Dentro do plan de actividades da Escola Galega de Administración Pública para 2001 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas sobre tendencias no xornalismo, convocatoria que se desenvolverá conforme as seguintes bases:
1. Obxectivos.
Achegarlles ós funcionarios, ós universitarios e ós cidadáns en xeral as principais innovacións e tendencias no mundo do xornalismo nun momento tan cambiante como o actual no campo da comunicación. Moitas convencións de onte quedaron vellas hoxe e os traballadores das administracións, os universitarios e os cidadáns en xeral deben coñece-las novas claves para entende-lo papel dos medios na sociedade do coñecemento e a comunicación.
2. Contido.
Trataranse estes temas:
-O panorama comunicativo.
-As novas empresas.
-As linguaxes.
-Os xornalistas e o defensor dos lectores.
-Saídas profesionais.
-Os lectores.
-A formación.
-Panorama empresarial.
-Panorama profesional.
-Técnicas de investigación para facer xornalismo.
-Técnicas de especialización para facer xornalismo.
-Xornalismo de servicio nos tempos da Internet.
3. Destinatarios.
Persoal ó servicio da Xunta de Galicia e da Administración local galega e interesados en xeral.
Ós alumnos da Facultade de Ciencias da Información da Universidade de Santiago de Compostela que asistan a estas xornadas recoñeceráselles un crédito de libre configuración por concorrer a esta actividade.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos da EGAP (polígono das Fontiñas, rúa de Madrid, 2-4, Santiago de Compostela) os días 14 e 15 de maio de 2001.
5. Inscrición.
-Prazo: remata o xoves, día 10 de maio de 2001.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando por teléfono, o día
11 de maio, das 10 ás 14.45 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
8. Retransmisión pola Internet.
As persoas interesadas en segui-lo desenvolvemento destas xornadas pola Internet poden facelo a través do seguinte enderezo: www.egap.xunta.es.
Santiago de Compostela, 19 de abril de 2001.
Domingo Bello Janeiro
Director da Escola Galega de Administración
Pública