Por Resolución do 9 de febreiro de 2001 reestructúrase o equipo de goberno na universidade, suprimíndose o Vicerrectorado de Coordinación do Campus de Santiago de Compostela e a creación do Vicerrectorado de Xestión de Infraestructuras e procedéndose tamén a unha reordenación na dependencia de determinados servicios.
Ademais, a resolución de delegación de funcións do 1-2-2000 (DOG do 1 de marzo), non incorporaba algunhas competencias como a derivada da xestión do cuarto ciclo universitario, competencia que procede incorporar á delegación de funcións.
Por todo o anterior, este rectorado resolveu modifica-la Resolución do 1 de febreiro de 2000 no seguinte sentido:
-O artigo cuarto, letra e), queda redactado do seguinte xeito:
«e) Queda delegada no vicerrector de Infraestructuras:
I. A presidencia da comisión electoral e a execución das súas resolucións.
II. A coordinación e xestión das actuacións da Oficina de Xestión de Infraestructuras, da oficina de Arquitectura e Urbanismo, do Servicio de Comunicacións e dos servicios informáticos.
III. O seguimento e a xestión de contratos de obras e das infraestructuras da USC, sen prexuízo das facultades delegadas ó vicerrector de Asuntos Económicos.
IV. A solicitude de licencias e outros actos de tramitación perante outras administracións públicas, contratistas ou terceiros en materias relacionadas no punto anterior.
V. A dirección operativa do Servimav e do Centro de Competencia de Innovación Educativa e Tecnoloxías da Información e a Comunicación».
-No artigo cuarto, letra f), introdúcense os puntos 6 e 7 coa seguinte redacción:
«6. Os actos e resolucións derivados do cuarto ciclo universitario.
7. A coordinación e dirección dos servicios que se lle encomenden».
-No artigo cuarto, letra g), introdúcese o punto 4 do seguinte teor:
«4. A dirección operativa do Gabinete de Comunicacións».
-No artigo cuarto, letra h), no punto 1. modifícase «Sistema Universitario de Residencias» por «Servicio Universitario de Residencias».
-No artigo cuarto, letra h), introdúcese o punto 13 co seguinte teor literal:
«13. A dirección operativa do COIE».
-No artigo cuarto, letra l), engádese un novo punto 6 da seguinte redacción:
«6. A convocatoria, resolución e impugnación de axudas en materia de normalización lingüística».
-No artigo sétimo introdúcese o punto 22, que queda redactado do seguinte modo:
«22. As derivadas da coordinación da prevención de riscos da USC».
Santiago de Compostela, 20 de febreiro de 2001.
F. Darío Villanueva Prieto
Rector da Universidade de Santiago de Compostela