A Dirección Xeral de Patrimonio Cultural, por Resolución do 8 de febreiro de 2000 (Diario Oficial de Galicia do 9 de marzo), incoou expediente para a declaración de ben de interese cultural con categoría de monumento a favor do pazo de Santa Cruz de Ribadulla e os seus xardíns.
A tramitación do expediente levouse a cabo segundo o establecido na Lei 8/1995, do 30 de outubro, do patrimonio cultural de Galicia, e demais disposicións vixentes.
Tendo en conta o disposto no artigo 12 da Lei 8/1995, do 30 de outubro, do patrimonio cultural de Galicia, por proposta do conselleiro de Cultura, Comunicación Social e Turismo e logo de deliberación do Consello da Xunta de Galicia na súa reunión do día once de decembro de dous mil un,
DISPOÑO:
Artigo 1º
Declarar ben de interese cultural, coa categoría de monumento, o pazo de Santa Cruz de Ribadulla e os seus xardíns, sitos no concello de Vedra, provincia da Coruña.
Artigo 2º
A zona afectada pola declaración é a comprendida na delimitación escrita contida no anexo I e no plano recollido no anexo II.
Artigo 3º
Este decreto será notificado ó Rexistro Xeral de Bens de Interese Cultural do Estado, ó Rexistro de Bens de Interese Cultural de Galicia, ó Concello de Vedra e ós demais interesados no expediente.
Artigo 4º
Este decreto será publicado no Diario Oficial de Galicia e no Boletín Oficial del Estado.
Disposición derradeira
Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, once de decembro de dous mil un.
Manuel Fraga Iribarne
Presidente
Jesús Pérez Varela
Conselleiro de Cultura, Comunicación Social
e Turismo
ANEXO I
1-2 Estrada de Padrón á Ponte Ulla, desde o río ata o punto onde o muro de cerramento do predio cambia de dirección.
2-3 Liña que desde a esquina do muro de cerramento do predio segue paralelo a este e se une de novo á estrada de Padrón á Ponte Ulla no punto onde esta se cruza co camiño que leva ó núcleo de Outeiro.
3-4 En Outeiro, cruzamento á esquerda que sobe rodeando a muralla ata chegar ó lugar de Sol, na estrada de Vedra a Santa Cruz de Ribadulla.
4-5 Desde Sol, seguindo pola estrada que conduce á entrada do pazo, pasando polo núcleo da Torre de Abaixo ata chegar ó punto onde cruza o río.
5-1 Ribeira do río desde a estrada que conduce á entrada do pazo, ata a estrada de Padrón á Ponte Ulla.