A Orde do 21 de maio de 2001, pola que se particulariza para o exercicio orzamentario 2001 o procedemento de concesión de axudas para a promoción, fomento da calidade e busca de novas saídas comerciais dos productos da pesca, o marisqueo e a acuicultura (Diario Oficial de Galicia nº 108, do 5 de xuño), establece no seu artigo 1 o importe da contía máxima das axudas que ó abeiro desta poderán ser concedidas ós seus solicitantes.
Non obstante, e como no mesmo programa de gasto destinado para o efecto existen outras dotacións que poden ser utilizadas para os mesmos fins, cómpre amplia-lo importe da contía máxima das axudas que poderán ser concedidas ó abeiro da referida Orde do 21 de maio de 2001, coa finalidade de facer chegar estas ó maior número de beneficiarios posible.
Por todo o exposto e no uso das facultades que me foron conferidas,
DISPOÑO:
Artigo único.
Primeiro.-Amplíase o importe da contía máxima que se van conceder ó abeiro da Orde do 21 de maio de 2001 (Diario Oficial de Galicia nº 108, do 5 de xuño), na cantidade de 6.293.000 pesetas e con cargo á aplicación orzamentaria 12.03.722B.770.0 que figura dotada nos orzamentos xerais da Comunidade Autónoma de Galicia para 2001.
Segundo.-Esta modificación non afecta ó prazo establecido na referida orde para a presentación de solicitudes.
Santiago de Compostela, 20 de novembro de 2001.
Enrique C. López Veiga
Conselleiro de Pesca, Marisqueo e Acuicultura