Como consecuencia da Lei 20/1992, do 7 de xullo, de modificación da Lei 22/1987, do 11 de novembro, levouse a cabo un importante cambio no sistema rexistral mediante unha desconcentración funcional na que as comunidades autónomas deben determina-la estructura e funcionamento do Rexistro Xeral da Propiedade Intelectual nos seus territorios.
O Real decreto lexislativo 1/1996, do 12 de abril, polo que se aproba o texto refundido da Lei de propiedade intelectual, sinala no seu artigo 144 que o Rexistro da Propiedade Intelectual terá carácter único en todo o territorio nacional. O Regulamento do rexistro xeral da propiedade intelectual, aprobado polo Real decreto 733/1993, do 14 de maio, regula unha organización descentralizada deste rexistro, do que deben formar parte os rexistros territoriais establecidos e xestionados polas comunidades autónomas.
O Real decreto 1825/1998, do 28 de agosto, traspasa as funcións en materia de execución da lexislación sobre a propiedade intelectual da Administración do Estado á Comunidade Autónoma de Galicia.
O Decreto 60/1999, do 11 de marzo, de asunción das funcións e servicios transferidos á Comunidade Autónoma de Galicia polo Real decreto 1825/1998, asume as funcións e os medios traspasados en materia de execución da lexislación sobre propiedade intelectual, e asigna á Consellería de Cultura, Comunicación Social e Turismo as funcións e servicios asumidos. Faculta o conselleiro de Cultura, Comunicación Social e Turismo para dicta-las disposicións que sexan necesarias para o desenvolvemento e execución do decreto e para adopta-las medidas precisas para a efectividade e executividade das funcións traspasadas.
En virtude do cal,
DISPOÑO:
Artigo 1º.
Establécese o Rexistro da Propiedade Intelectual de Galicia, con sede en Santiago de Compostela, no Centro Superior Bibliográfico de Galicia, como Rexistro Territorial integrado no Rexistro Xeral da Propiedade Intelectual.
Artigo 2º.
O Rexistro Territorial da Propiedade Intelectual de Galicia disporá de oficinas de presentación de solicitudes e información na Coruña, Lugo, Ourense, Pontevedra, Vigo, Ferrol e Santiago de Compostela.
Artigo 3º.
O Rexistro Territorial da Propiedade Intelectual de Galicia iniciará o seu funcionamento o día 1 de xaneiro de 2002.
Santiago de Compostela, 20 de novembro de 2001.
Jesús Pérez Varela
Conselleiro de Cultura, Comunicación Social e Turismo