O número 11 da base sexta a) da resolución da División de Recursos Humanos do Servicio Galego de Saúde do 20 de marzo de 2001 (DOG nº 63, do 29 de marzo), pola que se convoca concurso-oposición para o ingreso en determinadas categorías de persoal estatutario do Servicio Galego de Saúde, dispón que se o tribunal, de oficio, ou de acordo coas reclamacións que os interesados poidan presentar, anulase algunha ou algunhas das preguntas incluídas nun exercicio, o anunciará publicamente xunto coa publicación das puntuacións dos distintos exercicios da fase de oposición, nos taboleiros de anuncios dos servicios centrais e periféricos da Consellería de Sanidade e Servicios Sociais e do Sergas.

Polo tanto, adoptado acordo sobre a modificación de respostas ou sobre a anulación, de selo caso, de preguntas do segundo exercicio da fase de oposición, á vista das impugnacións presentadas en prazo contra o exame, o tribunal das categorías do grupo auxiliar da función administrativa e de persoal de servicios xerais confirmou o seu modelo definitivo de respostas correctas polo que, para este efecto, a estimación ou desestimación das ditas impugnacións se entenden implícitas nesta resolución, que publica as listaxes de puntuación outorgadas ós aspirantes no segundo exercicio.

Así pois, cómpre agora darlle publicidade no DOG, facultándose para iso expresamente a esta División de Recursos Humanos do Servicio Galego de Saúde, polo que,

RESOLVE:

Primeiro.-Publica-las puntuacións acadadas polos aspirantes presentados ó segundo exercicio da fase de oposición das categorías do grupo auxiliar da función administrativa e de persoal de servicios xerais, e anula-la pregunta nº 3 do segundo chamamento da categoría de persoal de servicios xerais, que será substituída pola pregunta correlativa de reserva.

Segundo.-Declarar aptos a todos aqueles aspirantes que obtivesen, neste segundo exercicio da fase de oposición, unha puntuación igual ou superior a 40 puntos nas categorías do grupo auxiliar da función administrativa e de persoal de servicios xerais.

Terceiro.-Declarar expresamente excluídos do concurso-oposición a todos aqueles aspirantes que non acadasen a dita puntuación na respectiva categoría.

Cuarto.-Contra esta resolución os interesados poderán presentar reclamación perante o tribunal no prazo de cinco días naturais, contados a partir do día seguinte ó da súa publicación no Diario Oficial de Galicia.

Santiago de Compostela, 21 de novembro de 2001.

Valeriano Martínez García

Director xeral da División de Recursos Humanos