A disposición transitoria novena da Lei orgánica 1/1990, do 3 de outubro, de ordenación xeral do sistema educativo, e a disposición transitoria primeira da Lei orgánica 9/1995, do 20 de novembro, da participación a avaliación e o goberno dos centros docentes, establecen que os funcionarios dos corpos docentes a que fan referencia as disposicións adicionais décima, 1 e décimo cuarta, 1, 2, 3 da dita lei, incluídos no ámbito de aplicación do réxime de clases pasivas do Estado, poderán optar a un réxime de xubilación voluntaria durante o período de implantación con carácter xeral, das ensinanzas establecidas na dita lei orgánica, sempre que reúnan determinados requisitos.
Así mesmo, a Lei 31/1991, do 30 de decembro, establece que os funcionarios docentes de corpos e escalas declaradas a extinguir con anterioridade á vixencia da Lei orgánica de ordenación xeral do sistema educativo, incluídos no ámbito de aplicación do réxime de clases pasivas, tamén poderán acollerse ó réxime de xubilación voluntaria regulado na disposición transitoria novena da citada lei.
O acordo do Consello de Ministros do 28 de decembro de 1990, modificado polo acordo do 6 de marzo de 1992, determina o importe e as condicións das gratificacións extraordinarias que aboará o Estado previstas na Lei orgánica de ordenación xeral do sistema educativo para os funcionarios que imparten docencia en niveis non universitarios.
Por acordo do Consello da Xunta de Galicia do 25 de febreiro de 2000, establécese o importe e as condicións das gratificacións extraordinarias que aboará a Xunta de Galicia para incentiva-la xubilación voluntaria dos funcionarios docentes que imparten ensinanzas non universitarias, compatibles coas previstas no parágrafo anterior.
En virtude do exposto, esta consellería
DISPÓN:
Primeiro.-Poderán solicita-la xubilación anticipada voluntaria, con efectividade do 31 de agosto do ano 2001, os funcionarios docentes de niveis non universitarios con destino nesta Comunidade Autónoma incluídos no ámbito de aplicación do réxime de clases pasivas do Estado, pertencentes a algún dos seguintes corpos:
-Corpos de mestres.
-Corpo de profesores de ensino secundario.
-Corpo de profesores técnicos de formación profesional.
-Corpo de catedráticos de música e artes escénicas.
-Corpo de profesores de música e artes escénicas.
-Corpo de profesores de artes plásticas e deseño.
-Corpo de mestres de taller de artes plásticas e deseño.
-Corpo de profesores de escolas oficiais de idiomas.
-Corpo de inspectores de educación
-Corpos e escalas declaradas a extinguir con anterioridade á vixencia da Lei orgánica de ordenación xeral do sistema educativo.
Segundo.-Tamén poderán solicita-la xubilación anticipada voluntaria os inspectores ó servicio da Administración educativa e os directores escolares de ensino primario que se van extinguir.
Para iso deberán cumprir tódolos requisitos do punto terceiro da presente orde, a excepción do referido á permanencia en cadros de persoal de centros docentes, que deberá referirse ó equivalente que corresponda.
Terceiro.-Os solicitantes deberán cumpri-los seguintes requisitos:
a) Estar en activo o 1 de xaneiro de 1990 e permanecer ininterrompidamente na dita situación, e desde a dita data en postos pertencentes ós correspondentes cadros de persoal docentes ou á Inspección Educativa.
b) Ter cumpridos sesenta anos de idade o 31 de agosto do ano 2001.
c) Ter acreditados un mínimo de quince anos de servicios efectivos ó Estado, o 31 de agosto do ano 2001.
Cuarto.-Os funcionarios que se xubilen de acordo co disposto na disposición transitoria novena da Lei orgánica de ordenación xeral do sistema educativo, que teñan acreditados no momento da xubilación alomenos vinteoito anos de servicios efectivos ó Estado, segundo a idade, corpo de pertenza e anos de servicio efectivos, percibirán:
a) A gratificación establecida no acordo do Consello de Ministros do 28 de decembro de 1990, modificada polo acordo do 6 de marzo de 1992.
b) A gratificación establecida no acordo do Consello da Xunta de Galicia do 25 de febreiro de 2000.
Os funcionarios dos corpos docentes ós que se refiren as disposicións adicionais décima, 1 e décimo cuarta, 1, 2 e 3 da Lei orgánica de ordenación xeral do sistema educativo, acollidos a réximes de Seguridade Social ou previsións distintos de clases pasivas poderán igualmente percibi-la gratificación extraordinaria que lles corresponda sempre que causen baixa definitiva na prestación de servicios ó Estado, por xubilación voluntaria ou por renuncia á súa condición de funcionario, e reúnan os requisitos esixidos nesta norma, agás quen pertenza ó réxime de clases pasivas do Estado.
Quinto.-As solicitudes deberán presentarse dentro dos dous primeiros meses do ano 2001, acompañadas da documentación que para o efecto se indique, nas delegacións provinciais correspondentes ó centro de destino do solicitante ou nos lugares e forma que determinan o artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
Sexto.-Unha vez iniciado o procedemento unicamente serán aceptadas as renuncias que se presenten con anterioridade ó 30 de abril do ano 2001.
Sétimo.-A Dirección Xeral de Persoal resolverá as solicitudes presentadas e, cando proceda, proporá a resolución de xubilación anticipada e voluntaria con indicación da contía de gratificación extraordinaria e diferenciando entre a recollida nas letras a) e b) do punto cuarto desta orde.
Oitavo.-Coa paga ordinaria do último mes de servicio activo percibirase a totalidade da gratificación estatal establecida polo acordo do Consello de Ministros e o corenta por cento da establecida polo acordo do Consello da Xunta de Galicia. O sesenta por cento restante será aboado nas mesmas datas que a nómina do mes de marzo do ano inmediatamente seguinte.
Noveno.-Esta orde entrará en vigor o 1 de xaneiro de 2001.
Santiago de Compostela, 21 de decembro de 2000.
Celso Currás Fernández
Conselleiro de Educación e Ordenación
Universitaria
