O Decreto 32/1996, do 25 de xaneiro, polo que se regula a realización de ensaios clínicos na Comunidade Autónoma de Galicia, prevé a acreditación dun comité ético de investigación clínica de referencia que terá como ámbito xeográfico e institucional de actuación a Comunidade Autónoma de Galicia.
En consecuencia, a Orde do 11 de xullo de 1996 crea o Comité Ético de Investigación Clínica de Galicia. No artigo 3º dispón que a composición do comité axustarase ó establecido no Decreto 32/1996, do 25 de xaneiro, e os seus membros nomearanse por orde da Consellería de Sanidade e Servicios Sociais.
En consecuencia, en virtude das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro, a Orde 11 de xullo de 1996, e a disposición adicional primeira do Decreto 32/1996, do 25 de xaneiro, polo que se regula a realización de ensaios clínicos na Comunidade Autónoma de Galicia, por proposta da División de Farmacia e Productos Sanitarios do Servicio Galego de Saúde,
DISPOÑO:
Artigo único.-O nomeamento como membro do Comité Ético de Investigación Clínica de Galicia, creado pola Orde do 11 de xullo de 1996, da persoa que se cita no anexo.
Santiago de Compostela, 9 de maio de 2001.
José María Hernández Cochón
Conselleiro de Sanidade e Servicios Sociais
ANEXO
Novo membro do Comité de Investigación Clínica de Galicia: Pilar Gayoso Diz, xefa da Unidade de Investigación de Ourense.