Dentro dos programas de actividades que a Academia Galega de Seguridade ten previsto realizar no ano 2001 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a realización dun curso sobre operadores de radar, que deberá desenvolverse conforme as seguintes bases:

Obxectivos.

Dota-los membros dos corpos das policías locais de Galicia dos coñecementos teóricos e prácticos suficientes para o manexo dos cinemómetros, coas garantías bastantes para unha maior profesionalidade e que poidan garantir ademais a súa preparación técnica adecuada de cara á autoridade xudicial.

Destinatarios.

O curso vai dirixido ós membros dos corpos das policías locais de Galicia que usen ou vaian usa-los cinemómetros que son cedidos pola Dirección Xeral de Tráfico ou ben os propios de cada concello.

Inscrición.

A inscrición dos participantes será totalmente gratuíta.

Prazas.

O número de prazas que se ofertarán neste curso será de 40.

Solicitudes.

1. O persoal que desexe participar neste curso deberá presentar cuberta á máquina ou con letra moi clara a instancia que figura no anexo.

2. O prazo para a presentación de instancias rematará o día 13 de xuño, ás 14 horas.

3. As instancias deberán vir asinadas polo xefe do cadro de persoal, ou polo concelleiro de tráfico e seladas; será isto requisito indispensable para ser admitido no curso.

4. As instancias deberán enviarse á sede da Academia Galega de Seguridade: avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contido e duración.

O curso realizarase en sesións de mañá e tarde, de luns a xoves, e nel trataranse, entre outros, os seguintes temas: 1. Teoría do radar estático e do radar móbil. 2. Técnicas de medición con equipos estáticos e móbiles. 3. Teoría do pórtico e cabinas. 4. Antenas. 5. Teórica da programación do equipo (I e II). 6. Teórica da fotografía co radar (I e II). 7. Cámaras fotográficas. 8. Mandos de programación. 9. Visualización e dixitalización dos negativos do radar. 10. Obtención informatizada de boletíns de denuncias. 11. Prácticas de montaxe, desmontaxe, programación, radar estático, cámaras e radar móbil.

Datas.

O curso realizarase durante os días 18, 19, 20 e 21 de xuño.

O horario será de 9 a 13 e de 16.30 a 20.30 horas.

Hai que ter en conta que o día 18 o horario será completo para todos eles e a partir deste día axustarase

o horario para facer dous grupos, un de mañá e outro de tarde.

Relación de admitidos.

A relación de admitidos publicarase o día 14 de xuño, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.

Lugar.

O curso desenvolverase na sede da Academia Galega de Seguridade, sita na avenida da Cultura, s/n, no concello da Estrada.

Certificado de aproveitamento.

Ó remate do curso entregaráselles un certificado de aproveitamento a aquelas persoas que acrediten a súa participación continuada e superen as correspondentes probas.

Modificacións.

A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.

A Estrada, 22 de maio de 2001.

Juan José Fariñas-Ferro Rodríguez

Director xeral da Academia Galega de Seguridade