Visto o expediente de recoñecemento de interese galego e inscrición no Rexistro de Fundacións de Interese Galego da Fundación Enclave, con domicilio en Santiago de Compostela.
Supostos de feito:
Primeiro.-Xoán Manuel Rama Trillo, na súa calidade de secretario da fundación, en escrito do 1 de agosto de 2000, formulou solicitude de clasificación para os efectos da súa inscrición no Rexistro de Fundacións de Interese Galego.
Segundo.-A fundación foi constituída en escritura pública outorgada en Santiago de Compostela, o día 24 de xullo de 2000, ante o notario do Ilustre Colexio da Coruña, José Antonio Montero Pardo, co número mil catrocentos dez do seu protocolo.
Terceiro.-A comisión integrada polos secretarios xerais de tódalas consellerías eleva ó conselleiro da Presidencia e Administración Pública proposta de clasificación como de interese da Fundación Enclave, dado o seu obxecto e finalidade, polo que, véndose cumpridos os requisitos esixidos na Lei 7/1983, do 22 de xuño, de réxime das fundacións de interese galego, modificada por Lei 11/1991, do 8 de novembro, na Lei estatal 30/1994, do 24 de novembro, de fundacións e incentivos fiscais á participación privada en actividades de interese xeral, e segundo establece o artigo 32.1º e 2º do Regulamento de organización e funcionamento do protectorado das fundacións de interese galego, aprobado por Decreto 248/1992, do 18 de xuño, procede a súa clasificación como de interese e a súa adscrición á Consellería de Cultura, Comunicación Social e Turismo.
Cuarto.-Á vista da proposta da comisión de secretarios xerais, por orde da Consellería da Presidencia e Administración Pública, do 4 de decembro de 2000 (Diario Oficial de Galicia nº 4, do 5 de xaneiro de 2001), clasificouse como de interese a Fundación Enclave, en cumprimento do disposto no artigo 32.2º c) do Regulamento de organización e funcionamento do protectorado das fundacións de interese galego.
Quinto.-Segundo consta no artigo cinco dos seus estatutos, o obxecto da fundación é:
a) O fomento e a realización de actividades culturais que teñan por fin o estudio e o desenvolvemento do pensamento político, social, económico e cultural de Galicia.
b) Fomenta-lo estudio e a investigación en materia de formación da cidadanía galega.
c) Colaborar no estudio das necesidades de formación e cualificación da colectividade galega en función das demandas sociais, do desenvolvemento rexional, tecnolóxico e económico.
d) Prestar atención especial ó estudio e á formación de sectores sociais desfavorecidos, con necesidades especiais ou de integración, co fin de conseguir un progreso social e solidario para a totalidade dos galegos.
e) Difundi-lo pensamento político daquelas persoas e entidades que traballan, dentro da legalidade vixente, pola consecución da soberanía da nación galega, o progreso social e a profundación da democracia na perspectiva de acadar unha sociedade galega e mundial máis libre, xusta e solidaria.
f) Promove-lo coñecemento na sociedade da personalidade nacional de Galicia e da súa historia, impulsando e seu estudio e a súa proxección pública.
g) Profundar no coñecemento da realidade galega, na súa dimensión política, social, cultural e económica.
h) Aumenta-la formación política dos cidadáns, profundar no debate político e impulsa-la sensibilización e a concienciación da sociedade sobre a realidade e problemáticas propias da nación galega e a visión do mundo desde unha perspectiva nacional galega.
Sexto.-Na escritura pública pola que se constitúe a fundación constan, entre outros, os seguintes puntos: acreditación da personalidade dos fundadores, dotación inicial da fundación, estatutos nos que consta a denominación da fundación como Fundación Enclave, capacidade xurídica, composición do órgano de goberno, réxime de adopción de acordos, obxecto e domicilio.
O padroado da fundación está constituído polos membros que se designan no artigo once dos estatutos da fundación.
Sétimo.-En cumprimento do establecido no artigo 32.3º a) do Regulamento de organización e funcionamento do protectorado das fundacións de interese galego, con data do 24 de xaneiro de 2001, a Asesoría Xurídica delegada da Consellería de Cultura, Comunicación Social e Turismo emite informe favorable sobre a legalidade da declaración de interese galego da Fundación Enclave.
Fundamentos de dereito:
Primeiro.-O artigo 34 da Constitución española recoñece o dereito de fundación para fins de interese xeral de acordo coa lei, e o artigo 27.26º do Estatuto de autonomía para Galicia outórgalle competencia exclusiva sobre o réxime de fundacións de interese galego.
Segundo.-Conforme o artigo 32.3º a) do Regulamento de organización e funcionamento do protec
torado das fundacións de interese galego, así como os artigos 1 e 4 do Decreto 8/1998, do 8 de xaneiro, polo que se desenvolve a estructura orgánica da Consellería de Cultura, Comunicación Social e Turismo, é competencia desta consellería a declaración de interese galego e inscrición no Rexistro de Fundacións de Interese Galego da Fundación Enclave, dado o seu obxecto, coincidente coas competencias desenvolvidas pola Consellería de Cultura, Comunicación Social e Turismo, asumindo as funcións que canto a protectorado lle corresponden á Xunta de Galicia.
Terceiro.-Ó abeiro do disposto no artigo 7.5º da Lei 7/1983, do 22 de xuño, á realización da finalidade fundacional débense destinar, cando menos, o oitenta por cento das rendas que obteña a fundación e dos outros ingresos que non formen parte da dotación dela.
Cuarto.-A Lei 11/1991, do 8 de novembro, da nova redacción ó artigo 21.2º da Lei 7/1983, do 22 de xuño, establecendo a obriga de, por unha parte, formular e presenta-lo orzamento de ingresos e gastos ó protectorado con anterioridade ó inicio do exercicio económico e, por outra, efectuar un inventario-balance, pechado na data de finalización do exercicio, unha memoria das actividades realizadas ó longo do ano e da xestión económica do seu patrimonio, así como a liquidación do orzamento de ingresos e gastos do ano anterior, que deberán presentarse ó protectorado no prazo de seis meses desde a data de peche do exercicio.
Este conxunto de obrigas débense entender asumidas pola fundación, aínda que non se recollan expresamente nos seus estatutos.
Quinto.-Á vista do exposto pódense entender substancialmente cumpridos os requisitos legais e regulamentarios para a declaración de interese galego e a súa inscrición no Rexistro de Fundacións da Consellería de Cultura, Comunicación Social e Turismo segundo se desprende dos artigos 5, 6, 7, 8, 11.1º e 18 da Lei 7/1983, do 22 de xuño, en relación cos artigos 2, 3, 4, 5 e 33 do Decreto 248/1992, do 18 de xuño.
Vistas as seguintes normas xurídicas: Constitución española; Estatuto de autonomía para Galicia; Lei 1/1983, do 22 de febreiro, reguladora da Xunta e do seu presidente, modificada por Lei 11/1988, do 20 de outubro; Lei 30/1994, do 24 de novembro, de fundacións e incentivos fiscais á participación privada en actividades de interese xeral; Lei 7/1983, do 22 de xuño, de réxime das fundacións de interese galego, modificada por Lei 11/1991, do 8 de novembro; Decreto 248/1992, do 18 de xuño, polo que se aproba o Regulamento de organización e funcionamento do protectorado das fundacións de interese galego; Decreto 8/1998, do 8 de xaneiro, polo que se desenvolve a estructura orgánica da Consellería de Cultura, Comunicación Social e Turismo; Lei 30/1992, do 26 de novembro, de réxime xurídico das administracións públicas e do procedemento administrativo común, modificada por Lei 4/1999,
do 13 de xaneiro; e demais normativa de pertinente e xeral aplicación.
DISPOÑO:
Primeiro.-Recoñecer e declarar de interese galego a Fundación Enclave.
Segundo.-Ordena-la súa inscrición no Rexistro de Fundacións de Interese Galego da Consellería de Cultura, Comunicación Social e Turismo.
Terceiro.-Aproba-los seus estatutos e a composición do seu órgano de goberno.
Cuarto.-A dita fundación queda sometida ó disposto na normativa de xeral aplicación, en especial á obriga de dar publicidade suficiente ás súas actividades e á ausencia de ánimo de lucro na prestación dos seus servicios, quedando obrigada a render contas anualmente ó protectorado e a xustificar, a través dunha memoria anual, o cumprimento das cargas fundacionais, así como a presenta-lo proxecto de orzamento antes do último mes do exercicio económico anterior a aquel para o que se formula, debendo solicita-las preceptivas autorizacións do protectorado cando sexan necesarias.
Contra esta orde, que pon fin á vía administrativa, poderá interpoñerse potestativamente recurso de reposición ante este mesmo órgano, no prazo dun mes contado desde o día seguinte ó da súa publicación, ou recurso contencioso-administrativo ante o Tribunal Superior de Xustiza de Galicia, no prazo de dous meses contados desde o día seguinte ó da publicación. Non se poderá interpoñer recurso contencioso-administrativo ata ser resolto expresamente ou se producir a desestimación presunta do recurso de reposición.
A presente orde entrará en vigor ó día seguinte da súa publicación no Diario Oficial de Galicia.
Santiago de Compostela, 25 de xaneiro de 2001.
Jesús Pérez Varela
Conselleiro de Cultura, Comunicación
Social e Turismo