Dentro do programa de actividades que a Academia Galega de Seguridade ten previsto realizar no ano 2001, conforme as funcións que ten encomendadas pola Lei 4/1992, do 9 de abril, de creación da Academia Galega de Seguridade, anúnciase a realización de 1 curso sobre plans de emerxencia municipal: proxecto e elaboración, que se desenvolverá conforme as seguintes bases:

Obxectivos.

Dota-lo persoal responsable de elaboración de plans de emerxencia municipal dunha formación teórico-práctica que lle facilite a realización de métodos de prevención e planificación necesarios nos seus concellos, en función dos posibles riscos ós que estean expostos.

Destinatarios.

-Persoal técnico dos concellos con responsabilidade na elaboración de plans de emerxencia municipal (Pemu).

-Responsables das agrupacións de voluntarios de protección civil da Comunidade Autónoma de Galicia, que previamente superasen o curso básico de protección civil.

Inscrición.

A inscrición dos participantes será totalmente gratuíta.

Solicitudes.

1. As persoas que desexen participar neste curso presentarán, cuberta á máquina ou con letra moi clara, a instancia que figura no anexo.

2. O prazo para a presentación de instancias será de 15 días naturais a partir do día seguinte ó da publicación desta resolución no Diario Oficial de Galicia.

3. As instancias deberanse enviar á sede da Academia Galega de Seguridade: Avenida da Cultura, 36680, A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contido.

Cartografía. Tipoloxía de riscos. Análise e determinación de riscos. Organización e servicios no plan. Comunicación e información. Arquivos informáticos de elaboración do plan. Catálogo de medios e recursos.

Duración e datas.

O curso terá lugar durante os días 5-6-12 de xuño e cunha duración de 22 horas lectivas, das 9.30 a 19.30.

Prazas.

O número máximo de prazas ofertadas é de 27.

Relación de admitidos.

A relación de admitidos publicarase o día 9 de maio de 2001 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.

Lugar.

O curso realizarase na sede da Academia Galega de Seguridade no concello da Estrada.

Asistencia.

É obrigatoria a asistencia e puntualidade en tódalas actividades do curso. A falta de asistencia, aínda cando sexa xustificada, a máis dun 10% das horas lectivas programadas, determinará a cualificación de «non apto» no curso.

Certificado de aproveitamento.

Ó remate do curso entregaráselles un certificado de asistencia e aproveitamento a aquelas persoas que acrediten a súa asistencia continuada a el e que superen as correspondentes probas de coñecementos.

Modificacións.

A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.

A Estrada, 27 de marzo de 2001.

Juan José Fariñas-Ferro Rodríguez

Director xeral da Academia Galega de Seguridade