A Deputación Provincial de Lugo, en sesión que tivo lugar o día 17 de novembro de 1999, aprobou o proxecto número 143 do Plan de Obras e Servicios de 1999 Láncara, estrada provincial A Reboleira-San Martín de Güimil, acondicionamento e mellora do punto quilométrico 1,350 ó 3,500 (concello de Láncara) e, na sesión do 26 de xuño de 2000, acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
A Deputación Provincial de Lugo remitiu a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Relacións Laborais o día 6 de abril de 2001.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable o dito informe tivo entrada no rexistro xeral da Consellería de Xustiza, Interior e Relacións Laborais o día 15 de marzo de 2001.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque, segundo sinala a deputación, se tratase de mellora-la estrada provincial que comunica as zonas de Sarria e Láncara coa N-VI e a autovía do Noroeste, dado que o seu estado actual faría totalmente inadecuado o tráfico rodado nunha zona eminentemente agrícola e gandeira que precisa de comunicacións axeitadas para desenvolve-lo seu labor.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día vinteseis de abril de dous mil un,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, pola Deputación Provincial de Lugo, para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de número 143 do Plan de Obras e Servicios de 1999 Láncara, estrada provincial A Reboleira-San Martín de Güimil, acondicionamento e mellora do punto quilométrico 1,350 ó 3,500 (concello de Láncara).
Santiago de Compostela, vinteseis de abril de dous mil un.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais