Aprobada a normativa de creación de cargos académicos pola Xunta de Goberno con data do 24 de xuño de 1999 e polo Claustro Universitario con data do 5 de maio de 2000, este rectorado resolveu publica-la devandita normativa, que figura no anexo desta resolución.
Vigo, 9 de xaneiro de 2001.
Domingo Docampo Amoedo
Rector da Universidade de Vigo
CREACIÓN DE CARGOS ACADÉMICOS
Os estatutos da Universidade de Vigo, no seu artigo 90, establecen o seguinte:
«A creación de cargos académicos distintos dos previstos nestes estatutos deberá ser aprobada polo Claustro, por proposta da Xunta de Goberno, que a remitirá ó Consello Social».
Cómpre, pois, establecer unha normativa que dea abeiro ós cargos xa existentes na actualidade e que fixe o procedemento para os que se poidan crear no futuro.
1. Créase o cargo académico de director de área, con responsabilidade nun determinado ámbito de competencias non dependente necesariamente de forma directa dun membro do equipo de goberno.
2. A súa exención de obrigas docentes será de 2 horas lectivas e de 2 horas de titoría.
3. Estes cargos poderán ter carácter estable ou conxuntural.
4. A iniciativa para a creación efectiva dunha área, así como para a súa supresión ou modificación, corresponde ó equipo de goberno ou á Xunta de Goberno. As propostas de creación deberán vir acompañadas das funcións e da retribución económica e deberán ser aprobadas pola Xunta de Goberno.
5. O nomeamento da persoa que ocupe o cargo corresponde ó rector, quen informará debidamente á Xunta de Goberno.
6. Os membros da Comunidade Universitaria que desempeñen este cargo terán dedicación a tempo completo e non poderán exercer simultaneamente a titularidade de máis dun cargo unipersoal (artigos 87 e 88 dos estatutos).
7. A presente normativa será aprobada polo Claustro, tralo informe da Xunta de Goberno.
8. Coa súa aprobación considéranse creados os seguintes cargos:
-Director da Oficina de I+D.
-Director da ORI.
-Director do CACTI.
-Director da Área de Calidade.
-Director da Área de Tecnoloxías de Información e as Comunicacións.
-Director da Oficina de Medio Ambiente.
-Director da Área de Deportes e Participación Estudiantil.
-Director da Área de Cultura.
-Director da Área de Residencias e Aloxamentos.
