Vista a solicitude presentada por Ramón Moral Riestra en representación de Asociación Provincial de Talleres de Reparación de Vehículos Automóviles de Pontevedra (Atra) e a documentación anexa, na que solicita que lle sexa concedida a cualificación de entidade recoñecida para imparti-la formación de profesionais do sector de automóbiles.
Considerando que se cumpriron os requisitos regulamentarios establecidos no artigo 4.bis do Decreto 206/1994, do 16 de xuño (DOG do 6 de xullo), polo que se adapta a normativa vixente en materia de prestación de servicios nos talleres de reparación de vehículos e dos seus equipos e compoñentes, modificado polo Decreto 347/1998, do 20 de novembro.
Esta dirección xeral resolve:
Outorgarlle á Asociación Provincial de Talleres de Reparación de Vehículos Automóviles de Pontevedra (Atra) a cualificación de entidade recoñecida para imparti-la formación de profesionais do sector de automóbiles, e inscribila no rexistro de entidades acreditadas para iso.
Para imparti-la formación, presentará perante a delegación provincial de Industria e Comercio da provincia correspondente, fotocopia da presente
resolución, táboa de tarefas e programación de cursos previstos.
Para efectos estatísticos e de control, presentará nas delegacións provinciais de Industria e Comercio onde exerza a suá actividade, unha memoria anual de actuacións e nesta dirección xeral un resumo destas na comunidade autónoma.
Esta autorización deberase renovar ós dous anos, para o que acreditará perante esta Dirección Xeral de Industria e Comercio, o cumprimento dos requisitos esixidos na autorización inicial.
Santiago de Compostela, 5 de decembro de 2000.
Ramón Ordás Badía
Director xeral de Industria