Vacantes diversos postos de traballo desta universidade, dotados orzamentariamente, este rectorado, en uso das atribucións conferidas polo artigo 65 dos estatutos da universidade, aprobados por decreto da Xunta de Galicia 253/1992, do 10 de setembro (DOG do 17 de setembro), en relación co artigo 3 da Lei de reforma universitaria, do 25 de agosto de 1983, e de acordo co disposto no art. 20.10º a) da Lei 30/1984, do 2 de agosto, de medidas para a reforma da función pública, o Decreto 93/1991 da Xunta de Galicia, do 20 de marzo (DOG do 25 de marzo), o Real decreto 364/1995, do 10 de marzo (BOE do 10 de abril), polo que se aproba o Regulamento xeral de ingreso do persoal ó servicio da Administración xeral do Estado e de provisión de postos de traballo e promoción profesional dos funcionarios civís da Administrción Xeral do Estado, a Resolución do 8 de agosto de 2000 da Universidade da Coruña pola que se actualizan as relacións de postos de traballo do persoal de Administración e
servicios (DOG do 29 de xuño), e unha vez consultada a Xunta de Persoal Funcionario de Administración e Servicios, resolve convocar concurso para cubri-los postos vacantes que se relacionan no anexo I desta resolución, conforme as seguintes bases:
Primeira.-Requisitos e condicións de participación.
Poderán participar no presente concurso tódolos funcionarios de carreira das escalas de Administración e servicios da Universidade da Coruña, calquera que sexa a súa situación administrativa, agás os suspensos en firme, así como os pertencentes a corpos ou escalas xerais de calquera das administracións públicas que se encontren na data desta convocatoria prestando os seus servicios nesta universidade, sempre que reúnan as condicións e requisitos esixidos na convocatoria na data en que remate o prazo de presentación das solicitudes de participación.
Así mesmo, os funcionarios que o desexen poderán solicita-los postos que resulten vacantes a consecuencia da resolución deste concurso, especificando a súa preferencia de acordo cos seguintes datos:
-Localidade.
-Facultade, escola, departamento, servicios centrais (rectorado) (por orde de preferencia).
-Nivel do posto de traballo ó que se opte (especificando o nivel mínimo que se solicita). Os postos resultantes adxudicaranse de acordo coas puntuacións obtidas de conformidade co baremo que rexe neste concurso.
Unha vez transcorrido o período de presentación de instancias, as solicitudes formuladas serán vinculantes para o peticionario e os destinos adxudicados serán irrenunciables, salvo que se obtivese outro destino mediante convocatoria pública antes de finaliza-lo prazo de toma de posesión.
Segunda.-Postos de traballo.
Os postos de traballo son os que se detallan no anexo I, sendo necesario para poder optar a calquera deles pertencer ó grupo e ó corpo ou escala que se sinala no dito anexo, así como reuni-los requisitos específicos que se sinalan nel e na vixente relación de postos de traballo de persoal de Administración e servicios da Universidade da Coruña.
Terceira.-Valoración de méritos.
A valoración dos méritos dos aspirantes para a adxudicación dos postos de traballo solicitados efectuarase na seguinte forma:
A) Primeira fase (máximo 24 puntos):
Consistirá na valoración dos méritos que a continuación se indican, sendo necesario obter un mínimo de 10 puntos para supera ou, se é o caso, para proceder á adxudicación da praza.
1. Antigüidade.
Os servicios prestados na Administración pública, incluíndo os servicios previos recoñecidos que se prestasen con anterioridade á condición de funcionario de carreira, valoraranse 0,30 puntos por cada ano completo (ou fracción), ata un máximo de 3 puntos.
2. Grao persoal consolidado.
Polo nivel 10 de grao consolidado: 1 punto.
Por cada unidade de nivel que exceda de 10: 0,10 puntos.
Puntuación máxima deste epígrafe: 3 puntos.
Nos supostos en que os funcionarios non teñan consolidado ningún grao persoal ou este sexa inferior a 10 computarese, para os efectos de puntuación no presente epígrafe, o nivel mínimo correspondente ó intervalo de niveis do grupo, do corpo ou de escala á que pertenza o funcionario.
3. Grupo do corpo ou escala de pertenza.
A pertenza ó grupo máis alto dos corpos ou escalas a que está adscrito o posto será valorada con 3 puntos.
4. Coñecemento da lingua galega.
CursoPuntuación
De iniciación1,50 puntos.
De perfeccionamento3,00 puntos.
Linguaxe administrativa4,00 puntos.
Só se valorará a titulación de maior nivel.
5. Cursos de formación e perfeccionamento (máximo 3 puntos).
Neste epígrafe serán valorados os cursos de formación administrativa xeral (perfeccionamento de funcionarios, procedemento administrativo, documentación e arquivo, etc.), de informática (tratamento de textos, bases de datos, etc.), así como os cursos de formación e perfeccionamento que versen sobre materias directamente relacionadas coas funcións propias dos postos de traballo solicitados. A valoración será establecida pola comisión de avaliación en función da extensión, contido, dificultade e adecuación dos cursos ás materias e funcións de cada posto de traballo, entre un mínimo de 0,10 e un máximo de 1 punto para cada curso.
Neste epígrafe valoraranse tamén, coas mesmas marxes de puntuación, os cursos de idiomas ou titulacións que acrediten o dominio do mesmo, sempre que figuren como méritos específicos no anexo correspondente desta convocatoria.
6. Valoración do traballo desenvolvido (máximo 8 puntos).
Para estes efectos valorarase a experiencia no desempeño de postos pertecentes á área funcional ou sectorial ás que corresponden os convocados na data da convocatoria do concurso, ou a experiencia no posto máis alto que se teña desenvolvido, na seguinte forma:
Posto Puntuación
Xefes de servicio e postos similares ou superiores Ata 8,00 puntos
Xefes de sección ou postos similares Ata 6,00 puntos
Administradores de centros ou postos similares Ata 4,00 puntos
Xefes de negociado, secretarías vicerrectores, xefes de equipo ou similares Ata 2,50 puntos
Secretarios decanatos, secretarios departamentos, administrativos posto base Ata 2,00 puntos
Auxiliares administrativos posto base Ata 1,00 puntos
B) Segunda fase (máximo 12 puntos):
Nesta fase, dirixida á comprobación e valoración dos méritos específicos adecuados ás características de cada posto de traballo, valoraranse unicamente os postos de nivel de complemento de destino igual ou superior ó 22.
Os aspirantes deberán presentar coa súa solicitude unha memoria, de extensión máxima de cinco páxinas, mecanografadas a dobre espacio, na que se analicen as tarefas do posto solicitado e os requisitos, condicións e medios necesarios para o seu desenvolvemento. A memoria valorarase ata un máximo de 8 puntos.
A comisión entrevistará os aspirantes sobre o contido da memoria, así como sobre os méritos específicos do aspirante adecuados ás características do posto, os coñecementos de idiomas e demais condicións que garantan a adecuación para o desempeño do posto. Esta entrevista valorarase cun máximo de 4 puntos.
Para superar esta fase será necesario obter un mínimo de 4 puntos, sumadas as puntuacións obtidas pola memoria e na entrevista.
Cuarta.-Solicitudes.
As solicitudes para tomar parte neste concurso, axustadas ó modelo publicado como anexo II desta resolución, deberán presentarse no rexistro xeral da uni
versidade, no prazo de trinta días hábiles, contados a partir do seguinte ó da data de publicación desta convocatoria.
No suposto de que sexan varios os postos solicitados, a preferencia deles virá establecida pola orde en que aparezan consignados na solicitude.
Quinta.-Acreditación de méritos.
Os requisitos, méritos e demais datos deberán ser acreditados polos interesados mediante a presentación dos documentos e títulos orixinais, ou fotocopias, e certificacións das correspondentes unidades de persoal, as certificacións deberán estar referidas á data de remate do prazo de presentación de solicitudes.
Os servicios prestados na Administración pública serán acreditados polo Servicio de Persoal da Universidade. No caso de que estes non consten no expediente do interesado, deberán ser acreditados mediante certificación expedida pola xefatura de persoal da Administración onde se prestasen.
Así mesmo, e para aqueles postos desempeñados noutras administracións públicas distintas da universidade, os interesados deberán xuntar coa solicitude certificación ou documentación aclarativa das tarefas e funcións correspondentes ó posto de traballo, que permita á comisión o encadramento del na área funcional ou sectorial que corresponda.
Os méritos non acreditados documentalmente polo interesado non serán tidos en conta pola comisión de valoración. Tampouco serán tidos en conta aqueles servicios que con consecuencia de non ter presentado o interesado a documentación sinalada no parágrafo anterior non poidan ser encadrados na correspondente área.
Non obstante, a comisión de valoración poderá, se o estima oportuno, requirir dos concursantes a presentación dos documentos adicionais, aclaracións e probas que consideren necesarios.
Sexta.-Comisión de valoración.
Os méritos serán valorados por unha comisión integrada polos membros que a seguir se indican:
A) Titulares:
Presidente: José Luis Meilán Gil, rector da Universidade da Coruña.
Vocais:
Víctor M. Cabrera Sánchez, xerente da Universidade da Coruña.
Marta María García Pérez, secretaria xeral da Universidade da Coruña.
Juan Pombo Prieto, xefe de Sección de Tesourería.
Dous representantes propostos pola Xunta de Persoal Funcionario.
Secretario: Daniel Miguélez Costa, xefe de Sección Selec. e Form. do Persoal.
B) Suplentes:
Presidente: Alejandro Pazos Sierra, vicerrector de Ordenación Académica.
Vocais:
José Vicente Echevarría González, vicexerente de Recursos Humanos.
José Luis Mínguez Goyanes, vicesecretario xeral.
Eduardo Reigosa Fernández, xefe de Sección de Control Interno.
Dous representantes propostos pola Xunta de Persoal Funcionario.
Secretario: Silverio Díaz Vazquez, xefe de Sección de Retribución e Acc. Social.
Naqueles epígrafes do baremo en que para establece-la puntuación sexa preciso presentar por cada un dos membros da comisión a súa puntuación particular, a dita puntuación obtiverase coa media aritmética das outorgadas por cada un dos membros da comisión, debendo desbotarse para estes efectos a máxima e a mínima concedidas ou, se é o caso, unha das que aparezan repetidas como tales.
A comisión de valoración poderá solicitar da autoridade convocante a designación de expertos que, en calidade de asesores, actuarán con voz pero sen voto.
Sétima.-Resolución do concurso e toma de posesión.
A orde de prioridade para a adxudicación dos postos virá dada pola puntuación total obtida, sumados, se é o caso, os resultados finais das dúas fases. No caso de empate na puntuación darase preferencia ó aspirante que tivera máis puntuación na segunda fase e, se é o caso, ó que obtera máis puntuación na valoración dos méritos consignados no punto 6 da base terceira. De persisti-lo empate, darase preferencia ó de maior antigüidade na Administración.
Rematado os traballos de valoración de méritos, a comisión de valoración fará públicas, no taboleiro de anuncios do Rectorado da Coruña e Vicerrectorado de Ferrol, as puntuacións obtidas polos aspirantes por cada concepto, así como a proposta de adxudicación correspondente, a fin de que este poida reclamarse contra a mesma no prazo de dez días contados a partir da súa publicación.
Transcorrido este prazo, a comisión elevará ó rector a proposta definitiva de adxudicación de prazas a favor dos solicitantes que obtivesen a maior puntuación, especificando, se é o caso, as prazas que quedaran desertas.
O prazo de toma de posesión no novo destino será de tres días desde a resolución do concurso se non implica cambio de residencia do funcionario, ou dun mes se comporta cambio de residencia. Non obstante, a incorporación poderá demorarse ata seis meses por esixencias do normal funcionamento dos servicios.
O prazo de toma de posesión empezará a contarse a partir do día seguinte ó do cesamento, que deberá efectuarse dentro dos tres días seguintes á publicación da resolución do concurso no taboleiro de anuncios do rectorado desta universidade.
A presente convocatoria e os actos que dela se deriven poderán ser impugnados de acordo co previsto na vixente Lei de réxime xurídico das administracións públicas e do procedemento administrativo común.
A Coruña, 7 de xaneiro de 2002.
José Luis Meilán Gil
Rector da Universidade da Coruña
