Dentro do Plan de actividades da EGAP para o 2001, e conforme coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse cinco cursos prácticos sobre atención telefónica e as novas tecnoloxías na información ó cidadán para persoal da Administración local que deberán desenvolverse de acordo coas seguintes bases:

Primeira.-Obxectivos.

Adestrar e adquirir estructuras axeitadas na atención telefónica cunha metodoloxía de simulación de experiencias e situacións gravadas en vídeo para a súa posterior análise.

Segunda.-Destinatarios.

Persoal ó servicio da Administración local con funcións de atención telefónica integrado nos grupos C, D e E.

Terceira.-Solicitudes.

1. As persoas que desexen participar no curso programado deberán solicitalo no modelo oficial de solicitude que figura ó final da convocatoria, e cubrilo en tódolos epígrafes. Cando solicite o curso máis dun interesado da mesma corporación, o responsable do persoal poderá especifica-la orde de preferencia. No caso de que non se especifique, a EGAP aplicarálle-los criterios de selección ós que se fai referencia na base sétima.

2. A falsidade ou ocultación de datos esenciais para a selección será motivo de exclusión automática.

Cuarta.-Tramitación de solicitudes.

As solicitudes irán dirixidas ó director da Escola Galega de Administración Pública e presentaranse no rexistro da EGAP, r/ Madrid, 2-4, 15707 Santiago de Compostela, ou tramitaranse por calquera das outras formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

A seguir efectuarase a selección dos participantes e esta notificaráselles directamente ós admitidos.

Quinta.-Prazo.

O prazo de presentación de instancias será de 15 días naturais, contados a partir da data de publicación da convocatoria.

Sexta.-Requisitos dos participantes.

O cumprimento do requisito esixido na base segunda deberá acreditarse mediante certificación expedida conforme o modelo oficial que figura como anexo I desta resolución.

Sétima.-Selección.

Os criterios de selección, dirixidos a concilia-las necesidades da organización na que prestan servicios os aspirantes e os intereses individuais destes, terán en conta a maior relación do posto de traballo desempeñado co contido do curso. Terán preferencia aqueles que non realizasen algún curso de similares características ó convocado. En calquera caso, os criterios de selección suxeitaranse ás directrices sinaladas na Resolución do 27 de xuño de 1994 (DOG nº 149, do 3 de agosto), pola que se fan públicos os criterios de participación nas actividades docentes da EGAP.

Oitava.-Modificacións.

A EGAP poderá modifica-lo desenvolvemento e mailo contido do curso anunciado para adaptalo ás necesidades da Administración e ás continxencias que poidan xurdir.

A EGAP reserva para si a facultade de anula-lo curso se o escaso número de solicitudes non xustificase a súa realización. Fíxase en 15 o número mínimo de asistentes.

Novena.-Desenvolvemento.

9.1. Duración: 17 horas.

9.2. Lugares e datas:

Santiago de Compostela: 23, 24, 25, 26 e 27 de abril.

A Coruña: 2, 3, 4, 7 e 8 de maio.

Lugo: 8, 9, 10, 11 e 14 de maio.

Ourense: 21, 22, 23, 24 e 25 de maio.

Pontevedra: 31 de maio e 1, 4, 5 e 6 de xuño.

9.3. Horarios: de 17 a 20.30 horas.

9.4. Prazas: 15 en cada localidade.

Décima.-Certificado de asistencia.

Outorgaráselles certificado de asistencia ós alumnos que participen con regularidade no curso, e é obrigatoria a asistencia a tódalas sesións. Toda inasistencia deberá ser xustificada convenientemente, sen que poida exceder en ningún caso do 15% das horas lectivas programadas.

Unha inasistencia superior ó 15% das horas lectivas programadas, aínda que sexa xustificada, impedirá a expedición do correspondente certificado.

Onceava.-Contido.

Chamadas para dar ou transmitir información. Transferencia de chamadas a un compañeiro/a. Transferencia de chamadas a un xefe/a. Chamadas que presentan unha queixa ou unha reclamación. Novas tecnoloxías: sistemas de distribución de chamadas. Internet: webs de interese. Base de datos documentais.

Santiago de Compostela, 23 de febreiro de 2001.

Domingo Bello Janeiro

Director da Escola Galega de Administración Pública

ANEXO I

Don/Dona

responsable dos servicios de persoal na entidade local

CERTIFICO:

Que don/dona ,

no desempeño do seu posto de traballo realiza tarefas directamente relacionadas co contido do curso solicitado.

..., ... de ... de 2001.

Asdo.: