Segundo a Lei orgánica 1/1981, do 6 de abril, pola que se aprobou o Estatuto de autonomía de Galicia, e o Real decreto 1763/1982, do 24 de xullo, sobre o traspaso de funcións e servicios da Administración do Estado á Comunidade Autónoma de Galicia en materia de educación, correspóndenlle á Consellería de Educación e Ordenación Universitaria as competencias en materia de planificación, regulación e administración do ensino regrado.

No marco destas competencias, a Lei orgánica 1/1990, do 3 de outubro, de ordenación xeral do sistema educativo, no seu artigo 53, prevé que as administracións educativas promovan medidas tendentes a ofertar a tódolos cidadáns a oportunidade de accederen ós niveis ou graos das ensinanzas non obrigatorias cursando ensinanzas de bacharelato nos centros ordinarios, dispoñendo dunha oferta e dunha organización adecuada ás súas características.

O Decreto 88/1999, do 11 de marzo (DOG do 13 de abril), polo que se regula a ordenación xeral das ensinanzas de educación de persoas adultas e os requisitos mínimos dos centros, establece no artigo 5 que a Consellería de Educación e Ordenación Universitaria poderá adapta-lo currículo do bacharelato adecuándoo ás características, condicións e necesidades da poboación adulta, de acordo coas esixencias de organización e metodoloxía da educación de persoas adultas.

Por outra parte, de acordo coa Orde do 14 de abril de 1999 (DOG do 29 de abril), pola que se ordenan e organizan as ensinanzas de bacharelato para adultos na Comunidade Autónoma de Galicia, e coa finalidade de facilita-la continuidade do proceso formativo daquelas persoas adultas que remataron as ensinanzas equivalentes á educación secundaria obrigatoria ou daqueloutras procedentes doutros itinerarios formativos que, reunindo os requisitos esixidos para continuar estudios de bacharelato, desexen cursalas, é necesario autoriza-los centros en que se van impartir estas ensinanzas na Comunidade Autónoma de Galicia.

En consecuencia co anteriormente exposto, a Consellería de Educación e Ordenación Universitaria,

DISPÓN:

Primeiro.-Autorízanse a imparti-las ensinanzas de bacharelato para persoas adultas, segundo o establecido na Orde do 14 de abril de 1999, os centros docentes públicos de educación secundaria que se relacionan no anexo.

Segundo.-A oferta de ensinanzas de bacharelato para persoas adultas coincidirá coa modalidade ou modalidades, se é o caso, que xa estean autorizadas en cada centro para a ensinanza ordinaria.

Disposición derrogatoria

Única.-Quedan derrogadas todas aquelas ordes e disposicións que se opoñan ó cumprimento desta orde.

Disposicións derradeiras

Primeira.-Autorízase a Dirección Xeral de Ordenación Educativa e Formación Profesional a dictar cantas disposicións sexan necesarias para o desenvolvemento da presente orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 15 de maio de 2001.

Celso Currás Fernández

Conselleiro de Educación e Ordenación Universitaria

ANEXO

Provincia da Coruña

Provincia de Lugo

Provincia de Pontevedra