O artigo 20 da Lei orgánica 15/1999, do 13 de decembro, de protección de datos de carácter persoal (BOE nº 298, do 14 de decembro), especifica que a creación, modificación ou supresión dos ficheiros das administracións públicas só poderá facerse mediante a disposición xeral correspondente.
Na súa virtude, a Consellería da Presidencia e Administración Pública
DISPÓN:
Artigo 1º
Mediante esta orde a Secretaría Xeral para as Relacións cos Medios Informativos crea o ficheiro especificado no anexo, que contén a información esixida no artigo 20.2º da Lei orgánica 15/1999, do 13 de decembro, de protección de datos de carácter persoal para as disposicións de creación dos ficheiros.
Artigo 2º
O titular do órgano responsable deste ficheiro adoptará as medidas de xestión e organización que sexan necesarias, asegurando a confidencialidade, dereitos e obrigas recoñecidos na Lei orgánica 15/1999, do 13 de decembro.
Artigo 3º
Os datos de carácter persoal, rexistrados no ficheiro da Secretaría Xeral para as Relacións cos Medios Informativos, ó que se refire o anexo, só serán utilizados para os fins expresamente previstos e por persoal debidamente autorizado.
Artigo 4º
Os datos só poderán ser cedidos nos supostos expresamente previstos pola lei.
Disposicións adicionais
No caso de cesións dos datos ós servicios de Estatística das Administracións Públicas haberá que aterse, ademais, ó disposto na normativa vixente sobre materia estatística.
Disposicións derradeiras
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 12 de novembro de 2001.
Jaime Pita Varela
Conselleiro da Presidencia e Administración Pública
ANEXO
Ficheiro de nova creación da Secretaría Xeral para as Relacións cos Medios Informativos.
Habilitado, xestión de pagamentos de habilitación.
a) Finalidade do ficheiro e uso previsto: xestiona-los pagamentos por habilitación da Secretaría Xeral para as Relacións cos Medios Informativos.
b) Persoas ou colectivos sobre os que se pretende obter datos de carácter persoal: empresas que subministren bens ou presten servicios para a Secretaría Xeral para as Relacións cos Medios Informativos.
c) Medidas de seguridade: nivel básico. As medidas de seguridade polas que se rexerá este ficheiro están especificadas no correspondente documento de seguridade.
d) Datos de carácter persoal recollidos:
-Datos de carácter identificativo: NIF, nome e apelidos, enderezo, localidade, código postal, concello, provincia, teléfono, fax, correo electrónico.
-Datos de información comercial: actividades e negocios.
-Datos económico-financeiros: datos bancarios, bens e servicios subministrados, transaccións financeiras e tipo de provedor para facenda.
e) Órgano responsable do ficheiro: Secretaría Xeral para as Relacións cos Medios Informativos, dependente organicamente da Consellería da Presidencia e Administración Pública.
f) Os dereitos de acceso, rectificación, cancelación e oposición de datos que constan no ficheiro poderán exercerse, se é o caso, ante a unidade ou dependencia responsable do ficheiro, sita no edificio administrativo San Caetano, s/n, 15704 Santiago de Compostela.
g) A responsabilidade de seguridade correspóndelle á Secretaría Xeral para as Relacións cos Medios Informativos.
h) Procedemento de recollida de datos: obtéñense das facturas ou documentos substitutivos emitidos polos provedores.
i) Cesión de datos: ningunha.