En execución do plan de actividades da Egap para o ano 2001, a EGAP anuncia a celebración dos actos en conmemoración do Día das Letras Galegas conforme as seguintes bases:
1. Obxectivos.
Con motivo de declara-la Real Academia Galega o Día das Letras Galegas de 2001 dedicado a Eladio Rodríguez González, a EGAP súmase, como institución pública galega, á homenaxe deste galego insigne, organizando unha mesa redonda sobre a súa vida e obra. Esta acción formativa completarase cunha viaxe de interese cultural.
2. Destinatarios.
Na mesa redonda poderá participa-lo persoal das administracións públicas e calquera outra persoa interesada. Á viaxe cultural terá acceso só o persoal ó servicio de calquera das administracións públicas de Galicia (ata 40 prazas); no caso de presentarse máis solicitudes que prazas terá preferencia o persoal da Xunta de Galicia. A inscrición na viaxe implica a obrigatoriedade de asistir á mesa redonda.
3. Desenvolvemento.
3.1. Mesa redonda:
Data: 10 de maio.
Hora: de 13 a 14.30 h.
Lugar: EGAP.
3.2. Viaxe cultural.
Data: 17 de maio.
Para coñece-lo desenvolvemento da viaxe e para todo tipo de información, haberá que contactar co Servicio de Estudios, Investigación e Publicacións. Teléfono: 981 54 62 49.
4. Inscrición.
As solicitudes, segundo o modelo oficial que figura ó final desta convocatoria, irán dirixidas ó director da Escola Galega de Administración Pública, Polígono das Fontiñas, rúa de Madrid, 2-4, 15707 Santiago de Compostela, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
As solicitudes deberán entrar no rexistro da EGAP antes das 10 h do día 10 de maio.
5. Publicación e notificación da selección.
A partir do 10 de maio os solicitantes poderán obte-la confirmación da súa selección chamando por teléfono á EGAP en días laborais de 12 a 14 horas ó número 981 54 62 49 ou ben consultando a lista de seleccionados que se exporá no taboleiro de anuncios deste centro.
Santiago de Compostela, 19 de abril de 2001.
Domingo Bello Janeiro
Director da Escola Galega de Administración Pública