A Fundación Galicia Europa convoca oito bolsas para financia-la estadía non remunerada en institucións comunitarias ó longo do ano 2002 de licenciados ou titulados superiores que realizasen os seus estudios nalgunha das universidades galegas.
1. Requisitos:
1. Posuí-lo compromiso escrito da correspondente institución no que se acepte a solicitude do candidato para a realización dunha estadía non remunerada.
2. Contar cun expediente académico universitario con, alomenos, media de notable.
3. Acredita-lo coñecemento dunha lingua comunitaria de traballo, ademais do castelán e do galego.
4. Ser menor de 30 anos.
5. Posuír veciñanza civil galega no momento da publicación deste anuncio.
6. Posuí-la nacionalidade dalgún dos estados membros da Unión Europea.
2. Selección:
A Fundación Galicia Europa efectuará a selección dos peticionarios, en función dos méritos acreditados entre aqueles que sexan admitidos polas correspondentes institucións.
Entre eses méritos serán de especial consideración a realización en Galicia de estudios universitarios oficiais de postgrao sobre asuntos de integración europea axeitados á realidade galega e doutros equivalentes en centros europeos de referencia.
A resolución destas bolsas realizararase de xeito inmediato segundo a orde de recepción das solicitudes ata esgota-lo crédito orzamentado.
3. Duración:
O financiamento da bolsa será ata un máximo de cinco meses de duración por estadía.
4. Contía:
A contía da bolsa será de 902 A por mes (150.080 pesetas/mes) para aloxamento e manutención. Os gastos de transporte e seguros serán por conta dos candidatos.
Os remanentes que puidesen restar despois da adxudicación das bolsas convocadas poderán ser aplicados ata esgota-lo crédito orzamentario mediante a aprobación de mensualidades adicionais ou soltas.
No suposto de non concederse tódalas axudas, o remanente orzamentario existente podería ser incorporado a calquera das modalidades do programa de actuacións que, con carácter xeral, convoca a Fundación Galicia Europa.
5. Prazo e forma de presentación de solicitudes:
O prazo de presentación de solicitudes rematará o día 30 de outubro de 2002.
Xunto coa solicitude de bolsa, segundo o modelo do anexo I, deberá presentarse currículum vitae e copias do expediente académico e da restante documentación acreditativa do cumprimento dos requisitos esixidos.
As solicitudes deberán presentarse ou dirixirse por correo certificado con xustificante de recepción á Fundación Galicia Europa, rúa Os Feáns, 5-b baixo, 15706 Santiago de Compostela.
Poderase solicitar información adicional de luns a venres, de 9 a 14 horas, polos seguintes medios:
-Teléfono: 981 54 10 12.
-Fax: 981 54 10 13.
-Correo electrónico: santiago*fundaciongaliciaeuropa.org.
-Página web: http://www.fundaciongaliciaeuropa.org.
Santiago de Compostela, 1 de outubro de 2001.
Jaime Pita Varela
Secretario xeral da Fundación Galicia Europa
