A Comisión de Goberno do Concello de Santiago de Compostela, na sesión que tivo lugar o día 29 de xaneiro de 2001, aprobou inicialmente o estudio de detalle da rúa da Choupana II, promovido polos servicios técnicos municipais.

O ámbito obxecto de estudio de detalle é a franxa de solo urbano que dá fronte á estrada de Pontevedra, inclúe as edificacións números 69, 71 e 73 da rúa de Santa Marta, e as dos números 1 ó 25 da rúa da Choupana, e linda coas rúas de Santa Marta e da Choupana, ó norte co solo urbano xa executado de Santa Marta e, no resto de lindes co solo urbanizable programado de Santa Marta.

En cumprimento do que dispón o artigo 44.3º da Lei 1/1997, do solo de Galicia (LSG), o expediente sométese a información pública durante o prazo dun mes, contado a partir do día seguinte ó da publicación deste anuncio no Diario Oficial de Galicia e nun periódico de circulación na provincia. Durante este prazo os interesados poderán consulta-lo expediente na Sección de Planeamento e Xestión e formular por escrito as alegacións que xulguen oportunas.

A aprobación inicial do estudio de detalle determina automaticamente, por aplicación do disposto no artigo 34.2º da LSG, a suspensión do outorgamento de licencias no ámbito obxecto de ordenación para tódolos usos e obras que resulten incompatibles coa ordenación proxectada.

Este anuncio servirá de edicto de notificación, de acordo co previsto no artigo 59.4º da Lei 30/1992, de réxime xurídico das administracións públicas e do procedemento administrativo común, a todos aqueles que, por seren descoñecidos ou ignorarse o seu paradoiro, non poidan ser notificados persoalmente, e que se relacionan no anexo.

Santiago de Compostela, 13 de febreiro de 2001.

Luís Toxo Ramallo

Concelleiro delegado de Urbanismo