O Concello de Lalín solicitou a cesión por parte da Xunta de Galicia dun treito da antiga estrada PO-200 (Lalín-Laro) e dun treito da antiga estrada PO-202 (Lalín-O Carballiño), comprendidos no termo municipal e que quedan fóra do novo trazado das estradas referidas logo das obras de mellora e ampliación nelas efectuadas.
Conforme o sinalado nos artigos 4 e 5 da Lei 4/1994, do 14 de setembro, de estradas de Galicia, por proposta do conselleiro de Política Territorial, Obras Públicas e Vivenda, logo de acordo entre as administracións afectadas e logo de deliberación do Consello da Xunta de Galicia na súa reunión do día vinteoito de decembro de dous mil
DISPOÑO:
Artigo 1º
Apróbase o cambio de titularidade, en favor do Concello de Lalín, dos treitos correspondentes á modificación do trazado das estradas PO-200 (Lalín-Laro) e PO-202 (Lalín-O Carballiño) que a seguir se relacionan:
Treito 1. Reguengo.
A antiga estrada PO-200 discorre nunha lonxitude de 800 metros a través do núcleo de Reguengo, parroquia de Botos.
O treito enlaza coa actual PO-200 no p.k. 3,800 marxe esquerda e no p.q. 4,400 marxe dereita.
Treito 2. Barreiro.
A antiga estrada PO-202 discorre nunha lonxitude de 330 metros a través do núcleo de Barreiro, parroquia de Vilanova.
O treito enlaza coa actual PO-202 nos p.k. 4,400 e 4,800 pola marxe dereita.
Artigo 2º
Corresponderalle ó Concello de Lalín a xestión, o mantemento, a conservación e a explotación das vías cedidas.
Disposición derradeira
Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, vinteoito de decembro de dous mil.
Manuel Fraga Iribarne
Presidente
José Cuíña Crespo
Conselleiro de Política Territorial, Obras Públicas
e Vivenda