Dentro do plan de actividades da Escola Galega de Administración Pública para o 2001, e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócase, en colaboración coa Revista de Derecho Urbanístico y Medio Ambiente e co Concello de Sada, un curso de verán sobre aspectos urbanísticos do turismo, convocatoria que se desenvolverá conforme as seguintes bases:

1. Obxectivos.

As tendencias e preferencias tradicionais do turista cambiaron nestes últimos anos. Agora van encamiñadas cara a outros tipos, como o turismo rural, o deportivo, tanto costeiro coma de interior, o cultural, de puro ocio (de aí a aparición dos parques temáticos), simplemente gastronómico, invernal, etc. Estas novas tendencias deben ser tidas en conta á hora de planifica-las necesidades formativas, económicas, industriais, pero tamén deben terse presentes as dotacións e infraestructuras que equilibren a demanda á oferta coa calidade necesaria. E é aquí onde o urbanismo, no seu máis amplo sentido, está chamado a xoga-lo esencial e determinante papel que imos estudiar. É imprescindible a conxunción de turismo e urbanismo á hora de lograr un turismo lóxico, respectuoso co medio e de calidade, e son as administracións xestoras do urbanismo as que deben coñece-las súas necesidades e busca-la mellor solución e a forma de aplicalas mellor.

2. Contido.

Trataranse estes temas:

-A Lei de ordenación e promoción do turismo de Galicia e o seu desenvolvemento regulamentario. Empresas e actividades turísticas.

-A construcción de instalacións turísticas e o territorio: réxime xurídico dos usos urbanísticos e construccións permitidas en solo non urbanizable.

-O réxime xurídico das costas e a súa influencia no urbanismo turístico.

-Réxime xurídico dos portos deportivos.

-Implicacións urbanísticas da lexislación turística.

-Reflexións sobre o futuro turístico e a necesidade de adecuación das normas urbanísticas para o cumprimento dos devanditos fins.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: o curso convocado desenvolverase no auditorio da Casa da Cultura de Sada (A Coruña), sita en avda. do Porto, s/n, da citada localidade, os días 18 e 19 de xullo de 2001.

5. Inscrición.

-Prazo: remata o luns, día 16 de xullo de 2001.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4 - 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión chamando por teléfono, o día 17 de xullo, das 10 ás 14.45 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento do curso, así como o de cancelalo, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate deste curso, a aquelas persoas inscritas que concorresen asiduamente a el, cando a súa asistencia sexa igual ou superior ó 85% das horas lectivas programadas, e expresarase neste documento a natureza da actividade e as datas da súa realización.

Santiago de Compostela, 25 de xuño de 2001.

Domingo Bello Janeiro

Director da Escola Galega de Administración Pública