Dentro dos programas de actividades que a Academia Galega de Seguridade ten previsto realizar

no ano 2001, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a realización dun curso de Excel 2000, que deberá desenvolverse conforme as seguintes bases:

Obxectivos.

Conseguir que o alumno comprenda a utilidade dunha folla de cálculo e capacitalo para o manexo das funcións máis empregadas neste tipo de aplicación informática.

Destinatarios.

O curso vai dirixido ós membros dos corpos das policías locais de Galicia, membros da unidade do CNP adscrita á Comunidade Autónoma de Galicia que posúan e poidan acreditar coñecementos medios de informática. Para estes efectos teranse en conta todos aqueles que teñan realizado o curso básico na Academia Galega de Seguridade. No caso de quedaren prazas vacantes, ós membros do Corpo Nacional de Policía e Garda Civil.

Inscrición.

A inscrición dos participantes será totalmente gratuíta.

Prazas.

O número de prazas que se ofertan neste curso é de 15.

Solicitudes.

1. O persoal que desexe participar neste curso deberá presentar cuberta á máquina ou con letra moi clara a instancia que figura no anexo.

2. O prazo para a presentación de instancias rematará o día 11 de xuño de 2001, ás 14 horas.

3. As instancias deberán vir asinadas polo xefe do cadro de persoal, ou polo concelleiro de tráfico e seladas; isto será requisito indispensable para ser admitido no curso; o incumprimento deste requisito comportará a non admisión no devandito curso.

4. As instancias deberán enviarse á sede da Academia Galega de Seguridade: avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico

das administracións públicas e do procedemento administrativo común.

Contido e duración.

O curso terá lugar en sesións de tarde, de luns a venres, e nel trataranse, entre outros, os seguintes temas:

a) O interface de Excel.

b) Tipos de datos e formato de celas.

c) Fórmulas básicas.

d) Transferencias relativas, absolutas e mixtas.

e) Funcións: matemáticas básicas, estatísticas e financeiras simples, lóxicas e condicionais e de busca e referencia.

f) Gráficas.

g) Excel como base de datos: ordenación e filtros.

Datas.

O curso terá lugar en datas do 18 ó 22 de xuño de 2001, das 16 ás 20 horas.

Relación de admitidos.

A relación de admitidos publicarase o día 13 de xuño de 2001 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.

Lugar.

O curso desenvolverase na aula de informática da Academia Galega de Seguridade, sita na avda. da Cultura s/n, 36680 A Estrada.

Certificado de aproveitamento.

Ó remate do curso entregaráselles un certificado de aproveitamento a aquelas persoas que acrediten a súa participación continuada a el e superen unha proba de coñecementos.

Modificacións.

A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.

A Estrada, 22 de maio de 2001.

Juan José Fariñas-Ferro Rodríguez

Director xeral da Academia Galega de Seguridade