Con data do 23 de xaneiro de 2001, o xefe do Departamento de Xestión do Dominio Público Hidráulico do organismo autónomo Augas de Galicia, dictou a resolución pola que se revoga a Resolución do 2 de novembro de 2000, do Departamento de Xestión do Dominio Público Hidráulico, pola que se sinalan as datas para o levantamento das actas previas á ocupación dos bens afectados polas obras da modificación nº 1 do encoro de Caldas de Reis no río Umia, no concello de Cuntis, da que o seu texto íntegro se transcribe a continuación:
Antecedentes de feito.
No Diario Oficial de Galicia do 13 de novembro de 2000, publicouse a resolución referida no encabezamento, mediante a que se convocaba ó Concello de Cuntis, en calidade de titular do predio número 0205M, afectado pola execución das actuacións correspondentes á modificación nº 1 da obra do encoro de Caldas de Reis no río Umia, o día 24 de novembro do ano 2000, ó levantamento da acta previa á ocupación do devandito predio.
Para tal fin, así mesmo foi exposta a citada convocatoria no taboleiro de anuncios do Concello de Cuntis, abríndose un período de información pública, que rematou sen que se presentase ningunha alegación ó respecto.
Como consecuencia do exposto, o día 24-11-2000 levantouse acta previa á ocupación do predio afectado polo procedemento expropiatorio iniciado, que foi asinada polo alcalde do Concello de Cuntis, na súa calidade de alcalde e tamén como titular do predio de comunais referido, polo representante da Administración na expropiación e polo perito da Administración, recolléndose na dita acta, no epí
grafe correspondente ás incidencias rexistradas no acto, as manifestacións do alcalde sobre a existencia de procesos xudiciais relacionados coas actuacións que se estaban a levar a cabo.
Consideracións xurídicas:
O artigo 105.1º da Lei 30/1992, do 26 de novembro, de réxime xurídico das administracións públicas e do procedemento administrativo común, na súa nova redacción dada pola Lei 4/1999, sinala textualmente: «as administracións públicas poderán revogar en calquera momento os seus actos de gravame ou desfavorables, sempre que tal revogación non constitúa dispensa ou exención non permitida polas leis, ou sexa contraria ó principio de igualdade, ó interese público ou ó ordenamento xurídico».
No momento presente, toda vez que se cumpren aquí os presupostos de feito esixidos polo dito artigo 105.1º e, tendo en conta que se levaron a cabo cambios na programación da execución das actuacións complementarias correspondentes á modificación nº 1 da obra do encoro de Caldas de Rei no río Umia, resulta procedente revoga-la Resolución do 2-11-2000 e os actos posteriores producidos a consecuencia dela, privándoos, conseguintemente, de eficacia.
Polo exposto, de conformidade co previsto no artigo 105.1º da Lei 30/1992, do 26 de novembro, de réxime xurídico das administracións públicas e do procedemento administrativo común, en uso das atribucións conferidas pola resolución do conselleiro de Política Territorial, Obras Públicas e Vivenda, con data do 5-9-1996, acórdase:
1. Revoga-la Resolución do 2 de novembro de 2000, do Departamento de Xestión do Dominio Público Hidráulico de Augas de Galicia, pola que se sinalan as datas para o levantamento das actas previas á ocupación dos bens afectados polas obras da modificación nº 1 do encoro de Caldas de Reis no río Umia, no concello de Cuntis.
2. Deixar sen efecto a acta previa á ocupación do predio número 0205M, levantada o día 24 de novembro de 2000.
Contra a presente resolución poderán interpoñerse os recursos administrativos que resulten procedentes, no marco establecido pola Lei 30/1992, do 26 de novembro, de réxime xurídico das administracións públicas e do procedemento administrativo común.
O que se fai público en cumprimento do disposto no artigo 60 da Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 26 de xaneiro de 2001.
Antonio López Blanco
Xefe do Departamento de Xestión do Dominio
Público Hidráulico