Considerando as insuficiencias tanto orzamentarias como de tesourería formuladas por diversos concellos, respecto do reintegro total dos anticipos concedidos para poder facer fronte ás obras de reparación urxentes e necesarias derivadas dos danos ocasionados polos temporais de outubro 2000 - marzo 2001, considérase necesario flexibiliza-los requisitos recollidos no punto terceiro do acordo do Consello da Xunta de Galicia do 5 de xullo, establecendo o seu reintegro no importe correspondente á suma da subvención do Ministerio de Administracións Públicas e das subvencións que se concedían en virtude do dito acordo, e permitindo cancela-lo resto na forma prevista no convenio subscrito coa FEGAMP. O que se somete á consideración do Consello da Xunta de Galicia.
En consecuencia, o Consello da Xunta de Galicia, na súa reunión do once de outubro de dous mil un, adoptou por proposta do conselleiro de Economía e Facenda o seguinte
ACORDO:
Modifícase o punto terceiro do acordo do Consello da Xunta de Galicia do 5 de xullo de 2001, que queda redactado como segue:
«A eficacia das citadas subvencións queda condicionada a que as deputacións provinciais procedan ó reintegro dos anticipos concedidos por acordo do Consello da Xunta do 16 de febreiro de 2001, alomenos pola suma das asignacións concedidas polo Ministerio de Administracións Públicas e das subvencións que se concedan en virtude deste acordo.
A cancelación do resto do anticipo realizarase nos termos previstos na cláusula terceira do convenio subscrito coa FEGAMP.
Non obstante o establecido nos parágrafos anteriores, poderán compensarse os importes que deban reintegra-los concellos coas subvencións que se concedan por este acordo».
O gasto que comporten as citadas subvencións imputarase á aplicación orzamentaria 21.01.811A.760.0.
Santiago de Compostela, 11 de outubro de 2001.
José Antonio Orza Fernández
Conselleiro de Economía e Facenda