Para os efectos previstos no artigo 28 do regulamento para a execución da Lei 13/1989, do 10 de outubro, de montes veciñais en man común, o Decreto 260/1992, do 4 de setembro, e de conformidade co disposto no artigo 60.1º da Lei 30/1992, do 26 de novembro, de réxime xurídico das administracións públicas e do procedemento administrativo común, faise público que o Xurado Provincial de Montes Veciñais en Man Común de Lugo, na sesión que tivo lugar o 12 de xuño de 2001 na sala de xuntas da Delegación Provincial da Consellería de Medio Ambiente, baixo a presidencia do seu delegado provincial, e coa asistencia dos vocais Manuel Martínez Garrido, José Antonio Illán Torrón, Manuel Veiga Franco, Luis Alfonso Casais Fernández (en substitución de Emilio Sánchez Coto) e do secretario Luis Quiroga Arnal, dictou a resolución de clasificar como veciñais en man común os montes seguintes:
-Expediente número: 1/2000.
Denominación: monte de Foilebar (parcela O Pico de Leizán e A Louseira).
Comunidade propietaria: veciños da parroquia de Foilebar.
Concello: O Incio.
Superficie: 28 hectáreas.
Estremas:
Norte: predios particulares de veciños das parroquias de Vilarxoán (Leizán) e Foilebar. Leste: monte veciñal en man común da parroquia de Vilarxoán. Sur: monte veciñal da parroquia de Vilarxoán. Oeste: predios particulares de veciños da parroquia de Foilebar (Covelas) e monte veciñal en man común pertencente á parroquia de Santa Mariña.
A parcela Pico de Cabude queda sen clasificar mentres non se acredite suficientemente o seu aproveitamento polos veciños da parroquia de Foilebar.
-Expediente número: 2/2000.
Denominación: monte de Santa Xusta.
Comunidade propietaria: veciños do lugar de Santa Xusta.
Parroquia: O Mosteiro.
Concello: Cervantes.
Superficie: 16 hectáreas.
Estremas:
Norte: monte do lugar de San Martiño das Cañadas. Leste: predios particulares do lugar de Santa Xusta. Sur: monte do lugar do Fabal. Oeste: termo municipal das Nogais.
Descrición do perímetro:
Polo noroeste comeza no límite entre os termos das Nogais e de Cervantes, no punto de encontro co teso de Rebordelo, baixa augas vertentes separando o monte de Santa Xusta do monte do lugar de San Martiño das Cañadas, ata chegar ós predios particulares que o bordean polo leste, segue polo sur lindando augas vertentes co monte do lugar do Fabal ata o límite entre os termos municipais de Cervantes e As Nogais, e polo oeste, linda co termo municipal das Nogais ata o punto de comezo.
-Expediente número: 3/2000.
Denominación: monte do Fabal.
Comunidade propietaria: veciños do lugar do Fabal.
Parroquia: Vilasante.
Concello: Cervantes.
Superficie: 34 hectáreas.
Estremas:
Norte: monte do lugar de Santa Xusta. Leste: predios particulares. Sur: monte do lugar de Vilasante. Oeste: termo municipal das Nogais.
Descrición do perímetro:
Polo noroeste comeza no límite entre os termos municipais das Nogais e de Cervantes, no punto de encontro co teso de Rebordelos, segue polo devandito teso separando o monte do Fabal do monte do lugar de Santa Xusta, ata os predios particulares que o bordean na dirección leste, chega ó rego de Navallos que o separa polo sur do monte do lugar de Vilasante, ata o límite entre os termos municipais de Cervantes e As Nogais, e polo oeste, linda co termo municipal das Nogais ata o punto de comezo.
-Expediente número: 12/2000.
Denominación: monte Serra de Moncais, Serra da Parte e o Cornado.
Comunidade propietaria: veciños da parroquia da Parte.
Concello: Monforte de Lemos.
Superficie: 119 hectáreas.
Estremas da parcela Serra de Moncais-82 hectáreas:
Norte: predios particulares. Leste: termo municipal da Pobra de Brollón. Sur: devasa do monte pertencente á Comunidade de Veciños da Parroquia de Reigada, e predios particulares. Oeste: predios particulares.
Estremas da parcela Serra da Parte-27 hectáreas:
Norte: límite coa parroquia de Valverde, baixando desde a Serra da Parte ata os predios particulares das casas da Parte. Leste e sur: predios particulares. Oeste: liña divisoria de augas coas parroquias de Valverde e Ribasaltas.
Estremas da parcela O Cornado-10 hectáreas:
Norte e leste: predios particulares. Sur: devasa do monte pertencente á Comunidade de Veciños da Parroquia de Reigada. Oeste: liña divisoria de augas e na máxima pendente que baixa desde o Coto do
Cornado ata o encoro do río Cabe e divide coa parroquia de Ribasaltas.
Contra esta resolución e desde a súa notificación ou publicación, poderá interporse recurso potestativo de reposición no prazo dun mes perante o Xurado Provincial de Montes Veciñais en Man Común de Lugo, ou recurso contencioso-administrativo no prazo de dous meses perante o Xulgado do Contencioso-Administrativo de Lugo, de conformidade co disposto no artigo 46.1º da Lei 29/1998, do 13 de xullo, da xurisdicción contencioso-administrativa, en relación co artigo 12 da Lei de montes veciñais en man común e co artigo 28 de seu regulamento, modificados os dous preceptos legais pola Lei 30/1992, do 26 de novembro, de réxime xurídico das administracións públicas e do procedemento administrativo común.
Lugo, 12 de xuño de 2001.
Luis González Vázquez
Presidente do Xurado Provincial de Montes
Veciñais en Man Común de Lugo
