A Deputación Provincial de Pontevedra, en sesión que tivo lugar o día 28 de abril de 2000, aprobou o proxecto de alargamento e acondicionamento da estrada de enlace da C-550 coa PO-4503 (concello de Sanxenxo) e, na mesma sesión, acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
A Deputación Provincial de Pontevedra remitiu a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Relacións Laborais o día 9 de abril de 2001.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. O dito informe tivo entrada no rexistro xeral da Consellería de Xustiza, Interior e Relacións Laborais o día 1 de setembro de 2000.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque segundo sinala a deputación, se trata de dar unha rápida solución a grave deterioración do firme actual desta estrada, o que xunto coa súa perigosa sinuosidade e volume de tráfico, determina o elevado número de accidentes rexis
trados na zona, facéndose necesario acometer con urxencia o alargamento da vía e a ampliación do raio das curvas existentes, para mellora-la seguridade vial e a fluidez do tráfico na zona.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais, e logo deliberación do Consello da Xunta de Galicia na súa reunión do día vinteseis de abril de dous mil un.
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, pola Deputación Provincial de Pontevedra, para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de alargamento e acondicionamento da estrada de enlace da C-550 coa PO-4503 (concello de Sanxenxo).
Santiago de Compostela, vinteseis de abril de dous mil un.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais