Resolución da alcaldía sobre consideración como solo non urbanizable común dos predios que, cunha superficie superior á unidade mínima de cultivo, posúen a súa maior parte nese solo e a restante no de núcleo rural, e outorgamento de licencias de construcción de vivendas unifamiliares neses predios.

O alcalde, o 14 de novembro de 2000, de conformidade coas atribucións conferidas pola lexislación de réxime local e artigo 21 da Lei 30/1992, do 26 de novembro, de réxime xurídico das administracións públicas e do procedemento administrativo común, resolveu:

Primeiro.-Declarar que -sendo esixencia da normativa urbanística no eido do planeamento, que as delimitacións das clasificacións do solo coincidan, entre outras determinacións, cos seus límites par

celarios- aquelas parcelas que, cunha superficie superior ós 2.000 m, posúan a maior parte da súa extensión dentro do solo grafado polo Plan xeral de ordenación como non urbanizable común, e non a súa totalidade por conterse a restante na delimitación dun solo de núcleo rural sen acada-la superficie mínima edificable de 500 m, considéranse por esta Administración municipal como solo non urbanizable de tipo común para a concesión de licencias de edificación de vivendas unifamiliares. Ó respecto, computará exclusivamente a superficie de solo de núcleo, para os efectos de acada-la parcela mínima edificable naquel solo non urbanizable, asimilable pola Lei 1/1997 ó rústico.

Segundo.-Dispoñer, por conseguinte, o outorgamento das licencias de edificación de vivendas unifamiliares que se soliciten naquelas parcelas incluídas no suposto comprendido no epígrafe anterior, aplicándose o réxime do solo rústico establecido no artigo 77 da Lei 1/1997, do solo de Galicia, tendo que cumprirse, nembargantes, as seguintes condicións para a concesión das licencias:

a) A parcela limitarase á realidade parcelaria existente previa á aprobación do PXOU (18-12-1989) excluíndo modificacións posteriores.

b) Os parámetros urbanísticos de aplicación serán os do artigo 142 do PXOU, reguladores do solo non urbanizable común.

c) A edificación construirase na parte grafada no solo non urbanizable común.

d) O promotor aceptará a obriga de inscribi-la indivisibilidade da parcela, consonte o establecido no artigo 173 da Lei 1/1997, do solo de Galicia.

e) O promotor procederá á cesión gratuíta dos terreos afectados pola regularización do viario, conforme o establecido no artigo 76.3º da Lei 1/1997, do solo de Galicia e tamén a obriga de conexión, de se-lo caso, ós servicios urbanísticos que existisen no núcleo.

Pontevedra, 8 de xaneiro de 2001.

Julio Dapena Outomuro

Secretario xeral

P.D.

Xosé Cesáreo Mosquera Lorenzo

Teniente alcalde delegado da Área de Urbanismo e Medio Ambiente