Por orde da Consellería de Educación e Ordenación Universitaria do 27 de outubro de 2000 (DOG do 9 de novembro) convocáronse axudas económicas para centros docentes e centros de formación continuada do profesorado que participen en programas da Unión Europea durante o ano 2000.

Vista a proposta da comisión de selección prevista no artigo quinto da citada orde,

RESOLVO:

Primeiro.- Conceder con cargo ó concepto orzamentario 07.04.322T.481.0 da Dirección Xeral de Ordenación Educativa e Formación Profesional, tódalas axudas solicitadas e que se relacionan no anexo I.

Segundo.-De acordo co artigo sétimo as axudas serán aboadas da seguinte forma:

Para as axudas que non superen o importe de 1.000.000 de pesetas, no momento da concesión poderá acordarse un anticipo de pagamento de ata un 80%, logo de aceptación da subvención. O 20% restante librarase unha vez rematada a actividade e logo da súa completa xustificación económica por parte do centro e entrega da memoria de actividades, achegando certificación respecto da percepción ou non doutras axudas e subvencións para a mesma finalidade, para efectos do disposto no artigo 78.3º da Lei 11/1992, do 7 de outubro, de réxime financeiro e presupostario de Galicia. Nas axudas que superen esta cantidade o pagamento realizarase integramente unha vez rematada e xustificada a actividade.

Terceiro.-Obrigas dos beneficiarios.

1. Acepta-la axuda concedida. Neste sentido, se no prazo de quince días, contados a partir da recepción da comunicación pola que se notifica a concesión da axuda, o centro beneficiario non acepta esta, entenderase que renuncia á súa percepción.

2. Xustifica-lo correcto investimento das axudas recibidas, mediante a presentación da seguinte documentación:

2.1. Memoria.

Os alumnos e profesores beneficiarios enviarán unha memoria das actividades realizadas polos alumnos e profesores. A memoria enviarase a través do centro e deberá incluí-los seguintes puntos:

a) Resumo do desenvolvemento da actividade realizada.

b) Obxectivos conseguidos.

c) Procedemento de avaliación utilizado, resultados obtidos e difusión que se realizou deles.

2.2. Xustificación de gastos efectuados.

Relación detallada das facturas e recibos dos gastos realizados no desenvolvemento do proxecto. Xuntarase unha certificación do Consello Escolar do centro, aprobatoria do referido gastos.

Certificación respecto da percepción ou non percepción doutras axudas e subvencións para a mesma finalidade, para efectos do disposto no artigo 6 da Lei 8/1999, do 30 de decembro, de medidas fiscais e orzamentarias e de función pública e actuación administrativa (DOG do 31 de decembro).

Cuarto.-Contra esta resolución os interesados poderán interpoñer, perante o conselleiro de Educación e Ordenación Universitaria, recurso potestativo de reposición no prazo dun mes, contado a partir do día seguinte ó da súa publicación no DOG, segundo o disposto na Lei 30/1992, do réxime xurídico das administracións públicas e do procedemento administrativo común, modificada pola Lei 4/1999, (BOE do 14 de xaneiro), ou ben directa

mente o recurso contencioso-administrativo no prazo de dous meses, ante o Tribunal Superior de Xustiza de Galicia.

Santiago de Compostela, 29 de decembro de 2000.

Celso Currás Fernández

Conselleiro de Educación e Ordenación Universitaria

ANEXO I