Dentro do plan de actividades da Escola Galega de Administración Pública para 2001, e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Revista de Dereito Urbanístico e Medio Ambiente, unhas xornadas sobre o silencio administrativo e a notificación dos actos administrativos; convocatoria que se desenvolverá conforme as seguintes bases:

1. Obxectivos.

A relación que ó abeiro do acto administrativo se establece entre a Administración pública e o administrado vén constituír un dos aspectos de maior relevancia no quefacer cotián dunha sociedade. Para a Administración pública o acto administrativo configúrase como o instrumento mediante o que expresa a súa vontade e pode cumpri-las diversas funcións que ten atribuídas; para o administrado representa o fundamental vehículo da súa relación coa Administración, a través do cal vai experimentar beneficios ou inconvenientes na súa situación xurídica, nos seus dereitos ou intereses.

Dentro do contorno xurídico e administrativo do acto administrativo, as xornadas convocadas dedicarán unha especial atención, desde un tratamento práctico, ó relevante tema da notificación e publicación destes actos, ó significado, alcance, tipoloxía e posición xurisprudencial máis recente sobre o instituto do silencio administrativo, completándose este panorama cun detido estudio sobre algunhas cuestións de tan singular importancia coma de inesgotable interese, como supoñen a revisión de oficio de actos e normas e as medidas cautelares no eido administrativo e contencioso-administrativo, na procura, todo o anterior, de mellora-la aptitude formativa dos destinatarios desta actividade.

2. Contido.

Trataranse estes temas:

-A notificación dos actos administrativos. A súa publicación. Cómputo de prazos.

-Estudio xeral do silencio administrativo. Os actos presuntos positivos e negativos. Sistema de recursos.

-A revisión de oficio de actos e normas. Vía de lesividade e revogación de actos. Rectificación de erros. Experiencia trala Lei 4/1999.

-Medidas cautelares no ámbito administrativo e contencioso-administrativo. Especial referencia á suspensión de actos e normas.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da Delegación Provincial da Consellería da Presidencia e Administración Pública de Ourense (avda. da Habana, nº 79-2º da citada cidade), os días 24 e 25 de outubro de 2001.

5. Inscrición.

-Prazo: remata o luns, día 22 de outubro de 2001.

-Tramitación de solicitudes: as solicitudes irán dirixidas ó director da Escola Galega de Administración Pública; polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión chamando por teléfono, o día 23 de outubro, das 10 ás 14.45 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 24 de setembro de 2001.

Domingo Bello Janeiro

Director da Escola Galega de Administración Pública