Polas ordes da Consellería da Presidencia e Administración Pública que a continuación se citan convocáronse bolsas de predoutoramento correspondentes a diferentes programas do Plan Galego de Investigación e Desenvolvemento Tecnolóxico.
-Orde do 29 de decembro de 1999 (Diario Oficial de Galicia do 31 de xaneiro de 2000): bolsas de predoutoramento do programa de Promoción Xeral da Investigación.
-Orde do 8 de febreiro de 2000 (Diario Oficial de Galicia do 21 de febreiro): bolsas de predoutoramento do programa de Estudios Socioeconómicos e Xurídicos.
-Orde do 8 de febreiro de 2000 (Diario Oficial de Galicia do 22 de febreiro): bolsas de predoutoramento do programa de Biotecnoloxía.
-Orde do 8 de febreiro de 2000 (Diario Oficial de Galicia do 21 de febreiro): bolsas para incorporación de titulados superiores a centros tecnolóxicos de Galicia.
Nas citadas ordes ou nas correspondentes resolucións fixouse o importe destas bolsas en 115.000 pesetas brutas mensuais, pero en tódolos casos se consideraba a posibilidade de incrementa-la dotación das bolsas a partir do 1 de xaneiro do ano 2001, co fin de acada-la total homologación coas bolsas de formación convocadas polo Ministerio de Educación e Cultura.
Considerando que a Secretaría de Estado de Educación e Universidades, por Resolución do 7 de novembro de 2000 (BOE do 21 de novembro), estableceu a contía das bolsas de FPU para o ano 2001 (primeira e segunda anualidade) en 120.000 pesetas/mes, o secretario xeral de Investigación e Desenvolvemento, por delegación do conselleiro da Presidencia e Administración Pública,
RESOLVE:
1. Fixa-la contía mensual das bolsas de predoutoramento concedidas por resolucións da Secretaría Xeral de Investigación e Desenvolvemento do 31 de maio, 12 de xullo, 26 de xullo, 28 de xullo de 2000 (Diario Oficial de Galicia do 14 de xuño, 24 de xullo, 7 de agosto e 25 de agosto, respectivamente) en 120.000 pesetas brutas mensuais desde o 1 de xaneiro do ano 2001 ata a data de remate.
Este incremento financiarase con cargo á mesma aplicación orzamentaria á que se lle imputaron as bolsas (04.07432A 480.0-cód. prox. 04.00.417).
2. Esta disposición pon fin á vía administrativa segundo o disposto no artigo 109 c) da Lei 30/1992, modificada pola Lei 4/1999, de réxime xurídico das administracións públicas e do procedemento administrativo común.
Santiago de Compostela, 3 de abril de 2001.
P.D.
Miguel Ángel Ríos Fernández
Secretario xeral de Investigación e Desenvolvemento