O réxime de axudas e subvencións para as empresas cualificadas como Iebt's está establecido na orde da Consellería de Familia e Promoción do Emprego, Muller e Xuventude do 29 de xuño de 2001 (Diario Oficial de Galicia nº 135, do 12 de xullo) en relación coa Orde do 23 de febreiro de 2001 pola que se establece un programa de apoio ás iniciativas de emprego de base tecnolóxica (Diario Oficial de Galicia nº 47, do 7 de marzo).

O dito réxime ten por finalidade favorece-la creación de emprego en pequenas empresas de carácter innovador con contido científico e/ou tecnolóxico a través dunha graduación da contía da axuda por cada emprego creado en atención a diferentes criterios relacionados coa concorrencia de determinados gastos que se configuran na orde citada como diferentes modalidades dunha axuda única e ten por obxecto promove-la creación de novos empregos.

Como axuda ó emprego queda sometida á normativa europea relativa ó desenvolvemento rexional mediante o apoio ós investimentos e á creación de emprego.

Polo exposto, e para a adecuación do dito réxime de axudas ó dereito comunitario,

DISPOÑO:

Artigo único.

1. O réxime de axudas e subvencións ás empresas cualificadas como iniciativas de emprego de base tecnolóxica establecido na Orde do 29 de xuño de 2001 (Diario Oficial de Galicia nº 135, do 12 de xullo), seralle de aplicación o Regulamento (CE) 70/2001, da comisión, do 12 de xaneiro de 2001, relativo á aplicación dos artigos 87 e 88 do Tratado CE ás axudas estatais ás pequenas e medianas empresas (DOCE nº L10, do 13 de xaneiro).

2. Non obstante o anterior, a axuda correspondente ós postos de traballo creados no ano 2000 que poidan ser obxecto de subvención non poderán excede-los límites cuantitativos establecidos no Regulamento (CE) 69/2001, da comisión, do 12 de xaneiro de 2001, relativo á aplicación dos artigos 87 e 88 do Tratado CE ás axudas de minimis (DOCE nº L10, do 13 de xaneiro).

3. En consecuencia, xa non é de aplicación a condición establecida para o pagamento no artigo 16.4º da Orde do 29 de xuño de 2001.

Disposicións derradeiras

Primeira.-Facúltase o director xeral de Fomento do Emprego para que dicte, no ámbito da súas competencias, as resolucións e aclaracións necesarias para o desenvolvemento e cumprimento desta orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 3 de outubro de 2001.

Manuela López Besteiro

Conselleira de Familia e Promoción do Emprego,

Muller e Xuventude