A Comunidade Autónoma de Galicia ten prevista a adquisición dunha participación no capital social da sociedade Regasificadora del Noroeste, S.A., por medio dun contrato de compravenda. Así mesmo, está prevista a sinatura dun acordo entre os socios que regule as relacións entre estes e o réxime de goberno da sociedade, acordándose a submisión a un procedemento de arbitraxe para a solución das cuestións que poidan suscitarse en relación á interpretación e execución do devandito acordo.
A Lei 36/1988, do 5 de decembro, de arbitraxe, permite que as persoas naturais ou xurídicas poidan someter, logo de convenio, á decisión dun ou varios árbitros as cuestións litixiosas xurdidas ou que poidan xurdir, en materias da súa libre disposición conforme a dereito.
A Administración autonómica de Galicia, suxeita para a adopción de decisións ós procedementos legalmente previstos, debe adaptarse no presente caso ó disposto no artigo 22.1º do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, que establece que non se poderá someter a arbitraxe as contendas que se susciten respecto dos dereitos da Facenda da Comunidade Autónoma senón mediante decreto acordado pola Xunta de Galicia.
En consecuencia, por proposta do conselleiro de Economía e Facenda e logo de deliberación do Consello da Xunta de Galicia na súa reunión do día quince de marzo de dous mil un,
DISPOÑO:
Artigo único.
Primeiro.-Acórdase o sometemento a arbitraxe de dereito, nos termos establecidos na Lei 36/1988,
do 5 de decembro, co compromiso expreso de cumpri-la decisión que se adopte, de cantas cuestións litixiosas relativas ós dereitos da facenda da Comunidade Autónoma de Galicia poidan suscitarse en relación ó acordo de accionistas da sociedade Regasificadora del Noroeste, S.A., de acordo co procedemento nel establecido.
Disposición derradeira
O presente decreto entrará en vigor o día da súa publicación no Diario Oficial de Galicia.
Santiago de Compostela, quince de marzo de dous mil un.
Manuel Fraga Iribarne
Presidente
José Antonio Orza Fernández
Conselleiro de Economía e Facenda