A situación xerada pola aparición da Encefalopatía Esponxiforme Bovina (en diante, EEB), asociada á posibilidade de aparición de novos casos de animais afectados, e a consideración de que as encefalites esponxiformes transmisibles, especialmente a EEB, supoñen un risco en relación co que existe unha grande incerteza sobre a súas bases científicas, obriga a contar co mellor asesoramento posible para a toma de decisións por parte das autoridades responsables.
A prioridade esencial é a adopción de medidas baseadas na aplicación do principio de precaución, é dicir, a aplicación das medidas que se cosideren proporcionais para evitar que o problema acade dimensións incontrolables e tamén o mantemento e a mellora dos sistemas de vixilancia a nivel local, nacional e internacional.
Neste sentido, o mantemento dun nivel de coñecementos expertos actualizados supón un medio imprescindible para avalia-la eficacia dos esforzos de control do problema.
Feitas as consideracións citadas, considérase necesaria a creación dun mecanismo de asesoramento permanente ás autoridades responsables do control destas enfermidades de maneira altamente eficaz para evitarlle á poboación riscos innecesarios por calquera das vías polas que estas enfermidades sexan susceptibles de transmitirse.
En consecuencia, e no uso das facultades conferidas polos artigos 34.6º e 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro
DISPOÑEMOS:
Artigo 1º.-Obxecto.
Créase o Comité Galego de Expertos en Encefalites Esponxiformes Transmisibles (EET), en diante o comité, para o asesoramento e avaliación da xestión destas enfermidades polas autoridades responsables da Xunta de Galicia.
Artigo 2º.-Funcións.
Son funcións do comité:
Facer recomendacións de actuacións xenéricas derivadas do coñecemento da situación epidemiolóxica das EET en Galicia.
Manter unha revisión permanente da evidencia científica que se estea a producir en materia de EET.
Asesorar en todo momento a Xunta de Galicia en todas aquelas cuestións que sobre EET se lle soliciten.
Asisti-la Xunta de Galicia na comunicación de riscos das EET á poboación.
Analiza-los recursos necesarios para o correcto desenvolvemento das actividades de prevención e control das EET en Galicia.
Propoñer e facilita-la incorporación de especialistas dos que a participación no comité se considere necesaria para casos concretos, coordinando e avaliando as actividades levadas a cabo.
Artigo 3º.-Composición.
1. O comité estará composto por un máximo de sete profesionais da Comunidade Autónoma, con demostrada experiencia en aspectos relacionados coas EET, dos cales:
Tres membros serán nomeados por proposta da Consellería de Sanidade e Servicios Sociais.
Tres membros serán nomeados por proposta da Consellería de Agricultura, Gandería e Política Agroalimentaria.
Un membro será nomeado por proposta da Consellería de Medio Ambiente.
Artigo 4º.-Constitución.
O comité deberá reunirse, por primeira vez, no prazo dunha semana contada desde o día seguinte ó da publicación dos nomeamentos no Diario Oficial de Galicia.
Na sesión de constitución procederase por parte dos membros a nomear un voceiro que desempeñará, para tódolos efectos, a representación do comité.
Así mesmo, designarase un secretario que se encargará da elaboración das actas e informes.
Artigo 5º.-Funcionamento.
O comité reunirase por petición da Administración ou por decisión da metade dos seus membros.
De cada reunión o secretario levantará acta na que especificarán os membros asistentes, a orde do día da reunión, as circunstancias de lugar e tempo nas que tivo lugar, os puntos principais das deli
beracións, así como o contido dos acordos adoptados. As actas serán remitidas ó conselleiro da Presidencia e Administración Pública para a súa difusión ás consellerías afectadas.
Disposicións derradeiras
Primeira.-Facúltase a directora xeral de Saúde Pública, o director xeral de Producción Agropecuaria e o director xeral de Calidade e Avaliación Ambiental para adoptar, no ámbito das súas respectivas competencias, as medidas adecuadas en relación coa execución o desenvolvemento desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 8 de xuño de 2001.
José Mª Hernández Cochón
Conselleiro de Sanidade e Servicios Sociais
Juan Miguel Diz Guedes
Conselleiro de Agricultura, Gandería
e Política Agroalimentaria
José Carlos del Álamo Jiménez
Conselleiro de Medio Ambiente
