A compañía mercantil Casas Ourense, S.A., mediante escrito do 6 de setembro de 2000, manifesta a súa vontade de lle ceder gratuitamente ó Servicio Galego de Saúde un terreo da súa propiedade contiguo ó Centro de Saúde Valle Inclán de Ourense, cunha extensión superficial de 28,10 m, para a remodelación do centro de saúde.
Conforme o artigo 17.1º da Lei 3/1985, do 12 de abril, do patrimonio da Comunidade Autónoma, requírese decreto do Consello da Xunta de Galicia para a adquisición de bens a título gratuíto. Por outra banda, o artigo 23.1º da mesma lei establece que non poderán adquirirse bens ou dereitos a título lucrativo cando o valor global dos gravames, cargas e afectacións impostas sobre eles exceda o seu valor intrínseco. Non se considerarán carga, gravames ou afeccións os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente.
En cumprimento do disposto na Lei 3/1985, do 12 de abril, do patrimonio da Comunidade Autónoma, de conformidade coa proposta do conselleiro de Sanidade e Servicios Sociais e logo de deliberación do Consello da Xunta de Galicia na súa reunión do día vinteoito de decembro de dous mil,
DISPOÑO:
Artigo 1º
1. Acéptase a cesión a título gratuíto dos terreos sitos na rúa Celso Emilio Ferreiro, propiedade da compañía mercantil Casas Ourense, S.A. a favor do Servicio Galego de Saúde, para a remodelación do Centro de Saúde Valle Inclán.
2. A parcela cedida ten unha superficie de 28,10 m e os seus lindes son os seguintes:
-Á fronte: rúa Capitán Cortés, hoxe rúa Celso Emilio Ferrreiro.
Á dereita: resto da súa matriz, hoxe rúa Valle Inclán.
Á esquerda: a obra sindical Dezaoito de Xullo, hoxe Centro de Saúde Valle Inclán.
-Ó fondo: predio de Inés Martínez Novo.
3. O inmoble obxecto da cesión está inscrito no Rexistro da Propiedade de Ourense número 1, a favor da compañía mercantil Casas Ourense, S.A., no folio 18, do libro 427, tomo 1.169, do predio nº 35.937, inscrición segunda.
Artigo 2º
O inmoble cédese segundo o establecido nos artigos 23.1º da Lei 3/1985, do 12 de abril, do patrimonio da Comunidade Autónoma e 38 do seu regulamento, e destinarase á remodelación do Centro de Saúde Valle Inclán.
Artigo 3º
O Servicio Galego de Saúde, a través do seu órgano competente, procederá á formalización da aceptación no correspondente documento público, inscribíndose no Rexistro da Propiedade ó seu nome e integrándose no seu patrimonio propio.
Disposición derradeira
O Servicio Galego de Saúde, a través do seu órgano competente, levará a cabo os trámites necesarios para a efectividade de canto se dispón neste decreto.
Santiago de Compostela, vinteoito de decembro de dous mil.
Manuel Fraga Iribarne
Presidente
José María Hernández Cochón
Conselleiro de Sanidade e Servicios Sociais
e presidente do Servicio Galego de Saúde