A orde da Consellería da Presidencia e Administración Pública, do 1 de febreiro de 2001 (DOG do 6 de febreiro), pola que se aproban as bases que rexerán as convocatorias de axudas de bolsas correspondentes á promoción xeral da investigación e se procede a súa convocatoria, prevé, no seu anexo III, a concesión de bolsas para persoal auxiliar de investigación (técnicos especialistas de FP2).
De acordo co establecido na base A.3 do dito anexo, desde o 16 ó 26 de abril de 2001 expuxéronse as listas de solicitudes admitidas e excluídas para a selección de centros habilitados; durante ese mesmo período os interesados puideron formular reclamacións para emendar erros e falta de documentos.
Rematado este prazo e estudiadas as reclamacións presentadas, as solicitudes admitidas foron estudiadas pola Comisión de Selección de Investigación, creada polo Decreto 37/1998, do 30 de xaneiro (DOG
do 6 de febreiro), e a orde da Consellería da Presidencia e Administración Pública do 12 de marzo de 2001 (DOG do 5 de maio).
En consecuencia, atendendo á proposta elaborada pola Comisión de Selección de Investigación en relación co punto A do anexo IV da Orde do 1 de febreiro de 2001 (selección de centros habilitados), esta secretaría xeral
RESOLVE:
Primeiro.-Habilitar para a adscrición de bolseiros especialistas de FP2 os centros que se relacionan no anexo I desta resolución; os restantes centros habilitados suplentes figuran por orden decreciente de prioridade relacionados no anexo II.
A) De conformidade co establecido no punto B.4 do anexo III da orde da convocatoria do 1 de febreiro de 2001, o prazo para que os titulados de FP2 (ou de estudios equivalentes) participen no concurso para a selección de novos bolseiros comprenderá desde o día seguinte ó da publicación desta resolución no DOG ata o 16 de xullo de 2001. Na instancia de solicitude os candidatos indicarán, por orde de preferencia, os códigos dos centros ós que desexen optar no caso de obtención de bolsa; os bolseiros poderán optar a todos aqueles centros titulares (anexo I desta resolución) e ós que figuren na lista de suplentes (anexo II desta resolución).
As solicitudes deberán axustarse ás bases da convocatoria establecidas no anexo III letra B, da citada Orde do 1 de febreiro de 2001.
B) O prazo de exposición das listas de solicitudes admitidas e excluídas, previsto na base B.5 da convocatoria, abarcará desde o 4 ó 14 de setembro de 2001 (ambos incluídos), podendo os interesados, durante o mesmo período, formular reclamacións para emendar erros e faltas de documentos ante a Secretaría Xeral de Investigación e Desenvolvemento, aportando, se é o caso, a documentación necesaria. Transcorrido este prazo sen que se emenden as causas de exclusión, procederase ó arquivo do expediente, notificándollo ó interesado conforme o previsto nos artigos 42 e 71 da Lei 4/1999, do 13 de xaneiro, pola que se modifica a Lei 30/1992, de réxime xurídico das administracións públicas e do procedemento administrativo común.
Segundo.-Contra esta resolución poderán os interesados interpoñer potestativamente recurso de reposición ante o mesmo órgano no prazo dun mes, contado a partir do día seguinte ó da publicación desta resolución no Diario Oficial de Galicia. De non estima-la interposición deste recurso, poderán interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados a partir do día seguinte ó da publicación desta resolución no Diario Oficial de Galicia.
Disposición derradeira
Esta resolución entrará en vigor o día seguinte ó da súa publicación no Diario Oficial de Galicia.
Santiago de Compostela, 28 de maio de 2001.
P.D. (Orde 1-2-2001, DOG do 6 de febreiro)
Miguel A. Ríos Fernández
Secretario xeral de Investigación
e Desenvolvemento