que se aproba o seu regulamento.

b) Coa cesión outorgaráselle o concello a propiedade do vehículo, e este comprométese a realizar ante a Xefatura Provincial de Tráfico os trámites precisos para o cambio da súa titularidade.

c) Os bens cedidos destinaranse a outros fins de utilidade pública ou interese social do concello, debendo este proceder a retirar do vehículo todo anagrama ou rotulación que puidera identificalo como vehículo sanitario, asi como a aboa-los gastos que puidera orixina-la transformación do antedito vehículo.

Artigo 3º

A cesión formalizarase mediante acta subscrita polo director xeral da División de Recursos Económicos do Servicio Galego de Saúde e polo organo competente dos distintos concellos, debendo constar nela o acordo de cesión e a aceptación do cesionario.

Disposicións derradeiras

Primeira.-O Servicio Galego de Saúde, a través de seu órgano competente, realizará os trámites necesarios para a efectividade de canto se dispón nesta orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 17 de xaneiro de 2002.

José María Hernández Cochón

Conselleiro de Sanidade

ANEXO

Relación de vehículos: